2 SAMUEL 22 - BUKUIT NE TILIL

Tiendab Daudi ne bo kalosunet (Tiendab Kal. 18)

¹ Ak kimwachi Daudi Jehovah ng’alekab tieni eng’ betut ne kigasor Jehovah inendet eng’ eunekab bunikyik tugul, ak eng’ eutab Saul:

² ak kile, Jehovah ruandennyu, ak irimennyu, ak orunindennyu, ne nenyu;

³ Kamuktaindetab ruandennyu, amang’u inendet; Long’ennyu, ak kuinetab yetunennyu, teeksennyu ne koi, ak ole amwechini; Yetindennyu, isorua eng’ koromnatet.

⁴ Aguure Jehovah, ne nyoljin kilos: Si kesorua eng’ bunikyuk.

⁵ Kiyiema beek che mildogei che bo meet, Kigona maranosiekab yaitiet aiyweis.

⁶ Kiyiema boroonikab oldab che kigobek: Kichea mestonokab meet.

⁷ Kiaguur Jehovah eng’ bichiindanyu, Ee, kiaguur Kamuktaindennyu: Ak kigas kutinnyu eng’ hekalunnyi, Ak kiit rirekyuk itikyik.

⁸ Kigirgiren ng’ony anyun ak kibotan, Kitwagei lumeiywekab kipsengwet Ak kotumdumgei, amu kinerech.

⁹ Kitogostae iyeto serunekyik: Ak kibeelso mat ne kimong’une kutinnyi: Kilalyo nesek eng’ maata.

¹⁰ Kiim kipsengwetisiek agichek, ak kochorgei inendet; Ak kimi mesundeito ne o kureretab kelyekyik.

¹¹ Ak kilany kerubindet, ak kotiriren: Ee, kitook eng’ kebebaikab usonet.

¹² Ak kiyai mesundeito koek emaisiekyik che mi komoswekyik tugul, Kayumetab ge ne bo beek, bolik che tuuen che bo barak.

¹³ Kilalyo nesek Eng’ kaluunet ne kimi tainnyi.

¹⁴ Kitul Jehovah eng’ kipsengwetisiek, Ak kitwek Inendet ne Toror Mising’.

¹⁵ Ak kiiyokto kipchabonik, koiyesta; Koboto kalyelet, ak koiyesta ichek.

¹⁶ Kitook anyun kererusiekab nyanjet, King’ang’ogis lumeiywekab ng’ony, Eng’ keretab kong’ ne bo Jehovah, Eng’ cheetab kabusetab serunekyik.

¹⁷ Kiiyok eng’ barak, ak koganaba; Kiichuutwa among’ eng’ beek che chang’.

¹⁸ Kisorua eng’ bunyondennyu ne kim, Eng’ icheget che kiwecha; amu ki kimen kosiira.

¹⁹ Kichea eng’ betutab nyalildanyu: Ago kiek Jehovah ne atiiege.

²⁰ Kiimuta amanda awa ole baraa: Kisorua, amu kibaibait eng’ane.

²¹ Kigona Jehovah ko u imandanyu; Kigona ko u tililindab eunekyuk.

²² Amu kiarib ortinwekab Jehovah, Ak ma abagakte Kamuktaindennyu eng’ or ne ya.

²³ Amu kimi tainnyu kiruogutikyik tugul, Ak ma aistoege konetisiosiekyik.

²⁴ Kiagesunotgei agane eng’ tainnyi, Ak kiaripge si manama tengekto.

²⁵ Kigona anyun Jehovah ko u imandanyu; Ko u tililindanyu eng’ tainnyi.

²⁶ Eng’ che tinyei rirenetab ge i bo rirenetab ge: Ak eng’ chito ne igesunotgei ibortoige ile igesunotge.

²⁷ Eng’ che tililen ibortoige ile i tilil, Ak eng’ che mastoi, obortosi.

²⁸ Ak isoru che nyerotin. Ago igeere che mendos, si kobiit iming’in.

²⁹ Amu i tainnyu Jehovah: Ak ikwenyi Jehovah mesundeitanyu.

³⁰ Amu aiyestoi luget eng’ inye; Eng’ Kamuktaindennyu atorombeni asiire irimet.

³¹ Igesunotgei oretab Kamuktaindet: Kigonaak ng’olyotab Jehovah; Inendet long’etab icheget tugul che imang’u.

³² Amu tos ng’o Kamuktaindet, kobate Jehovah? Ak tos ng’o ruandet, kobate Kamuktaindennyo?

³³ Kamuktaindet ko irimennyu ne kim: Ak indochin ne gesunotgei eng’ orennyi.

³⁴ Yaei inendet kelyekyuk koigei che bo kenyelet ne kotoy: Ak nama atonon eng’ komoswekyuk che tororen.

³⁵ Ineti eunekyuk koyai luget; Si kong’i eunekyuk kwanget ne bo sugunwet.

³⁶ Kiigona long’etab yetuneng’ung’ agine: Ak kigoeeta talasieng’ung’.

³⁷ Kiibaraiywa kakwautikyuk, Ama ichabaita kelyekyuk.

³⁸ Kiasub bunikyuk, ak abar; Ama aweeige agoi kogesgei.

³⁹ Kiawong’u ichek, ak atui, kot ko ma komuchi kong’eetyo: Ee, kagobutyi ichek kelyekyuk kel.

⁴⁰ Amu kiiratwa kimnatet ne bo luget: Kiiterterwa aboi che king’eetya.

⁴¹ Kiiwelel bunikyuk kotuktocha batai, Si kobiit ang’eti ichek che wecha.

⁴² Kigeer, ago kima biit ne kisor; Kigeer Jehovah, ago kima wolji.

⁴³ Kiatonaton anyun ichek komengegitu koigei temburiekab ng’ony, Kiatiech ko u ng’atatek che mi ortinwek, ak ayeste.

⁴⁴ Kiisorua aginye eng’ boriosiekab bikyuk; Kiiriba aek metitab bororiosiek: Tun ota bik che tom anai.

⁴⁵ Tun kasa it toek eng’ ng’alset: Ye kas agobo ane, eng’ yoto kogasa it.

⁴⁶ Begunoti toek kowandogei, Ak komong’ eng’ ole ung’egei kobotandos.

⁴⁷ Sobei Jehovah; ak iberurot ruandennyu; Ak ingotororit Kamuktaindetab ruandetab yetunennyu:

⁴⁸ Kamuktaindet ne yaaktoiywa mugetut, Ak koming’ini bik kogasa it,

⁴⁹ Ne imutwa among’une bunikyuk: Ee, itorora asiir ichek che ng’eetyina: Isorua eng’ chito ne korom.

⁵⁰ Aweegun kongoi anyun, ee Jehovah, eng’ kwenutab bororiosiek, Ak atienji kaineng’ung’ kalosunoik.

⁵¹ Igochin laitoriandennyi sorunet ne o; Ak koborjin nenyi ne iilat chamnyennyi ne tala, Daudi ak iyotennyi agoi koigeny.