2 SAMUEL 4 - BUKUIT NE TILIL

Kebarei Is-boset

¹ Ak kingogas Is-boset weritab Saul kole kogome Abner eng’ Hebron, konyalul, ak kiarogenso Israelik tugul.

² Ak kitinyei weritab Saul murenik aeng’ che ki kiptainikab kweanaikab luget: kigiguure kainetab age Baana, ak kigiguure ne bo age Rekab, werikab Rimon Berotindet, ne bo lagokab Benjamin: (amu kiityin Berot agine Benjamin:

³ ak kimwechi Berotik Gitaim, ak kiba koek bunotik eng’ oloto agoi ra.)

⁴ Kitinyei Jonatan weritab Saul werit ne ki meiyotin kelyek. Ki bo kenyisiek mut inendet ye kiitu ng’alekab Saul ak Jonatan eng’ Jesreel, ak kiganab cheblakwet, ak komwei: ak kichoktoi komwei cheblakwanato, kobut lakwet, ak kiyaagitu kelyek. Ak kigiguure kainennyi Mepiboset.

⁵ Ak kiba werikab Rimon Berotindet, Rekab ak Baana, ak kiit gotab Is-bonet ko kang’wanit asista, ye kiimuunyi bet kwen.

⁶ Ak kiba kwenutab got, ko u bich che kimachei koib nganok; ak kitoor moennyi: ak kichililso Rekab ak Baana, ng’etab kamet.

⁷ Kingoit go anyun ichek konyor koruei eng’ itogunnyi eng’ got ne kirue, kokwer, ak kobar, ak kotil metit, ak koib metit, ak koba kobun oretab Araba kemout komugul.

⁸ Ak kiib metoto bo Is-boset koipchi Daudi eng’ Hebron, ak kolenji laitoriat, Keero metitab Is-boset weritab Saul bunyondeng’ung’, ne kicheng’ei sobondang’ung’; ak kagoyaaktochi Jehovah mugetut rani kiptaiyandennyu laitoriat, eng’ Saul, ak iyotennyi.

⁹ Ak kiwolji Daudi Rekab ak Baana ng’etab kamet, werikab Rimon Berotindet, kolenji, Ko u ye sobei Jehovah, ne kigotiach sobondanyu eng’ nyalilda tugul,

¹⁰ kingomwawa chito age kole, Keero, kogome Saul, kolen kaib logoiywek che miach, anam inendet, ak abar eng’ Siklag, noto ko melekto ne kiagochi inendet agobo logoiywekyik.

¹¹ Siirei ne tia, ye kabar bik che yaachen chito ne bo iman eng’ gonnyi komi itogunnyi, ko tos mamage korotikyik eunekwok, ak aistook eng’ ng’ony?

¹² Ak king’at Daudi murenikyik, ak kibar ichek, ak kotil eunekwak ak kelyekwak, ak kosonginin eng’ ole negite tamboiyot ne mi Hebron. Ago kiib metitab Is-boset, ak kitupchi kereritab Abner eng’ Hebron.