2 SAMUEL 23 - BUKUIT NE TILIL

Ng’alekab let che bo Daudi

¹ Chu anyun ko ng’alek che bo let che bo Daudi. Kale Daudi weritab Jesii, Ak kole chito ne kigitoor, Ne iilat ne bo Kamuktaindetab Jakobo, Ak tienindet ne mie ne bo Israel, ne bo tienwogikab kalosunet.

² King’alalena Tamirmirietab Jehovah, Ak kimi ng’olyondennyi ng’elyeptanyu.

³ Kile Kamuktaindetab Israel, King’alalwa Ruandetab Israel kole: Inendet ne bou bik eng’ imanda, Ne bou eng’ kaiyweisietab Kamuktaindet,

⁴ Ko kergeitu ak lapkeiyet ne bo karon, ye choru asista, Karonet ne churat; Ye bitos suswek che ng’orng’oren, Eng’ kaluunet ne lapkei ko kamoen ropta.

⁵ Ma u noto iman gonnyu eng’ Kamuktaindet; Ago kigoyomiswa kayomiset ne bo koigeny, Ne kigichob eng’ tuguk tugul, ak ko lumdaat: Amu noto ko yetunennyu tugul, ak ko magennyu tugul, Agot ngo mayai kotesak.

⁶ Ago kergeitu tugul che maiywei Jehovah ak katok che kiwirtoi, Amu ma namaksei eng’ eut:

⁷ Ago chito ne namei Ko kanyol kotinyei karik ak irumetab ng’otit; Ak kibeelei eng’ mat kogesgei eng’ komostanywa.

Kaboktaet ak nyiganatetab murenik che nyigonen che bo Daudi

⁸ Chu ko kainaikab murenik che nyigonen che kitinyei Daudi: Joseb-basebet Takemonindet, ne o eng’ kiptainik; inendet ko ki Adino Esnindet, kibar bik bogol sisiit eng’ betunak.

⁹ Ak ne rubei inendet ko ki Eleasar weritab Dodai weritab Ahoindet, ki age eng’ murenichoto somok nyigonen che kimi ak Daudi, ye kiwitei Pilistik che kiga iyumgei eng’ yoto agobo luget, ak kiga koba murenikab Israel:

¹⁰ king’eet kobar Pilistik kot kong’et eunnyi, ak kinamgei eunnyi ak rotwetab chok: ak kiyai Jehovah katerteret ne o betunoto; ak kiweek bik kityo kosub inendet koba konyaban tuguk.

¹¹ Ak ne rubei inendet ko ki Sama weritab Agee Hararindet. Ak kiga iyumgei Pilistik koek luget, eng’ ole kimi mbaret ne mi sogoriek che chang’; ak kimwee bik Pilistik.

¹² Ago kitonon Sama eng’ kwenutab mbaranato, koeet mbaret, ak kibar Pilistik: ak kiyai Jehovah katerteret ne o.

¹³ Ak kichortagei somogu eng’ bounik che eechen sosom, ak kibwa ole mi Daudi eng’ betusiekab kesisiet agoi kebenetab Adulam; ak kiga teech lugetab Pilistik atebwetab Repaim.

¹⁴ Ak kimi Daudi eng’ betusiechoto irimet, ak kimi lugetab Pilistik eng’ betusiechoto Bet-lehem.

¹⁵ Ak kiam melelda Daudi ak kile, Eiye, inaga ng’o beekab keringetab beek ne mi Bet-lehem, ne negite ormarichet, aee!

¹⁶ Ak kichut lugetab Pilistik murenjoto nyigonen somogu, koba koram beek eng’ keringonoto bo beek ne mi Bet-lehem, ne kimi ye negite ormarichet, ak kiib, koipchi Daudi: ago ma cham koee, kitumda eng’ taitab Jehovah.

¹⁷ Ak kile, Ingolooit eng’ ane, ee Jehovah, si mayai kii: tos aee korotikab bik che kachut ng’oiyondit sobonwekwak? Ma cham anyun koee amu noto. Kiyai tuguchuto anyun bichoto somogu nyigonen.

¹⁸ Ak ki ne o eng’ choto somok Abisai ng’etab kametab Joab weritab Seruia, ak kinam ng’otinnyi ak kobar bik bogol somok, ak kitook kainennyi eng’ murenjoto somok.

¹⁹ Ma inendet ne kitinyei teegisto mising’ eng’ choto somok? Kigiyai inendet anyun koek kiptaiyandenywa: ago ma ityi chugai somok bo tai.

²⁰ Kibar Benaia weritab Jeoiada, weritab chito ne nyigan ne bo Kabseel, inendet ne kiyai boisionik che eechen, kibar werik aeng’ che bo Ariel che bo Moab: kichortagei kogeny, kwo kobar ng’etundo eng’ kwenutab keringet eng’ betusiekab teluchi:

²¹ ak kibar Misrindet, murenet ne kararan: ak kitinyei Misrindonoto ng’otit eng’ eunnyi; ago kichortagei kwo ole mi inendet ak kirokto, ak kong’us ng’otit eng’ eutab Misrindonoto, ak kobare ng’otinnyi.

²² Kiyai tuguchuto Benaia weritab Jeoiada, ak kitook kainennyi eng’ murenjoto somok nyigonen.

²³ Kisich teegisto kosiir choto somok, ago ma ityi chugai somok bo tai. Ak kiinde Daudi inendet koboi ribikyik.

²⁴ Ki age Asael ng’etab kametab Joab, eng’ choto sosom; Elanan weritab Dodo ne bo Bet-lehem;

²⁵ Sama Harodindet, Elika Harodindet;

²⁶ Heles Paltindet, Ira weritab Ikes Tekoindet;

²⁷ Abieser Anatotindet, Mebunai Husatindet;

²⁸ Salmon Aoindet, Maarai Netopatindet;

²⁹ Heleb weritab Baana Netopatindet, Itai weritab Ribai ne bo Gibea ne bo lagokab Benjamin;

³⁰ Benaia Piratonindet, Idai ne bo ainosiekab Gaas;

³¹ Abi-albon Arbatindet, Asmabet Barumindet;

³² Eliaba Saalbonindet, werikab Jasen, Jonatan;

³³ Sama Hararindet, Aiam weritab Sarar Ararindet;

³⁴ Elipelet weritab Aasbai, weritab Maakatindet, Eliam weritab Aitopel Gilonindet;

³⁵ Hesro Karmelindet, Paarai Arbindet;

³⁶ Igal weritab Natan ne bo Soba, Bani Gadindet;

³⁷ Selek Amonindet, Naarai Beerotindet, che kiipchin karik Joab weritab Seruia;

³⁸ Ira Itrindet, Gareb Itrindet;

³⁹ Uria Hitindet: ki sosom ak tisab tugul.