AMDOINDET 12 - BUKUIT NE TILIL

Kalilet ak meet

¹ Ibwat kogeny Yaindeng’ung’ eng’ betusiekab ming’inateng’ung’, kotom koit betusiek che yaach, ak korik kenyisiek che imwae ile, Mabaibaitune chuto;

² kotom koimenit asista, anan lapkeiyet, anan arawet, anan kecheik, ak koweek bolik ye kagorobon;

³ eng’ betut ye tun botanso ribikab got, ak kong’urugis che kimen ak kosisyo che ng’aisei amu ng’ering’, ak koimenitu che ititoi eng’ tirisiok,

⁴ ak keger kurgotik eng’ oret, ye ma kegasei mising’ ng’aiset, ak kong’eet chito eng’ kateetab taritiet, ak koming’in tibik tugul che bo tienwogik;

⁵ ee, iywei ichek noto toror, ak kobiit kamuiset eng’ oret; ak koiyesio taptokab ketit ne kiguure almond, ak konyigisit talamwet, ak kobet maget: amu wendi chito gonnyi ne bo koigeny ak kobendat che ririoti eng’ ortinwek:

⁶ kotom kitaach borowetab feda, anan kotom ketui teretab tahabu, anan kotom koiye teret eng’ kondametut, anan kotom koil cheptiret eng’ ole kisiile beek,

⁷ ak koweekyigei ng’ung’unyek ng’ony ko u ye kinye, ak koweekyigei sobondo Kamuktaindet ne kigonu.

⁸ Mwaei Amdoindet kole, Buch, matilei kiy; buch tugul.

Ng’alek che kigesune

⁹ Ago, amu ki ng’om Amdoindet, kita koneti bik naet; ee, kiibwat, ak kocheng’, ak kotet kalewenaik che chang’.

¹⁰ Kicheng’ Amdoindet ng’alek che taachaksei, ak choto che kigisir eng’ lititindo ng’alek che bo iman.

¹¹ U kiplitok ng’alekab bik che ng’omen, ak u kipchumarisiek che kigigiich komie, ng’alekab konetikab tuiyosiek, che kigigon kobun mestowot agenge.

¹² Kas anyun werinnyu kateunet: mami ole igesunegei siretab bukuisiek che chang’: ak ng’etei borto eng’ somanosiek che chang’.

¹³ Kagesunetab tuguchu ni; kagogasak tugul: iywei Kamuktaindet ak irib ng’atutikyik; amu nyoljin chito boisionito tugul.

¹⁴ Amu ipchin Kamuktaindet boisiet age tugul oldab kiruoget, koboto kit age tugul ne ung’at, ngo kiy ne mie anan ngo ne ya.