AMDOINDET 6 - BUKUIT NE TILIL

Magornatosiek ak nyalilwogik che eechen

¹ Mi yaitiet ne kiageer eng’ kureretab asista, ak nyigis noto eng’ bik:

² chito ne igochin Kamuktaindet magornatosiek, chang’indab tuguk, ak teegisto, kot ko mararjin kiy sobondanyi eng’ tuguk tugul che machei, ago maigochin Kamuktaindet kimnatet ne ame tukchoto, ago amei toondet; buch nito, ak ko miando ne ya.

³ Ngot kosich chito lagok bogol, ak kosob kenyisiek che chang’, si kochang’a betusiekab kenyisiekyik, ago mabiyonyi sobondanyi kit ne mie, ama tinyei ole kitupchin; amwae ale kaigai ne kigioos, kosiir inendet:

⁴ amu nyonei buch, ak wendi eng’ mesundeito, ak kituchei kainennyi eng’ mesundeito;

⁵ ama keer asista anan konai; tinyei nito kamuung’et kosiir ni kai.

⁶ Agot ngo sob kenyisiek elfut konyil aeng’, ama baibaitune kiy ne mie, tos mabendi tugul oldo agenge?

⁷ Bo boisiet tugul ne bo chito kutinnyi, ago mabiyonyi.

⁸ Amu tinyei keljinet nee chito ne ng’om kosiir ne berber? Anan tinyei nee chito ne banan, ne ingen kowendot eng’ taitab che soptos?

⁹ Kaigai keeretab konda kosiir maget ne omenoti: buch nito agine ak ko kaiimetab ge ne bo buch.

¹⁰ Kiy age tugul ne mi, ko kiga ketochi kainennyi keny, ak ko naat kele chito: amaimuchi kotiiyo kiy ak inendet ne kim kosiir inendet.

¹¹ Amu mi tuguk che chang’ che tesei tangoita, ko kaigai chito eng’ nee?

¹² Ng’o anyun ne ingen kit ne mie agobo chito eng’ sobennyi, eng’ betusiek tugul che bo sobennyi ne bo buch che boisie ko u uruet? Ng’o anyun ne imuchi komwachi chito tuguk che biitu let eng’ inendet eng’ kureretab asista?