3 JOHANA 1 - BUKUIT NE TILIL

Nyalilda ne mi kaniset orit

¹ Ane boiyot ne asirjini Gaio chamanet, ne achame eng’ imanit.

² Chamanani, asae ale iberuroge komie eng’ tuguk tugul ak itepte chametab ge, ko u ye iberurot sobondang’ung’.

³ Amu kiabaibaitu mising’ kingobwa che ketupche kobaorian agobo imaning’ung’, ko u ye iwendote imanit.

⁴ Matinye boiboiyet age ne siirei ni, ye agase kele bendoti lagokyuk eng’ imanit.

⁵ Chamanani, iyae boisietab iman eng’ kit age tugul ne iyae agobo tupchosiek ak toek;

⁶ che baoriani agobo chamnyeng’ung’ eng’ kaniset: iyae ne mie ye iyomisi eng’ bandanywa ko u ye nyolu eng’ Jehovah:

⁷ amu kiba ichek agobo Kainet, ama ib kiy eng’ Bororiosiek.

⁸ Noto anyun kanyoljech ketaach che u ichek, si kobiit keegu che kiboisiei koboto ichek eng’ imanit.

⁹ Kiasirji ng’olyo kaniset: ago ma taachech Diotrepe, ne chamei koek ne o eng’ kwenunywa.

¹⁰ Ko noto anyun, ngot anyo, anyone abwati boisionikyik che yaei; mwaei ng’alek che yaachen che bo buch agobo achek: ama yamei choto, mataachei inendet tupchosiek, ak koete ichek che machei kotaach, ak koonei eng’ kaniset.

¹¹ Chamanani, amesub yaitiet, ago isub ne mie. Inendet ne yaei ne mie ko bo Jehovah: inendet ne yaei yaitio ko tom kogeer Jehovah.

¹² Kigobaorian bik tugul agobo Demetrio, ak kobaoriani imanit agine: ee, kibaoriani agachek; ak ingen ile bo iman baornatennyo.

¹³ Katinye tuguk che chang’ che katasirun, ago mamache asirunenen wino ak kalamit:

¹⁴ ago amang’u ageerin ko negit, ak keng’alal togoch eng’ togoch. Ingoteb kalyet koboten. Igatin choronok. Igat choronok eng’ kainaikwak.