2 SAMUEL 8 - BUKUIT NE TILIL

Katarterisiosiekab Daudi ak kiboitinikyik

¹ Ak kingobata nito kobar Daudi Pilistik ak koterter ichek: ak kireb Daudi Metegama eng’ eunekab Pilistik.

² Ak kibar Moab, ak kiikwa ichek eng’ borowet, king’at koruiyo eng’ ng’ony, ak kiikwa eng’ boroonik aeng’ bik che kibarei kobek, ak kichamji kosopcho che bo borowet ne nyiitat. Ak kiek Moabik otwogikab Daudi, ak kiib kagochinoik.

³ Kibar kogeny Daudi Hadadeser weritab Rehob, laitoriatab Soba, ye kiwendi koweechi bounatennyi kogeny eng’ Ainet.

⁴ Ak kirebe Daudi inendet murenik elfut agenge ak bogol tisab che kilanyei mbartanyisiek, ak elfusiek tiptem che kibunei kelyek: ak kieb Daudi kutung’oikab mbartanyisiek tugul che kiichuuti karisiek, ago kiituch eng’ choto che yamei karisiek bogol.

⁵ Ak kingobwa Suriekab Damasko kotoret Hadadeser laitoriatab Soba, kobar Daudi bik elfusiek tiptem ak aeng’ eng’ Suriek.

⁶ Kiinde anyun Daudi irimosiek Suria ne bo Damasko: ak kiek Suriek otwogikab Daudi, ak kiib kagochinoik. Ak kiigochi Jehovah Daudi katerteret eng’ komosta age tugul ne kiwa.

⁷ Ak kiib Daudi long’onikab tahabu che kitinyei otwogikab Hadadeser ak kiib kobwa Jerusalem.

⁸ Ak kiib laitoriat Daudi sugunonik che chang’ mising’ eng’ Beta ak eng’ Berotai, nganasokab Hadadeser.

⁹ Ak kingogas Toi laitoriatab Hamat kole kogobar Daudi luget tugul ne bo Hadadeser,

¹⁰ koyokto anyun Toi Joram werinnyi, kwo oldab laitoriat Daudi, kwo kogat inendet ak koberur, amu kiga kobargei ak Hadadeser ak kibar inendet: amu kibargei Hadadeser ak Toi. Ak kiib Joram terenikab feda, ak terenikab tahabu, ak terenikab sugunonik:

¹¹ kiitabanji Daudi Jehovah tuguchuto agichek, koboto feda ak tahabu che kiga kotaban eng’ bororiosiek tugul che kiga koterter;

¹² che bo Suria, ak che bo Moab, ak che bo lagokab Amon, ak che bo Pilistik, ak che bo Amalek, ak che barunenikab Hadadeser, weritab Rehob, laitoriatab Soba.

¹³ Ak kieet kainetab Daudi ye kiweeksei kobunu baret ne kibarei Suriek eng’ Atebwetab Munyuk, ole kibare murenik elfusiek taman ak sisiit.

¹⁴ Ak kiinde irimosiek Edom; kiinde irimosiek Edom komugul, ak kiek Edomik tugul otwogikab Daudi. Ak kiigochi Jehovah Daudi katerteret eng’ komosta age tugul ne kiwa.

¹⁵ Ak kilaitoran Daudi eng’ Israel tugul; ak kiiruokyi Daudi bikyik tugul eng’ lititindo ak iman.

¹⁶ Ak kibou Joab weritab Seruia luget; ak ki sirindetab tuguk che biitu, Jeosapat weritab Ailud:

¹⁷ ak ki tisiik Sadok weritab Aitub ak Aimelek weritab Abiatar; ak ki sirindet Seraia:

¹⁸ ak kibou Benaia weritab Jeoiada Keretik ak Peletik; ak ki tisiik werikab Daudi.