2 SAMUEL 17 - BUKUIT NE TILIL

Kiterteri Aitopel, ak komeei

¹ Kilenji Aitopel Absalom kogeny, Chamwa alewen murenik elfusiek taman ak aeng’, ak ang’eet asub Daudi kemouni.

² Si ache kota ko ng’etat ko maimuchi koyai kiy, ak amuu; ak komwei bik tugul che mi koboto inendet; ak abar laitoriat inegei:

³ ak amutun bik tugul: u chichoto ne icheng’e ye kageweech bik tugul: ak kotebi bik tugul eng’ kalyet.

⁴ Ak kiibaibai Absalom ng’olyondonoto, koboto boisiek tugul che bo Israel.

⁵ Yeityo komwa Absalom kole, Oguur Husai Arkindet agine konyo, kegas kit ne mwaei agine.

⁶ Ak kingoit Husai ole mi Absalom, komwachi Absalom inendet kolenji, Kamwa ko u ni Aitopel: kiyai ko u ye kamwa? Ngo ma u noto, imwa inye.

⁷ Ak kilenji Husai Absalom, Ma mie ng’olyot ne kamwa Aitopel ra.

⁸ Kile kogeny Husai, Ingen kwandang’ung’ ak bikyik, ile bik che nyigonen, ak tinyei ng’wanindo eng’ kabwatutikwak, ko u tiondo ne u keerit ne kagirebe arekyik eng’ timin: kwandang’ung’ ko chitab luget, ak maruitos ak bik.

⁹ Kogiuny eng’ keringet, anan ko eng’ komosta age: ak ye kagobek alak eng’ ichek korok, ko age tugul ne kagas komwa kole, Mi barisiet eng’ kwenutab bik che isubi Absalom.

¹⁰ Agot inendet ne nyigan, ne u muguleldanyi muguleldab ng’etundo, kochootei kogesugei: amu ingen Israel tugul kole chito ne nyigan kwandang’ung’, ak ichek che mi ak inendet ko bik che nyigonen.

¹¹ Ago aruochi ale, ingoyumjingei Israel tugul, koboch Dan agoi Beer-seba, kotenit ng’aniek che mitei ngegutab araraita eng’ chang’indo; si iwe luget inyendet.

¹² Si keche inendet eng’ komosta ne kaginyorji, ak kibutyi inendet ko u ye ibutyin rewot ng’ony: ak magituuchi agot agenge, eng’ inendet ak bik tugul che mi koboto inendet.

¹³ Ak kogeny, ngwo nganaset, koibu Israel anyun rogoosiek kobwa nganasanato, yeityo kong’us kwo ainet, kot ko mang’et koita agenge ne ming’in eng’ oloto.

¹⁴ Ak kile Absalom ak bik tugul che bo Israel, Kararan kiruogetab Husai Arkindet kosiir kiruogetab Aitopel. Amu kiga til Jehovah koterter kiruoget ne mie ne bo Aitopel, si kobiit koipchi Jehovah yaitiet Absalom.

¹⁵ Kilenji anyun Husai Sadok ak Abiatar tisiik, Kamwachi Aitopel ko u ni ak ko u ni Absalom ak boisiekab Israel; ak kamwa ko u ni ak ko u ni.

¹⁶ Ara anyun oyokte ng’olyot ochokyi, ak omwachi Daudi olenji, Amat irue kemouni eng’ ole kilandoe kebendi ong’atet, ago mie olande ui tugul; si ma kiges laitoriat, ak bik tugul che mi ak inendet.

¹⁷ Kitebi Jonatan ak Aimaas eng’ ole negite En-rogel; ak kicham kowendi chepto ne otwogindet komwachin ichek ng’alek; ak kibendi komwachin laitoriat Daudi: amu kima komachei kogeer chi ichek kobendi nganaset.

¹⁸ Ago kigeer ichek ng’etet age, ak kwo komwachi Absalom: ak kiba tuwai kochakta, ak kiit gotab chito age eng’ Baurim, ne kitinyei keringetab beek eng’ kurgennyi; ak kiba kochortagei yoto.

¹⁹ Ak kinam kwondo keruet ak kogere kutitab keringonoto, ak kimae nganok che kagibor baragunnyi; ak ma kinai.

²⁰ Ak kibwa otwogikab Absalom ole mi kwonyoto eng’ goyoto; ak kile, Mi ano Aimaas ak Jonatan? Ak kilenji kwonyoto ichek, Kagoba kolandae kererut ne mi beek. Ak kingo kagocheng’, ama imuchi konyor ichek, koweek kwo Jerusalem.

²¹ Ak kingo kagoba ichek, komong’ eng’ keringonoto bo beek, ak koba komwachi laitoriat Daudi; ak kilenji ichek Daudi, Ong’eetye, ak olande eng’ beek, ochakte: amu kagotil ko u noto Aitopel agobo okwek.

²² King’eet anyun Daudi, ak bik tugul che kimi ak inendet, ak kolandae Jordan: kingochoru asista, ko kima kota komi agot agenge eng’ ichek ne kitomo kolanda eng’ Jordan.

²³ Ak kingogeer Aitopel kole, mata kosub chi kiruogennyi, koiito sigiriennyi, ak kong’eet, kwo ga, kot koit nganasennyi, ak kwo korarji ket bikab gonnyi, ak kogetgei; ak kime; ak kigitupchi kereritab kwandanyi.

²⁴ Yeityo koit Daudi Maanaim. Ak kilanda Absalom eng’ Jordan, inendet ak murenik tugul che bo Israel koboto inendet.

²⁵ Ak kiinde Absalom Amasa koboi luget kogeer Joab. Amasa ko ki weritab chito ne kainennyi ko ki Itra Israelindet, ne kigoipgei ak Abigal cheptab Nahas, chepkametab Seruia kametab Joab.

²⁶ Ak kiteech Israel ak Absalom emetab Gilead.

²⁷ Ak kingoit Daudi Maanaim, koib Sobi weritab Nahas ne bo Raba ne bo lagokab Amon, ak Makir weritab Amiel ne bo Lo-debar, ak Barsilai Gileadindet ne bo Rogelim,

²⁸ itogusiek, tabok, ak terenik, ak nganok, ak sairik, ak busiek, ak bek che kagigel, ak magandek, ak sogoriek, ak igobek,

²⁹ ak kumik, ak mwaitab chego, ak kechirek, ak mugunikab chego, koipchi Daudi, ak bik che kimi koboto inendet, koam: amu kile, Amei rubet bik, ak ko ng’etyotin, ak koamei melelda eng’ ong’atet.