2 SAMUEL 7 - BUKUIT NE TILIL

Ma kichamji Daudi ng’olyondennyi ne kimachei koteech hekalut

¹ Ak ye kingomeny laitoriat gonnyi, ak kogochi Jehovah inendet kamuung’et eng’ bunikyik tugul che kimi eng’ komoswek tugul,

² kolenji laitoriat Natan maotiot, Keero, amenye gotab taragonik, ago menyei moingetab Kamuktaindet angok orit.

³ Ak kilenji Natan laitoriat, Ui, ak iyai tugul che mi muguleldang’ung; amu mi Jehovah koboten.

⁴ Ak kiityi Natan ng’olyotab Jehovah kemounoto, kolenji,

⁵ Ui imwachi otwogindennyu Daudi, ilenji, Kamwa ko u ni Jehovah, Iteekwa got ne amenye?

⁶ Amu tom ameny go koboch betut ne kiamutu lagokab Israel eng’ Misri, agoi betuni, ago kiawendote emait ak gotab moinget.

⁷ Eng’ komoswek tugul ole kiawendate ak lagok tugul che bo Israel, ko tos kiamwachi ng’olyo age eng’ ortinwekab Israel che kiang’at kobai bikyuk Israel, alenji, Amu nee si ma oteekwa got ne bo taragonik?

⁸ Ara anyun, imwachini otwogindennyu Daudi ko u ni, ilenji, Kamwa ko u ni Jehovah ne bo lugosiek kole, Kiamutun eng’ biutab kechirek, eng’ kayagetab kechirek, si kobiit iegu bounindet eng’ bikyuk, ibou Israel:

⁹ ak kiatebi koboten eng’ oldo tugul ole kiiwe, ak kiaiste buniguk tugul eng’ taing’ung’; ak aeeti kaineng’ung’, ko u kainetab bik che eechen eng’ ng’ony.

¹⁰ Ak alewenjini yeto bikyuk Israel, ak amine ichek, si kobiit komeny yetanywa, ak ma kiutoi kogeny; anan ko ta konyalil ichek lagokab yaitiet kogeny, ko u eng’ tai,

¹¹ ak koboch betut ne kiang’at kiruogik koboi bikyuk Israel; ak agonin imuuny eng’ buniguk tugul. Ak mwaun Jehovah kogeny kole teegun got Jehovah.

Koberuri Jehovah logokab Daudi

¹² Ak ye igesgei betusieguk, ak oruiye ak kwanisieguk, ang’eet iyoteng’ung’ ne biitu let, ne bunu bortang’ung’, ak agimit bounatennyi.

¹³ Tun teekyin got inendet kainennyu, ak agimit ng’echeretab laitornatetab bounatennyi koigeny.

¹⁴ Aegu kwandanyi, ak koek werinnyu: ngot koyai tengekto, atigone inendet kiroktab bik, ak atigone birutikab lagokab bik;

¹⁵ ago maistoegei inendet rirenennyu, ko u ye kiarebe Saul, inendet ne kiaiste eng’ taing’ung’.

¹⁶ Ak kigimiti gong’ung’ ak bounateng’ung’ koigeny eng’ taing’ung’: kigimiti ng’echeretab laitornateng’ung’ agoi koigeny.

¹⁷ King’alalji Natan Daudi ko u ole teptoi ng’alechoto tugul, ak ko u ng’ang’utioni tugul.

Saetab Daudi ak komwaei kongoi

¹⁸ Yeityo kwo go laitoriat, kwo kotebi ng’ony eng’ taitab Jehovah; ak kole, A ng’o, ee Kiptaiyat Jehovah, ak nee gonnyu, kot imutwa agoi ra?

¹⁹ Ak kiek nito kit ne ming’in eng’ taing’ung’, ee Kiptaiyat Jehovah; ago kaing’alal kogeny agobo gotab otwogindeng’ung’ eng’ betusiek che chang’ che bwanei; keng’alale kiito agine ko u ye u bik, ee Kiptaiyat Jehovah.

²⁰ Ak nee age ne ta komuchi Daudi komwaun? Amu ingen inye otwogindeng’ung’, ee Kiptaiyat Jehovah.

²¹ Amu kaiyai etunatoni tugul agobo ng’olyondeng’ung’, ak ko u muguleldang’ung’ inyege, si kobiit igochi otwogindeng’ung’ konai.

²² I o amu noto, ee Jehovah Kamuktaindet: amu mami ne ogerge, ama mi Kamuktaindet age kobatenen, ko u eng’ tugul che kigegas eng’ itikyok.

²³ Ak ngoro bororiet ne kergei ak biguk, choto Israel, che kiwa Kamuktaindet kotiakyigei koek bikyik, ak koyachigei kainet, ak koyai tuguk che eechen agobo okwek, ak tuguk che bo kamuiset agobo emeng’ung’ eng’ taitab biguk che kiitiach eng’ Misri koek cheguk, eng’ bororiosiek ak cheptalelisiekwak?

²⁴ Kiigimityigei biguk Israel koek biguk koigeny; ak kiiegu inye Jehovah Kamuktaindenywa.

²⁵ Ara anyun, ee Jehovah Kamuktaindet, igimit koigeny ng’olyot ne kiimwa agobo otwogindeng’ung’, ak agobo gonnyi, ak iyai ko u ye kaimwa.

²⁶ Ak ingitoror kaineng’ung’ koigeny, kele, Jehovah ne bo lugosiek ko Kamuktaindet ne bou Israel: ak kigimiti koigeny gotab otwogindeng’ung’ Daudi eng’ taing’ung’.

²⁷ Amu kiing’ang’ji inye otwogindeng’ung’, ee Jehovah ne bo lugosiek, Kamuktaindetab Israel, ilenji, Ateegun got: kanyiganit anyun otwogindeng’ung’ eng’ muguleldanyi kosain saoni.

²⁸ Ara anyun, ee Kiptaiyat Jehovah, i Kamuktaindet, ak ko iman ng’aleguk, ak kaiyomisyi otwogindeng’ung’ kii mie:

²⁹ ara anyun, ingobaibain iberur gotab otwogindeng’ung’ si kobiit koteb koigeny eng’ taing’ung’: amu kaimwa inye, ee Kiptaiyat Jehovah, ak ingoek ne iberurot koigeny gotab otwogindeng’ung’ eng’ kaberureng’ung’.