AMDOINDET 10 - BUKUIT NE TILIL

Kalewenaik che biitune sobetab chito

¹ Buldos mwanik che anyiny che bo ng’omotiot, ne buruchi tuguk che ng’uu ne anyiny, amu kalyang’ik che bekyin: ko u noto agine ng’emei berberindo kitigin ng’omnatet ak teegisto.

² Mi muguleldab chito ne ng’om eunnyi ne bo tai; ago mi muguleldab ne berber eunnyi ne bo katam.

³ Ee, ye wendoti ne berber eng’ oret, kobetyi ng’omnatet inendet, ak kolenjinoti chito age tugul, A berber.

⁴ Ngot kolaljin neregekab bounindet, ko mat iwe eng’ yetang’ung’ ye kemi; amu tisei talasiet tengekwogik che eechen.

⁵ Mi yaitiet ne kiageer eng’ kureretab asista, ne u lelutiet ne bunu bounindet:

⁶ kindoi berberindo komoswek che tororen, ak tebyei magorek eng’ ole bo ng’ony.

⁷ Kiageer otwogik kolanyei mbartanyisiek, ak kobunei kelyek bounik ko u otwogik eng’ ng’ony.

⁸ Inendet ne balei keringet kobutyin yoto; ak age tugul ne butei ng’otwet kosusei erenet.

⁹ Iberjin koik chi age tugul ne waei; imuchi kokwer kwendet inendet ne betei.

¹⁰ Ngo ng’utum karnet, ama lit chi, ko kanyol kobirtogei ne ebei: ago mie ng’omnatet eng’ kandochinet.

¹¹ Ngot kosusis erenet kotom kigaigai, ko ma ko tilei kiy kagaigaet.

¹² Miachen ng’alekab chito ne ng’om; ago luguegei kutitab chito ne berber.

¹³ Berberindo taunetab ng’alekyik: ak kagesunetab ng’alalennyi ko iywek che ng’emisiei.

¹⁴ Tesei kogeny ne berber ng’alek: ago manaei chi kit ne biitu; ak ng’o ne mwachin inendet tuguk che biitu let eng’ inendet?

¹⁵ Boisietab che berber kogochin age tugul eng’ icheget kong’et, amu manaei inendet ole wetitoi nganaset.

¹⁶ Bwa eng’ inye, ee emet, ye ta ko ming’in laitoriandeng’ung’ ak ye amisiei bouniguk kota ko karon!

¹⁷ Ibaibai inye, ee emet, ye laitoriandeng’ung’ ko weritab bik che toogunotin, ye amisiei bouniguk eng’ sait ne nyolu, si kogimegitu, ama eng’ bogitet!

¹⁸ Kabuisei baragutab got amu chorirnatetab chito; robonu got amu chorirnatet.

¹⁹ Kiyaei igorta agobo roriot, ak iboiboi divaik sobondo: ak imuchi fedaisiek koyai tuguk tugul.

²⁰ Amesas laitoriat, agot eng’ kabwatutiguk; amesas magoriot eng’ gong’ung’ ne irue: amu ibei tarit ng’olyot, ak mwaitoi che tinyei kebebaik ng’alek.