AMOS 1 - BUKUIT NE TILIL

Kiruogutikab Jehovah che iruokyin bororiosiek che mi ole negit

¹ Ng’alekab Amos, ne ki agenge eng’ mestowekab Tekoa, che kigeer agobo Israel eng’ betusiekab Usia laitoriatab Juda, ak eng’ betusiekab Jeroboam weritab Joas laitoriatab Israel, eng’ kenyisiek aeng’ kotom kobotan emet.

² Kimwa kole, Boriseni Jehovah eng’ Sion, ak kotwegu eng’ Jerusalem; ak koririo ole iyagisie mestowek, ak koyaam walitab Karmel.

³ Mwaei Jehovah ko u ni kole: Maaweechi biret ne abire Damasko amu bistaosiekyik somok, ee agot ang’wan, amu kogobire Gilead tugukab karik che kibore bek:

⁴ ago ayokyini mat gotab Hasael, ak kobeel gorikab laitoriat, che ki bo Ben-hadad.

⁵ Ak airi temeleiywotab Damasko, ak abar ne menyei atebwetab Aben, koboto inendet ne namei siaritab laitornatet, ne bunu gotab Eden: ak keluul bikab Suria, koba Kir, mwaei Jehovah.

⁶ Mwaei Jehovah ko u ni kole: Maaweechi biret ne abire Gasa amu bistaosiekyik somok, ee agot ang’wan; amu kiimut bik tugul koek luulenik, si kogoito koba Edom:

⁷ ago ayokyini mat irimetab Gasa, ak kobeel gorikyik che bo laitoriat:

⁸ ak aiste ne menyei Asdod, ak inendet ne namei siaritab Askelon; ak aweech eunnyu aborie Ekron, ak lustos che king’et che bo Pilistik, mwaei Kiptaiyat Jehovah.

⁹ Mwaei Jehovah ko u ni kole: Maaweechi biret ne abire Turo amu bistaosiekyik somok, ee agot ang’wan; amu kiigoito bik tugul koba Edom, ama ibwat kayomisutiet ne bo che tupcho:

¹⁰ ago ayokyini mat irimetab Turo, ak kobeel gorikyik che bo laitoriat.

¹¹ Mwaei Jehovah ko u ni kole: Maaweechi biret ne abire Edom, amu bistaosiekyik somok, ee agot ang’wan; amu kione tupchennyi rotwetab chok, ak kiisto rirenetab ge tugul, ak kinerechi mising’ kotugul, ak kigonor neregekyik koigeny:

¹² ago ayokyini mat Teman, ak kobeel gorikab laitoriat eng’ Bosra.

¹³ Mwaei Jehovah ko u ni kole: Maawechi biret ne abire lagokab Amon amu bistaosiekyik somok, ee agot ang’wan; amu kogogerer kwonyik che tamanosiek che bo Gilead, kole si kobiit kotes kiwotenywa:

¹⁴ ago anaami mat eng’ irimetab Raba, ak kobeel gorikyik che bo laitoriat, koboto waagat eng’ betutab boriet, koboto usonet ne o eng’ betutab kipchurjuriet:

¹⁵ ak keluul laitoriandenywa, inendet koboto bounikyik, mwaei Jehovah.