2 SAMUEL 5 - BUKUIT NE TILIL

Koegu Daudi laitoriatab Juda ak Israel koga kituiyo

¹ Kibwa anyun bororiosiek tugul che bo Israel ole mi Daudi eng’ Hebron, ak komwa, kole, Keero, ki koweguk ak bortang’ung’.

² Eng’ betusiek che kigosiirto, ye ki laitoriat Saul ne kiboiywech, ko inye ne kiimuti Israel komanda, ak komong’u: ak kilenji Jehovah, Ibae bikyuk Israel, ak iegu bounindetab Israel.

³ Kibwa anyun boisiek tugul che bo Israel ole mi laitoriat eng’ Hebron; ak kiyai laitoriat Daudi arorutiet koboto ichek eng’ Hebron eng’ taitab Jehovah: ak kiil Daudi koek laitoriat koboi Israel.

⁴ Ki bo Daudi kenyisiek sosom ye kitau kolaitorani, ak kilaitoran kenyisiek artam.

⁵ Kilaitoran eng’ Hebron kobou Juda kenyisiek tisab ak arawek lo: ak kilaitoran eng’ Jerusalem kenyisiek sosom kobou Israel tugul ak Juda.

⁶ Yeityo kwo laitoriat ak bikyik Jerusalem koba kobargei ak Jebusik, bik che kimenyei emonoto: che kimwachi Daudi kolenji, Ngot ko meiste kipkoratinik ak che ing’waldos, ko menyone oli: kolen, maimuchi Daudi konyo olito.

⁷ Ago kinam Daudi irimetab Sion; noto ko nganasetab Daudi.

⁸ Ak kile Daudi eng’ betunoto, Chi age tugul ne barei Jebusik, ko ingotogosta kwo berechitab beek, kwo kobar che ing’waldos ak kipkoratinik, che wechei Daudi eng’ sobondanyi. Noto anyun, mwaei ichek kole, mitei kipkoratinik ak che ing’waldos; maimuchi konyo go.

⁹ Kimeny anyun Daudi irimonoto, ak koguure nganasetab Daudi. Ak kiteech Daudi komoswek tugul koboch Milo agoi orit.

¹⁰ Ak kieet Daudi kotesak; amu kimi Jehovah Kamuktaindetab lugosiek koboto inendet.

¹¹ Ak kiiyokto Iram laitoriatab Turo bik koba oldab Daudi, koibei taragonik; ak kiiyokto musogik, ak che waei koik: ak kiteekyi got Daudi.

¹² Ak kinai Daudi kole kigogimit Jehovah inendet koek laitoriat ne bou Israel, ak kinai kole kigotoror inendet bounatennyi agobo bikyik Israel.

¹³ Ak kiimutyigei Daudi chebaigeinik alak ak osotik alak eng’ Jerusalem, ko kagonyo eng’ Hebron: ak kita kesikyi Daudi werik ak tibik.

¹⁴ Ak chu ko kainaikab che kigisikyi inendet eng’ Jerusalem; Samua, ak Sobab, ak Natan, ak Solomon,

¹⁵ ak Ibar, ak Elisua, ak Nepeg, ak Japia;

¹⁶ ak Elisama, ak Eliada, ak Elipelet.

Koterteri Daudi Pilistik

¹⁷ Ak kingogas Pilistik kole kigiil Daudi koek laitoriat koboi Israel, kotogosta Pilistik tugul koba kocheng’ Daudi; ak kigas Daudi ak kichortagei kwo irimet.

¹⁸ Ak kibwa Pilistik ak koyom atebwetab Repaim.

¹⁹ Ak kiteebe Daudi Jehovah kolenji, Awe kebargei ak Pilistik? Indoi ichek eunnyu? Ak kilenji Jehovah Daudi, Togoste: amu andoi iman Pilistik eung’ung’.

²⁰ Ak kiit Daudi Baal-perasim, ak kibar Daudi ichek eng’ yoto; ak kile, Kagotui Jehovah bunikyuk eng’ tainnyu, ko u mogochek. Kiguure anyun yoto Baal- perasim.

²¹ Ak kibagakta kanamonikwak eng’ yoto, ak kiib Daudi koboto bikyik.

²² Kitogos Pilistik kogeny ne bo aeng’, ak koyom atebwetab Repaim.

²³ Ak ye kiteebe Daudi Jehovah, kolenji, Metogoste: alagu batenywa, ak iche ichek eng’ ye itoorjingei ketikab logoek.

²⁴ Ak ye igas cheetab banda eng’ ketichato bo logoek barak, ing’eet ichakte: amu kagondoenen Jehovah kobar lugetab Pilistik.

²⁵ Ak kiyai Daudi ko u noto ko u ye king’at Jehovah; ak kibar Pilistik koboch Geba agoi koit Geser.