2 TIMOTEO 2 - BUKUIT NE TILIL

¹ Kimitu anyun, lakwennyu, eng’ mieindo ne mitei eng’ Kristo Jesu.

² Ak tuguk che kiigasena eng’ kwenutab baorinik che chang’, igochi choto bik che kiyani, che imuchi konet alak agichek.

³ Nam yamdaet ne bo nyalilda, ko u askarindet ne mie ne bo Kristo Jesu.

⁴ Mami askarindet, ne ngo mi boisiet, koratyingei tuguk che bo ng’ony; si kobiit kobaibai ne kisirei inendet koek askarindet.

⁵ Ak ngot koyai chi agine kabeletab ge eng’ ureriosiek, ko magigochin kutwet, ngo ma ibelis ko u ye mwaei ng’atutik.

⁶ Nyoljin kabatindet ne yaei boisiet ne uui, kosib kotongoi logoek.

⁷ Ruchi komie kit ne amwae; amu konin Kiptaiyat kaguiyet eng’ tuguk tugul.

⁸ Ibwat Jesu Kristo, ne king’eet eng’ che kigobek, ne bo keswekab Daudi, ko u logoiywekyuk che miach:

⁹ ne anyorune nyalilda, agoi monjorornatosiek; ko u chito ne yaei yaitio; ago ma ratat ng’olyotab Jehovah.

¹⁰ Noto anyun amuitoi eng’ tuguk tugul amu che kigilewen, si kobiit konyor agichek yetunet ne mitei eng’ Kristo Jesu koboto torornatetab koigeny.

¹¹ Bo iman ng’olyondoni: Amu ngo kigebegu koboto inendet, kesoptosi koboto inendet:

¹² ngemuite, ko tun kibou koboto inendet: ngot keesie inendet, ko tun esioech agine:

¹³ ngo ma ki bo iman, kotebyei inendet eng’ iman; amu maimuchi koesiogei.

Kiteechin bik si masikigei ng’al

¹⁴ Ibwatyi ichek tuguchuto, ng’at ichek eng’ taitab Kiptaiyat, si maibelgei agobo ng’alek, che magisige kiy, che ng’emei ichek che kasei.

¹⁵ Igiilgei ibartege ile kigoyanun Jehovah iegu kiboitiot ne manyol kolilan, ne boisie komie ng’olyotab imanit.

¹⁶ Istoege ng’alek che manamegei ak oretab Jehovah: amu tesoksei koyaagitu kosiir eng’ yaitiet,

¹⁷ ak amei ng’olyondenywa ko u chepsergechet: eng’ ichek ko Humenayo ak Pileto;

¹⁸ bik che kigochiliil eng’ imanit, mwaei kole kigosiirto ng’eetyet, ak koweleli kayanetab bik alak.

¹⁹ Ago tononi lumeiywot ne kim ne bo Jehovah, kotinyei ng’oksoni kele, Ingen Kiptaiyat ichek che chechik; ak, Ingoistoegei yaitiet age tugul ne mwaei kainetab Kiptaiyat.

²⁰ Ago eng’ got ne o ko mami terenikab tahabu ak feda kityo, ago che bo ketik ak ng’ung’unyek agichek; ak bo alage teegisto, ko ma bo alage teegisto.

²¹ Ngotililgei anyun chi eng’ tuguchuto, koegu teret ne bo teegisto, ne itabanat, ne nyoljin koboisie kiptaiyat, ne kigichopchi boisiet age tugul ne mie.

²² Ago mwee magutik che bo neranik, ak isub imanda, chamnyet, kayanet, kalyet, koboto icheget che kuurei Kiptaiyat eng’ mugulelwek che tililen.

²³ Ago esie teebutik che berberen che mabunu konetisiet, ingen ile yiei boriosiek.

²⁴ Ama nyoljin otwogindetab Kiptaiyat koyai boriet, ago koek ne tala eng’ tugul, ne chepcheb konetis, ago muitoi,

²⁵ ne kere kong’ eng’ mutyonet ichek che kirindoi; tamangab kogochi Jehovah ichek sigunet ne bo naetab imanit,

²⁶ ak kosorgei ichek komong’une mestetab oindet, ko kagoluul ichek si koyai magennyi.