2 SAMUEL 18 - BUKUIT NE TILIL

Keiterteri Absalom, ak komeei

¹ Ak kiit Daudi bik che kimi ak inendet, ak kiinde kiptainikab elfusiek, ak kiptainikab bogolwogik koboi ichek.

² Ak kiiyokto Daudi bik, ak kiinde Joab kondochi kebeberta agenge eng’ somok, ak kiinde Abisai weritab Seruia, ng’etab kametab Joab, kondochi kebeberta agenge eng’ somok, ak kiinde Itai Gitindet kondochi kebeberta agenge eng’ somok. Ak kilenji laitoriat bik, Awendi agane iman kobotok.

³ Ago kile bik, Mewendi: amu ngot kemwei, ko mamagenech kiy; anan ngot kobek kebeberta agenge eng’ achek, ko mamagenech kiy: ago oaechine ak bik elfusiek taman eng’ achek: ko mie anyun ichoboge si itoretech eng’ nganaset.

⁴ Ak kilenji laitoriat ichek, Kit ne ogeere okwek ole nyolu, ayae noto. Ak kitonone laitoriat ormarichet taban, ak kimanda bik kobee bogolwogik ak elfusiek.

⁵ Ak king’at laitoriat Joab ak Abisai ak Itai kolenji, Orire nerananato Absalom, agobo ane. Ak kigas bik tugul ye king’atei laitoriat kiptainik tugul agobo Absalom.

⁶ Komanda anyun bik koba kobargei ak Israel eng’ kewet: ak kimi luget eng’ osnetab Epraim.

⁷ Ak kibar otwogikab Daudi bikab Israel eng’ yoto, ak kibiit barisiet ne o eng’ oloto eng’ betunoto, ne bo bik elfusiek tiptem.

⁸ Amu kiyom emet tugul lugonoto: ak kibar osnet bik eng’ betunoto che siirei che kigibare rotwetab chok.

⁹ Ak kichunji Absalom otwogikab Daudi. Ak kibunei Absalom nyumbunnyi, ak kichut nyumbut temenik che kichang’a che bo ketit ne o, ak kinam metinnyi ketoto, ak kosonginin; ak kiwa anyun nyumbut ne kibunoti, kosiirto.

¹⁰ Ak kigeer chito age, ak komwachi Joab kolenji, Keero, kageer Absalom kosonginini eng’ ketit.

¹¹ Ak kilenji Joab chichoto kimwachin inendet, Keero, inye ne kegeere, kalya si metoor inendet eng’ yoto kosore, kokwer ng’onyut? Ak ta kaagonin fedaisiek taman, ak birenet.

¹² Ak kilenji chichoto Joab, Agot ndaname fedaisiek elfut eng’ eunnyu, ko matwae kora weritab laitoriat eng’ eunnyu: amu king’atin laitoriat ak Abisai ak Itai kegase kole, Oripge, si matwa chi nerananato Absalom.

¹³ Nda kaga ayachi sobondanyi ko u noto, ang’alse (ama mi ng’olyo ne ung’oksei eng’ laitoriat), ko kata iistoenage inye.

¹⁴ Kole anyun Joab, Ma mie kigage ne te ni ak inye. Ak kinam kiblitok somok, ak kotoor muguleldab Absalom, ye kita kosobei eng’ ketoto.

¹⁵ Ak kiyiem inendet murenik tamanu, che kiipchin Joab karikyik, ak kotoor Absalom, kobar.

¹⁶ Ak kiguut Joab iriaget, ak kiweek bik kobagakta oret ne kione Israel; amu kiete Joab bik.

¹⁷ Ak kisut Absalom ak kowirji keringet ne o eng’ osnet, ak korurukyi inendet karurugutiet ne o ne bo koik: ak kimwei Israel tugul, kwo age tugul emainnyi.

¹⁸ Ak kiga koteekyigei Absalom kit ne u toloita ye kita kosobei inendet, ne mi atebwetab laitoriat: amu kile, Matinye werit ne kibwate kainennyu: ak kimwaitoe kioto kainennyi: ak kigiguure toloitab Absalom agoi ra.

¹⁹ Kile anyun Aimaas weritab Sadok, Ingalabat, aipchi laitoriat ng’alek, alenji kagoyaaktochigei Jehovah mugetut eng’ bunikyik.

²⁰ Ak kilenji Joab inendet, Meibe ng’alek ra, ago iibe ng’alek betut age: meibe ng’olyo age tugul betuni, amu kagome weritab laitoriat.

²¹ Ak kilenji Joab Kusindet, Ui mwachi laitoriat tuguk che kaigeer. Ak kiing’uruk Kusindet eng’ taitab Joab, ak kolabat.

²² Kolenji anyun Aimaas, weritab Sadok Joab kogeny, Agot nda biitu kiy age tugul, asomin ale, chamwa agane alabat asub Kusindet. Ak kile Joab, Amu nee si imache ilabat-o, werinnyu, ago mesiche melek agobo ng’alechato?

²³ Ago kile, Agot nda biitu kiy age tugul, alabati. Ak kilenji inendet, Labat. Kilabat anyun Aimaas kobun oretab Warenget, ak kiwa kondoe Kusindet.

²⁴ Kitebe Daudi kwenutab ormarichok aeng’: ak kitogosta ribindet kwo ormarichet barak kot koit irimet, ak kitobendo, ak kigeer, ogeero, chito ne labatu inegei.

²⁵ Ak kiwaach ribindet ak komwachi laitoriat. Ak kile laitoriat, Ngot ko inegei, kotinyei ng’alek che nyo komwaei. Ak kilabot korik.

²⁶ Ak kigeer ribindet chito age kolabotu: ak kiguur ribindet, ribindetab ormarichet, ak kole, Keero, labotu chito age inegei. Ak kile laitoriat, Ibu agine ng’alek.

²⁷ Ak kile ribindet, Ageere ko kergei labatetab ne indou ak labatetab Aimaas weritab Sadok. Ak kile laitoriat, Inendet ko chi ne mie, ak ibu ng’alek che miach.

²⁸ Ak kiguurso Aimaas, ak kolenji laitoriat, Chamegei tugul. Ak kiing’uruk eng’ taitab laitoriat kot kotiiny togennyi ng’ony, ak kole, Iberurot Jehovah Kamuktaindeng’ung’ ne kaigoito bik che kolen kobargei ak kiptaiyandennyu laitoriat.

²⁹ Ak kile laitoriat, Chamegei nerananato Absalom? Ak kiwol Aimaas kole, Kangoyogu Joab otwogindetab laitoriat, ane otwogindeng’ung, ageer wasetab ge ne o, ago manai kit ne kabo.

³⁰ Ak kilenji laitoriat, Ui taban, ak itonon eng’ yu. Ak kiwa taban, ak kotonon.

³¹ Ak ogeero, kiit Kusindet; ak kile Kusindet, Ng’alek che bo kiptaiyandennyu laitoriat: amu kayooktoun Jehovah rani mugetut eng’ tugul che koga ng’eetyo kole obarge.

³² Ak kilenji laitoriat Kusindet, Chamegei nerananato Absalom? Ak kiwolji Kusindet kole, Ingoigei bunikab kiptaiyandennyu laitoriat, ak bik tugul che ng’eetyinin kole kobarin, kit ne kaigei nerananato.

³³ Ak kiarogen mising’ laitoriat, ak kitogosta kwo got orit ne mi ormarichet barak, ak korir: ak kingowendi kolenoti, Ooi werinnyu Absalom, werinnyu, werinnyu Absalom! Kata kaigai ame ne kata inye, Ooi Absalom, werinnyu, werinnyu!