AMDOINDET 2 - BUKUIT NE TILIL

Kergei talbisto ak boisiet, matlei kiy

¹ Kiamwa eng’ muguleldanyu ale, Ara anyun, atiemin eng’ boiboiyet; baibaitu anyun eng’ kiy ne mie: ak keero, buch nito agine.

² Kiamwa agobo roriot ale, Iywek: ak agobo boiboiyet, ale, Yaei nee?

³ Kiasiach eng’ muguleldanyu ole aboiboititoi bortanyu eng’ divaik, kondoiywa muguleldanyu eng’ ng’omnatet, ak ole anamdoi berberindo, kot amuch ageer kit ne nyoljin werikab bik koyai eng’ kureretab kipsengwet eng’ betusiekwak tugul.

⁴ Kiayachige boisiosiek che eechen; kiateekyige gorik; kiaminjige sabibuk;

⁵ kiabatyige mbarenik ak achob ole kiuure, ak kiaminji yoto ketik che bo logoek alak tugul.

⁶ Kiayachige tamboinik, si kobiit abise osnet ne kigiminji ketik.

⁷ Kiaal otwogik che murenik ak che tibik, ak kiatinye otwogik che kigisikyi gonnyu; kiatinye kogeny akwotisiek che chang’ che bo tuga ak che bo kechirek, kosiir tugul che kiindounena eng’ Jerusalem.

⁸ Kiayumjige kogeny feda ak tahabu, ak konoraik che kororon che bo laitorinik ak che bo emotinwek: kialewenjige tienik che murenik ak che kwonyik, ak boiboiyosiekab werikab bik, chebaigeinik che chang’.

⁹ Kia o anyun, ak kiatesage asiir tugul che kiindounena eng’ Jerusalem: ak kiatepte ng’omnatennyu.

¹⁰ Ak kima aete konyekyuk kiy age tugul ne kimach: ma aete muguleldanyu boiboiyet age tugul, amu kibaibait muguleldanyu eng’ boisiennyu tugul; ak ki nito kebebertanyu eng’ boisiennyu tugul.

¹¹ Kiageer anyun boisionik tugul che kiayai, ak boisiet ne kiga abirtochige ayai: ak ogeero, buch tugul ak kaiimetab ge ne bo buch, ak kima komi keluno eng’ kureretab asista.

¹² Kiawelelge anyun acheng’ ng’omnatet, ak iywek ak berberindo: nee ne imuchi koyai chito ne isubu laitoriat? Kobate noto ne kigeyai.

¹³ Kiageer anyun ale siirei ng’omnatet berberindo, ko u ye siirei lapkeiyet mesundeito.

¹⁴ Tinyei konyek che keertoe ne ng’om, ak wendoti ne berber eng’ mesundeito: agot eng’ choto ko kiageer ale ityin kit agenge ichek tugul.

¹⁵ Kiale anyun eng’ muguleldanyu, Ko u ye ityin kioto ne berber, koityina agane; ak amu nee anyun si ang’omit kosiir? Kiamwa anyun eng’ muguleldanyu ale buch nito agine.

¹⁶ Amu magibwati ne ng’om agoi, ko u ye magibwati ne berber; amu tun kiutie tugul eng’ betusiek che bwanei. Meei ne ng’om agine ko u ne berber!

¹⁷ Kiawech anyun sobet amu kigona ng’wanindo boisiet ne kiyaei eng’ kureretab asista: amu buch tugul ak kaiimetab ge ne bo buch.

¹⁸ Ak kiawech boisiennyu tugul ne kiabirtochige eng’ kureretab asista: amu eng’ ne matiny, ametochini chito ne isubwa.

¹⁹ Ak ng’o ne ingen ngo tun egu chito ne ng’om anan ko ne berber? Nganda u noto, ko tun bou boisiennyu tugul ne koabirtochige, ak ne abartae ng’omnatet eng’ kureretab asista. Buch nito agine.

²⁰ Kiawelelge anyun ak agochi muguleldanyu koarogen amu boisiet tugul ne kiabirtochige eng’ kureretab asista.

²¹ Amu mi chito ne yaei boisiennyi eng’ ng’omnatet, koboto naet, ak utatiet; ago bagakyin koek kebebertab chito ne ma birtochigei boisiet. Buch nito agine ak ko yaitiet ne o.

²² Nee ne nyoru chito eng’ birtoennyi bo ge tugul, ak kaiimetab ge ne bo muguleldanyi, ne birtochingei eng’ kureretab asista?

²³ Amu bo arogenet betusiekyik tugul, ak ko bo ng’wanindo boisiennyi; ee, maimuunyi muguleldanyi kemoi. Buch nito agine.

²⁴ Mami kit ne kaigai eng’ chito kosiir koamis ak koeeiso, ak kobaibae sobondanyi tuguk che miach eng’ birtoennyi bo ge. Kiageer kogeny ale bunu nito eutab Kamuktaindet.

²⁵ Amu ng’o ne imuchi koamis, ng’o ne imuchi konyor boiboiyet, kosiira?

²⁶ Amu igochin Kamuktaindet ng’omnatet, ak naet, ak boiboiyet chito ne iboiboi inendet: ago igochin kiptengekyot boisietab nyalilda, si kobiit koyum ak kotes, ak kogochi inendet ne iboiboi Kamuktaindet. Buch nito agine ak ko kaiimetab ge ne bo buch.