2 SAMUEL 2 - BUKUIT NE TILIL

Komi Daudi laitoriatab Juda, Hebron

¹ Ak kingobata tuguchuto koteebe Daudi Jehovah kole, Atogoste awe age eng’ nganasokab Juda? Ak kilenji Jehovah inendet, Togoste. Ak kile Daudi, Atogoste awe ano? Ak kilenji, Ui Hebron.

² Kotogosta anyun Daudi oloto, koboto osotikyik aeng’, Ainoam Jesreelyot, ak Abigail ne ki osotiotab Nabal Karmelindet.

³ Ak kiimut Daudi bikyik che kimi koboto inendet, kotogosta, chi tugul ak bikab gonnyi: ak kimeny nganasokab Hebron.

⁴ Ak kibwa bikab Juda kobwa koiil Daudi eng’ oloto koek laitoriatab gotab Juda. Ak kimwachi icheget Daudi kolenji, Ki bikab Jabes-gilead che kitubei Saul.

⁵ Ak kiiyokto Daudi bik koba oldab bikab Jabes-gilead, ak kolenji ichek, Ingoberurok Jehovah, amu kioborji mieini kiptaiyandeng’wong’, ne inendet ko Saul, ak kiotub inendet.

⁶ Ak ingoboruok Jehovah ak okwek mieindo ak imanit: ak ayaakwok agane mieinito, amu kioyai kiito.

⁷ Ingogimegitu anyun eunekwok, ak oegu che nyigonen: amu kogome Saul kiptaiyandeng’wong’, ak kogoiila gotab Juda aek laitoriat eng’ ichek.

Kondoi Abner Is-boset weritab Saul koek laitoriatab Israel

⁸ Kiga komut Abner weritab Ner, ne ki kiptaiyatab lugetab Saul, Is-boset, weritab Saul, ak komut inendet kolanda Maanaim;

⁹ kiinde inendet koek laitoriat koboi Gilead, ak koboi Ashurik, ak Jesreel, ak Epraim, ak Benjamin, ak koboi Israel tugul.

¹⁰ (Ki bo Is-boset weritab Saul kenyisiek artam ye kitau kolaitorani, kilaitoran kenyisiek aeng’.) Ago kiisub gotab Juda Daudi.

¹¹ Ak betusiek che kilaitoran Daudi eng’ Hebron eng’ gotab Juda ko ki kenyisiek tisab ak arawek lo.

Luget ne kibiitune kwenunywa: kobarei Abner Asael

¹² Ak kiba Abner weritab Ner, ak otwogikab Is-boset weritab Saul, eng’ Maanaim koba Gibeon.

¹³ Ak kiba Joab weritab Seruia, ak otwogikab Daudi, ak kituiyechi tamboiyotab Gibeon; ak kiibuur, kobuure alak tamboiyot komosi, kobuure alak tamboiyot komosin.

¹⁴ Ak kilenji Abner Joab, Asomin ale ingong’eetyo murenik kourerenso eng’ tainnyo. Ak kile Joab, Ingong’eetyo.

¹⁵ King’eetyo anyun koba ak kigiiti; ki taman ak aeng’ che bo Benjamin, ak che bo Is-boset weritab Saul, ak ki taman ak aeng’ che bo otwogikab Daudi.

¹⁶ Ak kinam age tugul metitab age, ak kotoorgei karasaik eng’ rotokab chok; ak kiibutyo tuwai: kigiguure yoto anyun Helkat-hasurim, ne mitei Gibeon.

¹⁷ Ak kigoromit boriet mising’ eng’ betunoto; ak kigiterter Abner, koboto bikab Israel, eng’ taitab otwogikab Daudi.

¹⁸ Ak kimi yoto werik somogu che bo Seruia, Joab, ak Abisai, ak Asael: ak ki chepcheb Asael ko u cheptirgichet.

¹⁹ Ak kion Asael Abner; ak ma masta kwo eutab tai anan eutab katam ye kionei Abner.

²⁰ Yeityo kogusgong’ Abner, ak kole, Inye ni, Asael? Ak kiwol kole, Ane.

²¹ Ak kilenji Abner inendet, Ui taban, eutab tai anan ko ne bo katam, ak inam age eng’ murenjo, ak irebe karikyik. Ago ma cham Asael komasta kobagakta inendet.

²² Ak kilenji Abner Asael kogeny, Ui taban, mata isubwa: amu nee si imach atoorin kosorenen? Si ko ta amukta ano anyun ageer togetab Joab ng’etab komet?

²³ Ago kiesio komasta: kitoor anyun Abner inendet moet eng’ chileiywotab ng’otit, kosore; ak kiibut eng’ yoto, ak komechi yoto: ak tugul che kiit yoto kiibutyi Asael ak kome, ko kitononso.

²⁴ Ago kion Joab ak Abisai Abner: ak kingoit tulwetab Ama, ne mi taitab Gia eng’ oret ne wendi ong’atetab Gibeon, kororokta asista.

²⁵ Ak kiiyumgei lagokab Benjamin konamgei ak Abner, koek luget agenge, ak kotononso eng’ tulwet barak.

²⁶ Yeityo koguur Abner Joab kolenji, Tos barisiei rotwet agoi? Mengen ile egu ng’wanindo eng’ let? Tianitu si imwachi bik koweek ko mata kosub che tupcho?

²⁷ Ak kile Joab, Ko u ye sobei Kamuktaindet, ko nda kama ing’alal, ta kagoba bik iman atkai karon, ta kama kosubi chi tugul tupchennyi.

²⁸ Koguut anyun Joab iriaget, ak kitononso bik tugul, ak mata koon Israel kogeny, anan kota koborio kogeny.

²⁹ Ak kiba Abner ak bikyik kemounoto tugul kobun Araba; ak kilandae Jordan, ak kobun tugul, Pitron, ak kiit Maanaim.

³⁰ Ak kiweek Joab mata kosub Abner: ak kingo kagoyum bik tugul, ko ki betyotin eng’ otwogikab Daudi bik tamanu ak sogol koboto Asael.

³¹ Ago kiga kobar otwogikab Daudi che bo Benjamin ak murenikab Abner; kot kobek bik bogolwogik somogu ak tamanwogik lo.

³² Ak kila Asael, ak kotupchi kereritab kwandanyi, ne kimitei Betlehem. Ak kiba Joab ak bikyik kemout tugul, ak kieekyi Hebron.