AMDOINDET 5 - BUKUIT NE TILIL

Ortinwek che bo iman che kisubi agobo gotab Jehovah

¹ Rib keldang’ung’ ye iwendi gotab Kamuktaindet; amu kaigai kerikyi si kegas, kosiir kigoite korosek che bo bik che berber; amu manaei ichek kole yaei yaitiet.

² Amat kosartae kuting’ung’, ak amat kosartae muguleldang’ung’ komwa kiy age tugul eng’ taitab Kamuktaindet; amu mi Kamuktaindet kipsengwet, ak imi ng’ony: ingong’ering’itu anyun ng’aleguk.

³ Amu nyonei karuotitoet eng’ boisionik che chang’; ak mwaei ne berber ng’alek che chang’.

⁴ Ye iarorji Kamuktaindet kaarorunet, ko mat igaege; amu mabaibaitune inendet che berberen: igoite anyun ne iarortoi.

⁵ Kaigai amearorte, kosiir iarorte amegoite.

⁶ Amengogochi kuting’ung’ bortang’ung’ koyai tengek; anan imwa eng’ taitab malaikaiyat ile, Ki lelutiet: amu nee anyun si konerekyi Kamuktaindet kuting’ung’, ak kong’em boisionikab euneguk?

⁷ Amu mi ng’alek che chang’ eng’ chang’indab karuotitaosiek ak tuguk che bo buch; ago iywei inye Kamuktaindet.

Bounatet ne korom ak magornatet

⁸ Ngot igeer kesastae kibananiat, ak keistoi kiruoget ak imanda eng’ koromnatet eng’ emet, ko mekwong’e noto: amu keerei noto inendet ne toror kosiir icheget che tororen; ak mi che tororen kosiir ichek.

⁹ Bo tugul keljinetab ng’ony: boisiechin agine laitoriat tugukab mbar.

¹⁰ Mabiyonyi feda ne chamei feda; ama biyonyi tuguk che tesoksei, inendet ne chamei chang’indab tuguk: buch nito agine.

¹¹ Ye tesak tuguk, ko tesak agichek che amei: ak tinyei keljinet nee anyun chitab kobo, kobate kogeer kityo?

¹² Anyiny ruondab chito ne boisiei, ngo am che ng’ering’ anan che chang’: ago mainuuktos magorek amu biyendanywa.

¹³ Mi yaitiet ne ng’wan ne kiageer eng’ kureretab asista, noto ko magornatosiek che ribei chitab kobo si kong’emegei:

¹⁴ ak betos magornatosiechoto eng’ boisiet ne ya; ak ngot ko kigosich werit, ko mami kiy eunnyi.

¹⁵ Ko u ye kigisichei, kowendi buch kogeny ko u ye kinyonei, ama ibei kiy ne bo boisiennyi ne imuchi kotita eng’ eunnyi.

¹⁶ Nito agine ko yaitiet ne ng’wan, amu ko u ye kinyonei, ko tun wendi ko u noto: ak nee keljinet ne nyoru inendet ne birtogei buch?

¹⁷ Amisiei kogeny eng’ betusiekyik tugul eng’ mesundeito, ak tinyei arogenet ne ng’wan, ak miando ak neregek.

¹⁸ Ogeero, kit ne mie ne kiageer, ak ko nyolu, ko koamis chi ak koee, ak kobaibaitune tuguk che miach eng’ boisiennyi tugul, ne yaei eng’ kureretab asista, eng’ betusiek tugul che bo sobennyi che kiigochi Kamuktaindet inendet: amu kebebertanyi nito.

¹⁹ Ak chi age tugul agine ne kiigochi Kamuktaindet magornatosiek ak chang’indab tuguk, ak kogochi kimnatet ne ame tukchoto, ak koib kebebertanyi, ak kobaibaitune boisiennyi; nito ko konunetab Kamuktaindet.

²⁰ Amu ma kobwati mising’ betusiekab sobennyi; amu woljin Kamuktaindet inendet eng’ boiboindab muguleldanyi.