AMDOINDET 9 - BUKUIT NE TILIL

Meng’isie eng’ boiboindo nguno

¹ Kiabwat choto tugul eng’ muguleldanyu, asiach chuto tugul, ale mitei eutab Kamuktaindet, bik che bo iman, ak che ng’omen, ak boisionikwak: ngo chamnyet anan wechet, ko manaei chito noto; mi tugul tainywa.

² Ityin bik tugul tuguk tugul kogergeit: ityin kit agenge chi ne bo iman ak chi ne ya; ityin ne mie, ak ne tilil, ak ne ma tilil, ityin ne igoitoi korosiot, ak ne maigoitoi korosiot: ko u kit ne u chito ne mie, ko u noto kiptengekyot; u inendet ne iyostos, inendet ne iywei kayosiet.

³ Nito ko yaitiet eng’ tugul che kiyaei eng’ kureretab asista, mi kit agenge ne ityin tugul: ee, nyiitat mugulelwekab werikab bik, yaitwogik, ak mi iywek mugulelwekwak kote kosoptos, ak ye ibata koba ole mi che kigobek.

⁴ Amu tinyei kamang’unet inendet ne namegei ak tugul che soptos: amu kaigai seset ne sobei kosiir ng’etundo ne kagome.

⁵ Amu ingen che soptos kole begu: ago manaei kiy age tugul che kigobek, ama kotinyei melekto age tugul kogeny; amu kigeutie ichek.

⁶ Kigobet chamnyenywa, ak wechenywa, ak ng’et kondanywa, ama kotinyei kebeberta koigeny eng’ kiy age tugul ne kiyaei eng’ kureretab asista.

⁷ Ui oldang’ung’, am amitwogiguk eng’ boiboiyet, ak iee divaiguk eng’ muguleldo ne baibai; amu kigocham Kamuktaindet boisioniguk.

⁸ Ingoleelagitu ngoroiguk kotugul; ameng’ korarji mwaita meting’ung’.

⁹ Otebi eng’ boiboiyet ak osotiot ne ichame, betusiek tugul che bo sobeng’ung’ ne bo buch, che kigonin inendet eng’ kureretab asista, betusieguk tugul che bo buch: amu kebebertang’ung’ noto kote isobe ak eng’ boisieng’ung’ ne iyaei eng’ kureretab asista.

¹⁰ Kit age tugul ne iyae eng’ eung’ung’, iyai eng’ kimnateng’ung’; amu mami boisiet, anan chobutik, anan naet, anan ng’omnatet eng’ kererit ne iwendi.

¹¹ Kiaweege ak ageer eng’ kureretab asista, ale, ma bo kabeletab ge che chepcheb, ama bo luget che kimen, ama bo amitwogik che ng’omen, ama bo magornatosiek bikab naet, ama chamotin bik che utotin; ago ityin ichek tugul sainywa ak betunywa.

¹² Amu manai chito agine betunnyi: u njirenik che kinamei eng’ regereiywot ne ya, ak u taritik che kinamei eng’ mestet, kinamei ko u noto werikab bik eng’ betut ne ya, ye cheei ichek.

¹³ Kiageer kogeny ng’omnatet eng’ kureretab asista ko u ni, ak kiageer ale, o.

¹⁴ Kimi nganaset ne ming’in, ak kimi bik che ng’ering’ orit; ak kinyo laitoriat ne o kobokyi, ak koyiem, ak koteech irimosiek che eechen komuute nganasanato.

¹⁵ Kiginyorji nganasanato kibananiat ne ng’om, ak kisor nganaset eng’ ng’omnatennyi; ago mami chi ne kiibwat kibananiandanato.

¹⁶ Kiale anyun, Mie ng’omnatet kosiir kimnatet; nganda u noto, kesasei ng’omnatetab kibananiat, ama kigasei ng’alekyik.

¹⁷ Kigasei ng’alekab bik che ng’omen che kimwaei mutyo kosiir waagetab ne bou bik che berber.

¹⁸ Mie ng’omnatet kosiir karik che bo luget: ago ng’emei kiptengekyot agenge mieinwek che chang’.