AMDOINDET 7 - BUKUIT NE TILIL

Kalewenaik che terotin

¹ Kaigai kainet ne mie kosiir mwanik che bo kamanutiet ne o; ak kaigai betutab meet kosiir betut ne kisichei chi.

² Kaigai kebe got ne kiteiye, kosiir kebe got ne mi igorta: amu noto kagesunetab bik tugul; ak konori noto eng’ muguleldanyi chito ne sobei.

³ Kaigai arogenet kosiir roriot: amu kiboiboi muguleldo eng’ arogenetab toget.

⁴ Mi mugulelwekab che ng’omen got ne kiteiye; ago mi mugulelwekab che berber got ne bo boiboiyet.

⁵ Kaigai kegas keretab kong’ ne bo chito ne ng’om, kosiir kogas chito tiendab bik che berber.

⁶ Amu u kateretab katok che mi mat ne mi teret ne kotkotat, roriotab chito ne berber: buch nito agine.

⁷ Igochin iman sastaet chito ne ng’om koberberit; ak ng’emei kit ne kigoigoisie, naet.

⁸ Kaigai kagesunetab kiy kosiir taunennyi: kaigai ne muitoi eng’ tamirmiriet kosiir ne menei.

⁹ Amesartae nerek eng’ sobondang’ung’: amu tebe neregek tegetikab che berber.

¹⁰ Amemwa ile, Kilyon si kogororonitu betusiek che bo tai kosiir betusiechu? Amu ma iteeb agobo nito eng’ ng’omnatet.

¹¹ Mie ng’omnatet ko u ye mie borotet: ee, mie mising’ eng’ ichek che keerei asista.

¹² Amu irimet ng’omnatet ko u fedaisiek: ago telunatetab naet ko ni, ribei ng’omnatet sobondab chito ne tinyei.

¹³ Ibwat boisietab Kamuktaindet: amu ng’o ne imuchi kolitit kit ne kiyai inendet kogunurit?

¹⁴ Baibaitu eng’ betutab berurto, ak eng’ betutab nyalilda ibwat komie: kiyai Kamuktaindet choto kogergeit tuwai, si manai chito kit age tugul ne biitu let.

¹⁵ Kiageer choto tugul eng’ betusiekyuk che bo buch: mi chito ne bo iman ne meitoi imandanyi, ak mi chito ne ya ne sobei keny ak koyaei yaitiennyi.

¹⁶ Ametepte imanda ne siirtoot; ameng’omitu mising’; amu nee si ing’emge?

¹⁷ Ameegu ne ya mising’, anan iegu ne berber: amu nee si imee kotom koit betung’ung’?

¹⁸ Mie inam komie nito; ee, ameistoe eung’ung’ ng’olyondoni agine; amu inendet ne iywei Kamuktaindet komong’une choto tugul.

¹⁹ Ng’omnatet ko kimnatetab chito ne ng’om ne siirei bounik taman che mi nganaset.

²⁰ Iman, mami chi ne bo iman eng’ ng’ony, ne yaei ne mie ama yaei tengekto.

²¹ Ameepchi it kogeny ng’alek tugul che kimwaei; si megas kochubin otwogindeng’ung’:

²² amu ingen agine muguleldang’ung’ konyil che chang’ kole kiichub aginye alak ko u noto.

²³ Kiageer chuto tugul eng’ ng’omnatet: kiale, Ang’omitu; ago kilooena.

²⁴ Kit ne mi, ko mi ye loo, ak kiwa orit mising’; ng’o ne imuchi konyor?

²⁵ Kiaweege, ak kimach muguleldanyu konai ak kosiach ak kocheng’, ng’omnatet, ak ole teptoi tuguk, ak konai kole yaitiet ko berberindo, ak kole berberindo ko iywek.

²⁶ Ak anyoru kit ne ng’wan kosiir meet, korget ne tinyei muguleldanyi mestonok, ak mestonok che u regereiywek, ak u eunekyik ratutik: age tugul ne boiboi Kamuktaindet kochilile inendet; ago namei korgonoto kiptengekyot.

²⁷ Ogeero, kianyoru nito, mwaei Amdoindet, kiatuiye kit age ak age si kobiit anai ole te:

²⁸ ne ta kocheng’ei sobondanyu, ago tom anyoru: kianyoru chito agenge eng’ bik elfut; ago ma anyoru kwondo eng’ choto tugul.

²⁹ Ogeero, kianyoru nito kityo, ale, kiyai Kamuktaindet chito kobunji iman; ago kigocheng’ ichek tuguk che chang’ che taunen.