2 SAMUEL 24 - BUKUIT NE TILIL

Koitab bik, ak biret ne

¹ Ak kilalyo kogeny neregekab Jehovah agobo Israel, ak king’eetyi Daudi kosich kabwatet ne ya agobo ichek, kolenji, Ui, iit Israel ak Juda.

² Ak kilenji laitoriat Joab kiptaiyatab luget, ne kimi ak inendet, Ui bunote bororiosiek tugul che bo Israel, koboch Dan agoi Beer-seba, ak oiit bik si kobiit anai koitetab bik.

³ Ak kilenji Joab laitoriat, Ingotesyi bik Jehovah Kamuktaindeng’ung’, ngo te kit ne te konyil bogol, ak ingogeer kiptaiyandennyu laitoriat: ago amu nee si kobaibaitune ng’olyondoni kiptaiyandennyu laitoriat?

⁴ Ago kiiterter ng’olyotab laitoriat Joab, ak kiiterter kiptainikab luget. Ak kiba Joab ak kiptainikab luget eng’ ole mi laitoriat, koba koiit bikab Israel.

⁵ Ak kilandae Jordan, ak kiteech Aroer, komostab tai ne bo nganaset ne mi kwenutab atebwetab Gad, kotokyigei Jaser:

⁶ yeityo kobwa Gilead, ak emetab Tatim-hodsi; ak kibwa Dan-jan, ak koyiemat agoi Sidon,

⁷ ak kibwa irimetab Turo, agoi nganasok tugul che bo Hibik, ak che bo Kananik: ak kimanda koba Murot ne bo Tai ne bo Juda, eng’ Beer-seba.

⁸ Kingo kagobunot anyun emet tugul kobwa Jerusalem ko kaigesgei karawek sogolu ak betusiek tiptem koboch ngoba.

⁹ Ak kiigochi Joab laitoriat kit ne te koitetab bik: ak kimi Israel murenik elfusiek bogolwogik sisiitu che nyigonen che bo rotokab chok; ak kiek che bo Juda murenik elfusiek bogol mut.

¹⁰ Ak kitoor Daudi muguleldanyi ye kingo kagoiit bik. Ak kilenji Daudi Jehovah, Kiayai tengekto ne o eng’ kioto koayai: ago asomin ale, iste anyun, ee Jehovah, tengektab otwogindeng’ung’; amu kiayai eng’ berberindo ne o.

¹¹ Ak kingong’eet Daudi karon, koityi ng’olyotab Jehovah maotiot Gad, keerindetab Daudi, kolenji,

¹² Ui imwachi Daudi ilenji, Kamwa Jehovah ko u ni kole, Kagonin tuguk somok; lewen agenge eng’ choto, si kobiit ayaun.

¹³ Kinyo anyun Gad ole mi Daudi, ak komwachi inendet kolenji, Mie koamin rubet kenyisiek tisab eng’ emeng’ung’? Anan imweote eng’ arawek somok eng’ taitab buniguk koonotin? Anan biit koroitab ng’ony eng’ emeng’ung’ betusiek somok? Til anyun nguno, ak ibwat kit ne awoljini inendet ne kaiyokwa.

¹⁴ Ak kilenji Daudi Gad, Ami eng’ bichindo ne o: ngibutyi eutab Jehovah; amu chang’ rirenosiekyik: ameng’abutyi eutab chi.

¹⁵ Kiiyokyi Jehovah anyun koroitab ng’ony Israel, koboch karon agoi sait ne kiging’at; ak kibek bik koboch Dan agoi Beer-seba bik elfusiek tamanwogik tisabu.

¹⁶ Ak kingotokyi malaikaiyat eunnyi Jerusalem kole kobar, kowal Jehovah kabwatutikyik agobo yaitionoto, ak kolenji malaikaiyandonoto kibarei bik, Kagoyam; ingosis eung’ung’. Ak kimi malaikaiyatab Jehovah ole negite ruanyut ne kiborse ne bo Arauna Jebusindet.

¹⁷ Ak king’alalji Daudi Jehovah, ye kingogeer malaikaiyat ne kibarei bik, kolenji, Keero, kiayai tengekto, kiayai amaste: ago kiyai nee kechirechu? Asain ale, ingobira eung’ung’, ak ingobir gotab kwandanyu.

¹⁸ Ak kinyo Gad betunoto ole mi Daudi kolenji inendet, Togoste, iteekyi Jehovah kaptisisiet eng’ ruanyut ne kiborse ne bo Arauna Jebusindet.

¹⁹ Ak kigotosta Daudi, ko u ye kimwa Gad, ko u ye kiga ng’at Jehovah.

²⁰ Ak kitobendo Arauna, ak kigeer laitoriat ak otwogikyik kobwanei kotokyingei inendet: ak kiwa Arauna, ak kong’uruk eng’ taitab laitoriat kot kotiiny toget ng’ony.

²¹ Ak kile Arauna, Kalya si konyo kiptaiyandennyu laitoriat ole mi otwogindennyi? Ak kile Daudi, Kanyo aalenen ruanyut ne kiborse, si kobiit ateekyi Jehovah kaptisisiet, si kobiit kerany koroitab ng’ony kosis si ma kobarei bik.

²² Ak kilenji Arauna Daudi, Ingoib kiptaiyandennyu laitoriat ak kogoito kit ne keerei kole mie eng’ inendet: keero tuga che bo kagochinet ne kibeelei, ak tuguk che kiborse, ak chogisiekab tuga che egu kwenik:

²³ ee laitoriat, kaigochi Arauna chuto tugul laitoriat. Ak kilenji Arauna laitoriat, Ingotaachin Jehovah Kamuktaindeng’ung’.

²⁴ Ak kilenji laitoriat Arauna, Achicha: aalenen iman eng’ alyet: magochini Jehovah Kamuktaindennyu kagochinoik che kibeelei che ma agoite kiy. Kial anyun Daudi ruanyunoto kiborse koboto tuga eng’ sekelisiek konom che bo feda.

²⁵ Ak kiteekyi Daudi Jehovah kaptisisiet eng’ yoto, ak kogoito kagochinoik che kibeelei ak kagochinoikab kalyet. Kigasyi anyun Jehovah ichek rirek agobo emet, ak kigirany koroitab ng’ony kosis eng’ Israel.