AMDOINDET 4 - BUKUIT NE TILIL

Usisiosiek ak tuguk alak che biityin chito

¹ Kiaweege anyun ak ageer usisiosiek tugul che kiyaei eng’ kureretab asista: ak ogeero, rirekab che kigius, ama tinyei kagaigaindet; ak kitinyei kimnatet usikwak, ago kima kotinyei kagaigaindet.

² Kialosu anyun che kigobek kosiir che ta kosoptos;

³ ee, kiaiit ale, kaigai inendet ne tom kobiit, ne tom kogeer boisiet ne ya ne kiyaei eng’ kureretab asista, kosiir chugai tuwai.

⁴ Yeityo ageer boisiet tugul, ak boisiet age tugul ne bo utatiet, ale amei kimege chi agobo chitab kokwennyi. Buch nito agine ak kaiimetab ge ne bo buch.

⁵ Namjin ne berber eunekyik teget, ak koamei bortanyi.

⁶ Kaigai kererutiet koboto sisek, kosiir kererutik aeng’ ak birtoetab ge, ak kaiimetab ge ne bo buch.

⁷ Kiaweege anyun ak ageer tangoita eng’ kureretab asista.

⁸ Mi age ne mi inegei, ama tinyei ne rubei; ee, matinyei werit anan ng’etab kamet; nganda u noto, ko mami kagesunet ne bo birtoennyi bo ge tugul, ama biyonyi konyekyik magornatosiek. Len, Aboisiechini ng’o, ak arebe sobondanyu kit ne mie? Buch nito agine, ee, boisiet ne bo nyalilda.

⁹ Kaigai aeng’u kosiir agenge, amu nyoru melekto ne mie eng’ boisienywa.

¹⁰ Amu ngobutyo, kong’eeti age choruennyi: ago bwa eng’ inendet ne ibuti ko mi inegei, ama mi age ne ing’eeti inendet.

¹¹ Kogeny, ngo ruiyo aeng’u kolalang’itu: ago nyorundoi ano lalang’indo chito agenge?

¹² Ak ngoterter chito inendet ne mi inegei, komuchi aeng’u kogirinda inendet; ak ma sib kong’etei borowet ne ki soniot somok.

¹³ Kaigai nerana ne kibanania, ne ng’om, kosiir laitoriat ne os ne berber, ne manaei ko ta kotaach kateunet.

¹⁴ Amu kimong’une korgoret konyo koek laitoriat; ee, kigisichei ko kibananiat agot eng’ bounatennyi.

¹⁵ Kiageer tugul che soptos che bendoti eng’ kureretab asista, komi koboto neranet ne bo aeng’, ne kitonon kogeer inendet.

¹⁶ Kima komi kagesunetab bik tugul, agot ne bo ichek tugul che kibou: ago maboiboitune inendet ichek che biitu let. Buch nito agine iman ak kaiimetab ge ne bo buch.