AMOS 3 - BUKUIT NE TILIL

Biret ne kibirei Israel amu ma isub imanda

¹ Ogas ng’olyondoni kagomwa Jehovah agobo okwek, ee lagokab Israel, agobo got komugul ne bo Israel ne kiamutu kotogos eng’ emetab Misri, kole,

² Okwege kityo che angen eng’ ortinwek tugul che bo ng’ony: aiitwok anyun biret amu tengekwogikwok tugul.

³ Tos bendat bik aeng’u ngot ko magasyindos?

⁴ Tos boriseni ng’etundo eng’ osnet ngo ma bar tiondo? Tos boriseni ng’etundo ne neran eng’ kebenennyi ngot ko ma am kiy?

⁵ Tos ibutyin taritiet mestet ne mi ng’ony eng’ ole mami mestet ne namei inendet? Tos iwir mestet ama twa kiy?

⁶ Tos kiguutei iriaget eng’ nganaset, ama iyweis bik? Tos nyonjin yaitiet nganaset, ama iyokyi Jehovah?

⁷ Iman mayaei kiy Kiptaiyat Jehovah kotom kong’ang’ji ung’otiennyi otwogikyik maotik.

⁸ Kagoborisen ng’etundo, ng’o ne maiyweisiei? Kagong’alal Kiptaiyat Jehovah, ko ng’o anyun ne mamaoteni?

⁹ Omwaite eng’ gorikab laitoriat eng’ Asdod, ak eng’ gorikab laitoriat che mi emetab Misri, ole, Oyumjige tulonokab Samaria, ak ogeer ole te wasetab ge ne o ne mi oloto, ak ole te sastaosiek che mi kwenunnyi.

¹⁰ Mwaei Jehovah kole, Amu maingen koyai ne mie, che konori koromnatet ak rebisiet eng’ gorikwak che bo laitoriat.

¹¹ Mwaei anyun Kiptaiyat Jehovah ko u ni kole: Biitu bunyot, ne mi komoswek tugul eng’ emet: ak korebenen kimnateng’ung’, ak keng’em goriguk che bo laitoriat.

¹² Mwaei anyun Kiptaiyat Jehovah ko u ni kole: Ko u ye soru mestowot kelyek aeng’ anan motwet ne bo itit eng’ kutitab ng’etundo; kisoru anyun ko u noto lagokab Israel che tebe Samaria eng’ luitab kit ne kilyeldoe, ak eng’ kiplusinik che bo aririt che bo itogut.

¹³ Ogas okwek, ak obaorianji gotab Jakobo, mwaei Kiptaiyat Jehovah, Kamuktaindet ne bo lugosiek.

¹⁴ Amu eng’ betut ne tun aiityini biret Israel amu bistaosiekyik, aiityini kogeny biret kapkorosusiekab Bet-el, ak keisto kuinoikab kapkorosut, ak kobut.

¹⁵ Ak abut gotab betusiekab kaititiet koboto ne bo betusiekab lalang’indo; ak keng’em gorik che kigiteege kelekab belek, ak kogesgei gorik che eechen, mwaei Jehovah.