2 TIMOTEO 3 - BUKUIT NE TILIL

Yaitwogik che ta koitu

¹ Ago nai ni ile bwanei eng’ betusiek che bo let egosiek che bichien.

² Amu egu bik che chamegei ichegei, che chamei siling’isiek, che ichaugei, che mendos, che boisie chemereret, che ingeleljin sigikwak, che matinyei kongoi, che ma tililen,

³ che matinyei chamnyet, che matinyei nyoetab kaat, che itaamsei, che maribegei, che kolgolen, che machamei che miach,

⁴ ng’wektoik, ngelelik, che ilosugei, che chamei ureriet kosiir koek che chamei Jehovah;

⁵ che tinyei kergeindab kaiyweet ne kiywei Jehovah, ago esioi kimnatet ne bo kaiyweonato: istoege chuto agichek.

⁶ Amu biitune chuto che itoti gorik, ak koluul kobogorisiek che berber che tinyei chalwogik che chang’, che indochin magutik che terotin.

⁷ Che inetegei kotugul, ago magoi imuch koityi naetab imanit.

⁸ Ak ko u Janne ak Jambre, che kigirinda Musa, koyaei chu agichek ko u noto, kirindoi imanit; bik che kigong’emogis ng’omnatosiekwak, che betyotin eng’ oretab kayanet.

⁹ Ago matesei tai: amu toogu berberindanywa eng’ bik tugul, ko u ne bo chugai agichek.

Ng’alek che sorunegei Timoteo

¹⁰ Ago kiisub inye konetisiennyu, atebet, kit ne atokyinige, kayanet, mutyonet, chamnyet, muitaet,

¹¹ usisiosiek, nyalilwogik; tuguchoto che kibwanja eng’ Antiokia, ak Ikonia, ak Lustra; kiamuite eng’ usisiosiechoto tugul: ak kisorua Kiptaiyat eng’ choto tugul.

¹² Ee, tugul che machei kotebi eng’ atebet ne mie eng’ Kristo Jesu, konyoru usisiet.

¹³ Ago tesoksei kiptengeginik ak kenik eng’ yaitiet, koberberisiei ak kiberberi.

¹⁴ Ago tebi inye eng’ tuguk che kiinetge, ak che kigiguiyeun, ingen icheget che kiinetege;

¹⁵ ak koboch ko i lakwa ko kiingen sirutik che tililen che imuchi kong’omitin agoi yetunet eng’ kayanet ne mitei eng’ Kristo Jesu.

¹⁶ Bunu kabusetab Jehovah sirutiet age tugul, ak kotoreti eng’ konetisiet, eng’ kergong’iet, eng’ kateechinet, eng’ kotigonet ne mi eng’ imanda:

¹⁷ si kobiit koek chitab Jehovah, ne inetat, ne kigichob koek ne ititaat eng’ boisiet age tugul ne mie.