AMDOINDET 11 - BUKUIT NE TILIL

Ng’alekab ole kanyol kotepto chi si kiberur eng’ sobennyi

¹ Wirji amitwogiguk beek; amu tun inyoru ko kagosiirto betusiek che chang’.

² Igochi kebeberta bik tisab, ee bik sisiit; amu mengen yaitiet ne biitu eng’ ng’ony.

³ Ngo nyi ropta bolik, korong’jigei ng’ony: ak ngo lulji ketit murot ne bo tai, anan ko murot ne bo katam, ko komosta ne kalulji, kotebe yoto.

⁴ Magolsei inendet ne ribei usonet; ama kesei inendet ne keerei bolik.

⁵ Ko u ye mengen oretab usonet anan ole nertoi kowekab lakwet eng’ moetab inendet ne managat; u noto mengen boisietab Kamuktaindet ne yaei tuguk tugul.

⁶ Kolse karon, amesis koskoleny: amu mengen che rurtos, ngo ni anan ni, anan ngo miagitu tuwai.

⁷ Anyiny iman lapkeiyet, ak kit ne kararan asista kegeerei.

⁸ Ee, ngo sob chito kenyisiek che chang’, ingobaibait eng’ choto tugul; ago ingobwat inendet betusiekab mesundeito, amu chang’. Buch tugul che bwanei.

⁹ Ee, baibaitu murenoni, eng’ betusiekab ming’inateng’ung’; ak ingobaibain muguleldang’ung’ eng’ betusiekab ming’inateng’ung’, ak isub ortinwekab muguleldang’ung’, ak ko u ye igeere: ago nai ile, imutyinin Kamuktaindet kiruoget amu tuguchuto tugul.

¹⁰ Iste anyun arogenet eng’ muguleldang’ung’, ak iste yaitiet eng’ bortang’ung’: amu buch betusiekab ming’inateng’ung’ ak che bo nerateng’ung’.