2 TIMOTEO 4 - BUKUIT NE TILIL

¹ Kang’atin anyun eng’ taitab Jehovah, ak Kristo Jesu, ne tun iruokyin che soptos ak che kigobek, ak eng’ toogunennyi ak eng’ bounatennyi;

² amde ng’olyot; choboge eng’ betut ne nyolu, ak eng’ betut ne ma nyolu; itigon, ker kong’, igiil, eng’ muitaet tugul ak konetisiet.

³ Amu nyonei betut ne ma tun epchin it agot kitigin konetisiet ne bo imanit; ago, tinyei itik che iututos, iyumjingei konetik che isubi magutikwak;

⁴ ak koesio koepchi it imanit, ak komasta kosub atindonik che bo buch.

⁵ Ago ripge inye eng’ tuguk tugul, muite eng’ nyalilda, yai boisietab amdaetab logoiywek che miach, yai boisieng’ung’ kosulda.

⁶ Amu kigoitoa nguno, ak kagoit betusiek che awendi.

⁷ Kiayai luget ne mie, kaagesu labatet, kiarib kayanet:

⁸ koboch nguno ko kagegonorua kutwet ne bo imanda, ne tun kona Kiptaiyat, kiruogindet ne bo imanda, eng’ betunoto: ago ma anege, ago icheget tugul agichek che kigocham toogunennyi.

Ng’alek che bunu Paulo inegei, koboto saisere

⁹ Igiilge nyonja ko negit:

¹⁰ amu kigobagakta Dema, ko kagocham ng’onyuni bo betusiechu, ak kwo Tesalonika; kwo Kreske Galatia, kwo Tito Dalmatia.

¹¹ Luka inegei ne mi kobota. Imutu Mariko, ak obwa tuwai: amu toreta eng’ boisiet.

¹² Ago kiayokte Tukiko kwo Epeso.

¹³ Ye inyo iibu sumet ak bukusiek, ago ne siirei ko magatok che kisirei che kiabagakyi Karpo eng’ Troa.

¹⁴ Kiyaiywa ne ya mising’ Aleksandro, kitong’oindet ne bo sugunoik: tun yaakyin Kiptaiyat ko u boisionikyik:

¹⁵ ribege inendet; amu kigirinda ng’alekyok mising’ kot.

¹⁶ Ma biit chi ne kitoreta eng’ wolunennyu ne bo tai; kibagakta tugul: amat kiityi ichek ng’olyondonito.

¹⁷ Ago kitonon Kiptaiyat kobota, ak kogimita; si kobiit keamda eng’ ane ng’alek komie, ak si kogas Bororiosiek tugul: ak kigisorua eng’ kutitab ng’etundo.

¹⁸ Sorua Kiptaiyat eng’ boisiet age tugul ne ya, ak kosorua agoi ait bounatennyi ne bo kipsengwet: nenyi torornatet koigeny ak koigeny. Amen.

¹⁹ Igat Priska ak Akula, ak bikab Onesiporo.

²⁰ Kitebi Erasto eng’ Korinto: ago kiabagach Tropimo eng’ Mileto komiani.

²¹ Igiilge nyo kotom koit betusiek che bo kaititiet. Igatin Eubulo, ak Pude, ak Lino, ak Klaudia, ak tupchosiek tugul.

²² Ingoteb Kiptaiyat koboto tamirmirieng’ung’. Ingoteb mieindo kobotok.