AMDOINDET 3 - BUKUIT NE TILIL

Nyerotietab chito, ak chobutikab Kamuktaindet

¹ Mi boroindab kiy age tugul, ak mi betutab ng’olyot age tugul eng’ keruretab kipsengwet.

² Betut ne kisige chi, ak betut ne meei chi: betut ne kiminse, ak betut ne kitutu choto kiga kimin;

³ betut ne kibarisie, ak betut ne kinyaise; betut ne kibutisie, ak betut ne kiteekse;

⁴ betut ne kirirtos, ak betut ne kiroritos; betut ne kiteitos, ak betut ne kiurereni;

⁵ betut ne kiwirtoi koik, ak betut ne kiyumi koik; betut ne kitorochegei, ak betut ne magitorochegei;

⁶ betut ne kicheng’se, ak betut ne kibeeti; betut ne kigonori, ak betut ne kimetoi;

⁷ betut ne kigereri, ak betut ne kinabisie; betut ne kisistos, ak betut ne king’alaldos;

⁸ betut ne kichamisie, ak betut ne kiwegisie; betut ne bo luget, ak betut ne bo kalyet.

⁹ Nee keljinet ne nyoru inendet ne boisiei eng’ noto birtochingei?

¹⁰ Kiageer boisiet ne kigogochi Kamuktaindet werikab bik kotigone.

¹¹ Kigoyai kiy age tugul kogararanit eng’ betunnyi: ak kiinde mugulelwekwak kabwatetab koigeny, ago nganda u noto, ko maimuch konai chito boisiet ne kigoyai Kamuktaindet koboch taunet agoi kagesunet.

¹² Angen ale mami kit ne mie eng’ ichek kosiir koboiboitu, ak koyai ne mie kote kosoptos.

¹³ Ak kogeny konunetab Kamuktaindet konyoljin chi age tugul koamis ak koeeiso, ak kobaibait eng’ tuguk che miach eng’ birtoennyi bo ge tugul.

¹⁴ Angen ale, bunjin koigeny kiy age tugul ne yaei Kamuktaindet: magimuchi ketesyi kiy anan keistoe kiy: ak kigoyai Kamuktaindet, si koiywei bik inendet.

¹⁵ No mitei, ko kigobiit; ak no ta kobiitu, ko kigobiit: ak kocheng’ei kogeny Kamuktaindet no kigosiirto.

¹⁶ Kiageer anyun kogeny eng’ kureretab asista ale mi yaitiet oldab kiruoget; ak komi yaitiet oldab imanda.

¹⁷ Kiamwa eng’ muguleldanyu ale, Tun iruokyin Kamuktaindet bik che bo iman ak che yaach: amu mi betut ne bo ng’olyot age tugul, ak ne bo boisiet age tugul.

¹⁸ Kiamwa eng’ muguleldanyu ale, Bo werikab bik ng’olyondoni, si kobiit kotiem Kamuktaindet ichek, ak kogeergei icheget kole u tiong’ik.

¹⁹ Amu kit ne nyoru werikab bik konyoru tiong’ik; nyoru kit agenge tugul: ko u ye meei age, ko u noto, meei age agine; ee, tinyei tugul kabuset agenge; ama tinyei chito etunatet kosiir tiong’ik; amu buch tugul.

²⁰ Bendi tugul komosta agenge: bo tugul ng’ung’unyek, ak ketyingei tugul ng’ung’unyek.

²¹ Ng’o ne ingen tamirmirietab chito ngo wendi barak, ak ngo wendi ng’ony ne bo tiondo?

²² Kiageer anyun ale, mami kiy ne mie, kosiir kobaibait chito eng’ boisionikyik: amu noto kebebertanyi: amu ng’o ne weechi kogeny inendet kogeer tuguk che biitu let?