AMOS 4 - BUKUIT NE TILIL

¹ Ogas ng’olyondoni, okwek tugab Basan, che mitei tulwetab Samaria, che sastoe kibananok, che tiekyin ng’ony che matinyei kiy, che lenjin kiptainikwak, Oibu, kee.

² Kigoyosio Kiptaiyat Jehovah eng’ tililindanyi, kole, Ogeero, bwanjinok betusiek, che tun imutenok kombok, ak komute chekwok che ng’etu, kombok che kiname njirenik.

³ Ak omande obun komoswek che kibutok eng’ irimet, kotokyigei age tugul tainnyi; ak owirjige Harmon, mwaei Jehovah.

Chombilisiet ne mitei eng’ kasubetab sautik

⁴ Obwa Bet-el, si ongelelse; obwa Gilgal, si otes bistoet; ak oibu tiseiywekwok karonet age tugul, ak kebeberwekwok che bo taman eng’ betut age tugul ne bo somok;

⁵ ak ogoite korosiotab kongoi ne bo kit ne kaginde mermerek, ak omwaite kagochinoikab chamnyet, ak obarte: amu ochame nito, ee lagokab Israel, mwaei Jehovah.

Kibwatyin bik birutik che kota kebirei ichek

⁶ Ak koagonok agine iljet eng’ nganasokwok tugul, rartaetab amitwogik eng’ komoswekwok tugul: ago tom oweekyage, mwaei Jehovah.

⁷ Ak kiaetenak kogeny ropta, ye kitomo arawek somogu si koit kesisiet: ak kiagochi korobonji nganaset age, ak aeete ropta nganaset age: kirobonji komosta ne ming’in, ak kiyaam komosta ne ma robonji.

⁸ Koombeniot anyun nganasok aeng’u anan ko somok koba nganaset age si koee beek, ago ma yam: ago tom oweekyage, mwaei Jehovah.

⁹ Kiabirenok chelalitiet ak uchatet: kiam munene mbarenikwok che chang’ ak mbarenikwok che bo sabibuk, ak mogoonikwok ak emitikwok: ago tom oweekyage, mwaei Jehovah.

¹⁰ Kiayokwok koroito ko u ni ki bo Misri: kiabar murenikwok eng’ rotwetab chok, ak kiakweri mbartanyisiekwok; ak kiayai bulatetab nganaseng’wong’ kotogos kot koit serunekwok: ago tom oweekyage, mwaei Jehovah.

¹¹ Kiang’em agesu alak eng’ okwek, ko u ye king’em Kamuktaindet Sodom ak Gomora koges, ak kio u mecheita ne kaginemune mat: ago tom oweekyage, mwaei Jehovah.

¹² Ayaun ko u noto anyun, ee Israel: ak amu ayaun anyun ko u nito, choboge anyun otuiye ak Kamuktaindeng’ung’, ee Israel.

¹³ Amu, keero, inendet ne yaei tulonok, ak koyaei usonet, ak komwachin chi kabwatennyi, inendet ne yaei karonet koimenit, ak kotiechei komoswek che tororen che bo ng’ony; kainennyi ko Jehovah, Kamuktaindet ne bo lugosiek.