2 TIMOTEO 1 - BUKUIT NE TILIL

Kagatet ak kongoi

¹ Paulo, ne kiyoktoi ne bo Kristo Jesu eng’ magetab Jehovah, ko u arorutiet ne bo sobondo ne mitei eng’ Kristo Jesu,

² asirjini Timoteo, lakwennyu ne achame mising’: Ingoteb koboten mieindo, rirenetab ge, kalyet, che bunu Jehovah Kwanda ak Kristo Jesu Kiptaiyandennyo.

Komwachin bik kogiilgei ak konyiganitu

³ Amwachini Jehovah kongoi, ne aote ko u ye kiyaei kwanisiekyuk che bo tai eng’ kabwatet ne tilil, ale masisei kabwatet ne abwatin eng’ somutikyuk, kemoi ak bet,

⁴ atinye emosto ageerin, abwati beeguk bo kong’, si konyiia boiboiyet;

⁵ ye kingibwatwa kayanet ne matinyei kenisiet ne mi eng’ inye; ne kimenyei korok eng’ ingogo Lois, ak komet Eunike; ak, ayani ale menyin aginye.

⁶ Abwatun anyun amu nito ale iyuokyi konunet ne bo Jehovah, ne mi eng’ inye amu kagonooretab eunekyuk.

⁷ Amu kima konech Jehovah tamirmirietab nyogoriet, ago ne bo kamuget ak chamnyet ak ribetab ge.

⁸ Amelilanji anyun baornatetab Kiptaiyandennyo, anan ane kimonjororiondennyi: ago nam yamdaetab nyalilwogik amu logoiywek che miach ko u ye te kamuktaetab Jehovah;

⁹ ne kisoruech ak koguurech eng’ kuurset ne tilil, ma ko u boisionikyok, ago ko u magennyi ak mieindanyi, ne kigigonech eng’ Kristo Jesu koboch kenyisiekab koigeny,

¹⁰ ago kagotook nguno eng’ toogunetab Yetindennyo Kristo Jesu, ne kigobar meet, ak kong’any sobondo ak ng’emisiet ne ma komi, eng’ logoiywek che miach,

¹¹ kigindea agobo noto aek amdoindet, ak ne kiyoktoi, ak konetindet.

¹² Anyoru anyun nyalilwogichu agichek agobo noto: ago malilani; amu angen inendet ne kiayan, ak ayani komie ale imuchi korib noto ne kiagochi inendet agoi betunoto.

¹³ Nam itondab ng’alek che bo iman che kiigasena, eng’ kayanet ak chamnyet ne mitei eng’ Kristo Jesu.

¹⁴ Rib eng’ Tamirmiriet ne Tilil ne menyei eng’ achek, noto mie ne kigigonin.

¹⁵ Ingen ni ile, kigoistoenagei tugul che mi Asia; eng’ ichek ko Pugelo ak Hermogene.

¹⁶ Ingogochi Kiptaiyat rirenet gotab Onesiporo: amu kitoreta konyil che chang’, ama ililan amu monjororinnyu;

¹⁷ ago, ye kingomi Rom, kocheng’a eng’ kagiiletab ge, ak kinyorua,

¹⁸ (ingogochi Kiptaiyat inendet konyor rirenet ne bo Kiptaiyat eng’ betunoto;) ak ingen komie ole te boisiet ne kiyai eng’ Epeso.