2 SAMUEL 21 - BUKUIT NE TILIL

Rubet, ak ng’alekab Rispa

¹ Ak kibiit rubet eng’ betusiekab Daudi, eng’ kenyisiek somok che kiisubegei, ak kicheng’ Daudi togetab Jehovah. Ak kile Jehovah, Bo Saul, ak gonnyi ne bo korotik, amu kibar Gibeonik.

² Ak kiguur laitoriat Gibeonik, ak kolenji; (kima ko bo Gibeonik lagokab Israel, ki bo bik che king’etune Amorik; ak kiga koyosiechi ichek lagokab Israel: ak kicheng’ei Saul kobar ichek amu kagiilennyi bo ge agobo lagokab Israel ak Juda:)

³ ak kilenji Daudi Gibeonik, Ayaiywok nee? Ak ayai kagaigao nee, si kobiit oberur borotetab Jehovah?

⁴ Ak kilenji Gibeonik inendet, Ma ng’olyotab feda anan ko tahabu eng’ kwenunnyo achek ak Saul, anan ko gonnyi; ama botech kebar chi age tugul eng’ Israel. Ak kile, Kit ne omwae, ayaiywok kioto.

⁵ Ak kilenji ichek laitoriat, Chichi kiigeswech, ak ne kichobei kegirindech, kole kebarech kot ko ma king’etu eng’ kiwotet age tugul ne bo Israel,

⁶ ingigonech bik tisab che bo werikyik, si kigartatyi Jehovah eng’ Gibea ne bo Saul, ne kilewen Jehovah. Ak kile laitoriat, Agonu ichek.

⁷ Ago kirire laitoriat Mepiboset, weritab Jonatan, weritab Saul, amu kayosietab Jehovah ne kimi kwenunywa, kwenutab Daudi ak Jonatan weritab Saul.

⁸ Ago kinam laitoriat werik tuwai che bo Rispa cheptab Aia, che kiga sikyi Saul, Armoni ak Mepiboset; ak werik mut che bo Mikal cheptab Saul, che kiga sikyi Adriel weritab Barsilai Meolatindet:

⁹ ak kiinde eunekab Gibeonik, ak kiigartat ichek eng’ tulwet eng’ taitab Jehovah, ak kibek tugul ko tisab kibagenge: ak kigibar ichek eng’ betusiekab kesisiet, eng’ betusiek che bo tai eng’ taunetab kesisietab sairik.

¹⁰ Ak kiinem Rispa cheptab Aia kuniok ak kiitochigei eng’ ruandet, koboch taunetab kesisiet agoi korobonji ropta ne bunu kipsengwet; ak ma chamji taritik kobutyi muswekwak bet, anan kobwa tiong’ikab timin kemoi.

¹¹ Ak kigimwachi Daudi kit ne koyai Rispa cheptab Aia, chebaigeiyatab Saul.

¹² Ak kiwa Daudi koib kowekab Saul ak kowekab Jonatan werinnyi eng’ bikab Jabes-gilead, che kiga chor eng’ oretab Bet-san, ole kiga igartate Pilistik, eng’ betut ne kibarei Pilistik Saul eng’ Gilboa:

¹³ ak kiib kowekab Saul ak kowekab Jonatan werinnyi kotogos; ak kiiyum kowekab icheget che kiga kigartat.

¹⁴ Ak kitub kowekab Saul ak che bo Jonatan werinnyi eng’ emetab Benjamin eng’ Sela, eng’ kereritab Kis kwandanyi: ak kiyai tuguk tugul che king’at laitoriat. Ak kingobata choto kogasyi Kamuktaindet ichek rirek agobo emet.

Bikab Daudi che bo luger, ak kaboktaenywa

¹⁵ Ak kibiit luget kogeny eng’ Pilistik ak Israel; ak kichortagei Daudi ak otwogikyik, kobwa kobargei ak Pilistik: ak king’et Daudi.

¹⁶ Ak kilen Isbi-benok, ne ki bo werikab chito chemosit, ne ki nyigisindab ng’otinnyi ko ki sekelisiek bogol somok che bo sugunwet, ak kiga rat rotwetab chok ne leel, kole kobar Daudi.

¹⁷ Ago kitoret inendet Abisai weritab Seruia, ak kikwer Pilistindet ak kobar. Yeityo koyosiechi bikab Daudi inendet, kolenji, Ma kebendi tugul kogeny luget ak inye, si memis taitab Israel.

¹⁸ Ak kingobata nito, kobiit luget kogeny ak Pilistik eng’ Gob: kobar Sibeikai Husatindet Sap, ne ki bo werikab chito chemosit.

¹⁹ Ak kibiit kogeny luget ak Pilistik eng’ Gob; ak kibar Elanan weritab Jaareoregim Bet-lehemindet Goliat Gitindet, ne ki kergei irumetab ndirinnyi, ak ketit ne taachin usisiek chito ne nabisiei.

²⁰ Ak kibiit luget kogeny eng’ Gat, ole kimi chito ne koi kot, ne kitinyei morik lo eng’ eut age tugul, ak kitinyei morik lo eng’ keldo age tugul, ki tiptem ak ang’wan tugul; ak kiga kisikyi chichoto agine chito chemosit.

²¹ Ak ye kingoreny Israel, kobar inendet Jonatan weritab Simei ng’etab kametab Daudi.

²² Kigisikyi bichoto ang’wan chito chemosit eng’ Gat: ak kibar Daudi ak otwogikyik bichoto.