AMOS 2 - BUKUIT NE TILIL

¹ Mwaei Jehovah ko u ni kole: Maaweechi biret ne abire Moab amu bistaosiekyik somok, ee agot ang’wan; amu kibeel kowekab laitoriatab Edom kot koek orek:

² ago ayokyini mat Moab, ak kobeel gorikab laitoriat eng’ Keriot; ak kome Moab eng’ wasetab ge, ak waagat ak cheetab iriaget:

³ ak aiste kiruogindet eng’ kwenunnyi, ak abar bounikyik tugul koboto inendet, mwaei Jehovah.

Kiruogutik che kiruokyin Juda ak Israel

⁴ Mwaei Jehovah ko u ni kole: Maaweechi biret ne abire Juda amu bistaosiekyik somok, ee, agot ang’wan; amu kogoesio ng’atutikab Jehovah, ama rib kayomisutikyik, ak kogogochi lembechekwak ichek komasta, che kiisubi kwanisiekwak:

⁵ ago ayokyini mat Juda, ak kobeel gorikab laitoriat eng’ Jerusalem.

⁶ Mwaei Jehovah ko u ni kole: Maaweechi biret ne abire Israel amu bistaosiekyik somok, ee agot ang’wan; amu kogoaldae che bo iman feda, ak koaldae che matinyei kiy kweonik:

⁷ che isienyi komachei temburiekab emet eng’ metowekab kibananok, ak komaas ortinwekab che taloen: ak koba kwanda ak werinnyi koipgei ak chepto agenge, si kong’wanit kainennyu ne tilil:

⁸ ak koruiye ngoroik che kiname besendo eng’ ole negite kapkorosut age tugul, ak koee divaik eng’ gotab Kamuktaindanywa, che kigiibe bik che kigiruokyin.

⁹ Ago kiabar Amorindet eng’ tainywa, ne kiaechin koindanyi ak taragonik, ak ki kim ko u ketik che uuen; ak kiang’em logoekyik eng’ ole bo barak, ak tigitikyik eng’ ole bo ng’ony.

¹⁰ Ak kiamutwak kogeny otogosu eng’ emetab Misri, ak andoiywok kenyisiek artam eng’ ong’atet, si kobiit onam emetab Amorik kobunjok.

¹¹ Ak kiande alak eng’ werikwok koek maotik, ak ande alak eng’ murenikwok koek Nasiritik. Tos ma u noto, ee okwek lagokab Israel? Mwaei Jehovah.

¹² Ago koigochi Nasiritik divaik koee; ak ong’at maotik olenji, Amat omaoten.

¹³ Ogeero, agiichok eng’ ole omi, ko u ye chiilsei karit ne nyiitat ratutikab bek.

¹⁴ Ak kobetyi chepchebindo che mweei, amaigimiti che kimen kimnatenywa, ama sorugei ne nyigan:

¹⁵ ama imuchi kotonon inendet ne namei kwanget, ma sorugei inendet ne chepcheb: ama sorugei inendet ne lanyei mbartanyit:

¹⁶ ak komwei ach ngor eng’ betunoto inendet ne nyigan eng’ che nyigonen, mwaei Jehovah.