AMDOINDET 1 - BUKUIT NE TILIL

Buch tugul

¹ Ng’alekab Amdoindet, weritab Daudi, ne ki laitoriat eng’ Jerusalem.

² Mwaei Amdoindet kole, Buch, matilei kiy, buch, matilei kiy; buch tugul.

³ Nee keljinet ne nyoru chito eng’ boisionikyik tugul che yaei eng’ kureretab asista?

⁴ Siirtoi ibinda age, ak konyonei age; ak tebyei ng’ony koigeny.

⁵ Choru kogeny asista, ak kororoktoi, ak choktoi kowendi ole chorune.

⁶ Usyin usonet murot ne bo tai, ak koweek kwo murot ne bo katam; weechegei kotugul eng’ ole bunoti, ak koweeksei kogeny eng’ ole boch yiemutikyik.

⁷ Rootyin ainosiek tugul nyanjet, ago manyiiei nyanjet; ole rootyin ainosiek, ko oloto ole weekyingei kogeny.

⁸ Ng’etos tuguk tugul; maimuchi chi komwa: mabiyonyi konda che keerei, anan konyi itit che kasei.

⁹ Noto ne kigobiit, ko noto ne ta kobiitu; ak noto ne kigeyai ko noto ne ta keyaei: ama mi kiy ne taunen eng’ kereretab asista.

¹⁰ Tos mi kiy ne mwaei bik kole, Keer, tos ma taunen ni? Kimi noto koboch keny, kotom kebiitu.

¹¹ Mami kabwato agobo ibinwek che bo tai; ama kibwati ibinwek che bo let che ta kobwanei, eng’ choto che ta kobiitu.

¹² Kia laitoriat eng’ Jerusalem ane Amdoindet.

¹³ Ak kiagiil muguleldanyu kocheng’ ak kosiach eng’ ng’omnatet agobo tuguk tugul che kiyaei eng’ kureretab kipsengwet: kiigochi Kamuktaindet werikab bik boisiet ne bo nyalilda kotigone.

¹⁴ Kiageer boisionik tugul che kiyaei eng’ kureretab asista; ak ogeero, buch tugul, kaiimetab ge ne bo buch.

¹⁵ Magimuchi kilitit kit ne kunur: ama kimuchi kiit ne mami.

¹⁶ Kiamwachi muguleldanyu alenji, Keero, koanyoru ng’omnatet ne o kosiir tugul che kiindounena eng’ Jerusalem: ee, kigogeer mising’ muguleldanyu ng’omnatet ak naet.

¹⁷ Ak kiagiil muguleldanyu konai ng’omnatet, ak konai iywek ak berberindo: kiageer kogeny ale kaiimetab ge buch nito.

¹⁸ Amu mi arogenet ne o ng’omnatet ne o: ak tesei arogenet inendet ne tesei ng’omnatet.