2 SAMUEL 9 - BUKUIT NE TILIL

Kotoreti Daudi Mepiboset

¹ Ak kile Daudi, Mi chi ne king’et eng’ gotab Saul, si kobiit ayachi ne mie amu Jonatan?

² Ak kimi eng’ gotab Saul otwogindet ne kigiguure kainennyi Siba, ak kigiguur kwo ole mi Daudi; kilenji laitoriat, I Siba? Ak kile, A inendet, ane otwogindeng’ung’.

³ Ak kile laitoriat, Tos ma komi chi eng’ gotab Saul, si kobiit ayachi inendet mieindab Kamuktaindet? Ak kilenji Siba laitoriat, Ta kotinyei Jonatan werit ne yaachen kelyekyik.

⁴ Ak kilenji laitoriat inendet, Mi ano? Ak kilenji Siba laitoriat, Keero, mi gotab Makir weritab Amiel, eng’ Lo-debar.

⁵ Kiiyokto anyun Daudi kimut inendet konyo eng’ gotab Makir weritab Amiel, eng’ Lo-debar.

⁶ Ak kinyo ole mi Daudi Mepiboset, weritab Jonatan weritab Saul, ak kobutyi ng’ony, kogutung’ji. Ak kile Daudi, Mepiboset. Ak kiwol kole, Keer otwogindeng’ung’!

⁷ Ak kilenji Daudi inendet, Ameiywei: amu ayaun ne mie iman agobo Jonatan kwandang’ung’, ak iamisie mesennyu kotugul.

⁸ Ak kiing’uruk, ak kole, Nee otwogindeng’ung’, kot igeer seset ne kigome ko u ane?

⁹ Kiguur anyun laitoriat Siba otwogindetab Saul, ak kolenji inendet, Kaagochi weritab kiptaiyandeng’ung’ tuguk tugul che ki bo Saul ak gonnyi tugul.

¹⁰ Ak ibatyi emet inye, ak weriguk, ak otwogiguk; ak iibu bek kobwa go, si kobiit konyor weritab kiptaiyandeng’ung’ amitwogik che amei: ago amisie mesennyu kotugul Mepiboset weritab kiptaiyandeng’ung’. Kitinyei Siba werik taman ak mut ak otwogik tiptem.

¹¹ Kolenji anyun Siba laitoriat, Ayae ko u tugul che ng’ata kiptaiyandennyu laitoriat ane otwogindennyi. Ago kile laitoriat, Amisie mesennyu Mepiboset, ko u age eng’ werikab laitoriat.

¹² Ak kitinye Mepiboset werit ne ming’in, ne kigiguure kainennyi Mika. Ak bik tugul che kimenyei gotab Siba ko ki otwogikab Mepiboset.

¹³ Kimeny anyun Mepiboset Jerusalem: amu kiamisie kotugul mesetab laitoriat; ak kiing’wali eng’ kelyekyik tuwai.