2 SAMUEL 16 - BUKUIT NE TILIL

Siba ak Simei

¹ Ak kingo kagosiir Daudi tulwet barak kitigin, ogeero, kituiyo ak inendet Siba otwogindetab Mepiboset, kogetu sigirok aeng’ che kiga kiito, koibei makatinik bogol aeng’, ak temenik bogol agenge che bo sabibuk che yaamnyotin, ak logoek bogol agenge che bo kemei, ak sotetab divaik.

² Ak kilenji laitoriat Siba, Bo nee tuguchu? Ak kile Siba, Bo sigirok bikab gotab laitoriat, che lanyei; ko bo murenik makatinik ak logoechu bo kemei, che amei; ak bo divaik bik che katanuiso eng’ ong’atet si koee.

³ Ak kile laitoriat, Mi ano weritab kiptaiyandeng’ung’? Ak kilenji Siba laitoriat, Keero, kotebi eng’ Jerusalem: amu kile, Kona rani gotab Israel bounatetab baba.

⁴ Yeityo kolenji laitoriat Siba, Cheguk tuguk tugul che bo Mepiboset. Ak kile Siba, Agutunyi; inganyor chamet eng’ taing’ung’, kiptaiyandennyu, ee laitoriat.

⁵ Ak kingoit laitoriat Daudi Baurim, ogeero, kimong’ eng’ oloto chito ne bo oretab gab Saul, ne kigiguure kainennyi Simei, weritab Gera: kimong’ kochubisionu.

⁶ Ak kiwir Daudi eng’ koik koboto otwogik tugul che bo laitoriat Daudi: ak kimi bik tugul che nyigonen eunnyi ne bo tai ak eunnyi ne bo katam.

⁷ Ak kimwa ko u ni Simei ye kichubisiei, Ui, ui inye, chitab korotik, ak ko chitab Belial:

⁸ kagoweekyin Jehovah korotik tugul che bo gotab Saul, ne kiilaitoran igeer inendet; ak kagonde Jehovah bounatet eutab wering’ung’ Absalom: ak keero, kaginamin eng’ yaitieng’ung’, amu i chitab korotik.

⁹ Kilenji anyun Abisai weritab Seruia laitoriat, Amu nee si kochub kiptaiyandennyu laitoriat sesoni kigome? Asomin ale, chamwa alanda awa atil metinnyi.

¹⁰ Ak kile laitoriat, Kiting’ege nee ak okwek, werikab Seruia? Amu chubisiei, ak amu kamwachi Jehovah inendet kolenji, Chub Daudi; ko ng’o anyun ne mwaei kole, Amu nee si iyai ko u no?

¹¹ Ak kilenji Daudi Abisai, koboto otwogikyik tugul, Ogeero, cheng’ei sobondanyu werinnyu ne kibunu bortanyu: ko tam nee anyun Benjaminindoni, obagakte, ak ongochubis; amu kagong’at Jehovah inendet koyai ko u noto.

¹² Abere keerei Jehovah yaitiet ne kagiyaiywa, ak igeerua Jehovah ne mie agobo chubisioni kagichuba rani.

¹³ Kiba anyun Daudi ak bikyik bandanywa: kiwa Simei kolengel tulwet kotoorjigei inendet, ak kochubisioti, ak kowire inendet koik, ak koseertoi temburiek.

¹⁴ Ak kiit laitoriat, ak bik tugul che kimi koboto inendet, ko kang’etyo kot; ak kiimuuny eng’ yoto.

Komi Aitopel ak Husai koboto Absalom eng’ Jerusalem

¹⁵ Ak kiit Jerusalem Absalom ak bik tugul, murenikab Israel, ak kimi Aitopel ak inendet.

¹⁶ Ak kingoit Husai Arkindet, choruetab Daudi, ole mi Absalom, kolenji Husai Absalom, Ingosob laitoriat, ingosob laitoriat.

¹⁷ Ak kilenji Absalom Husai, Mieindang’ung’ nito ne iyachini chorueng’ung’? Amu nee si mobe ak chorueng’ung’?

¹⁸ Ak kilenji Husai Absalom, Achicha; abunjin inendet ne kolewen Jehovah ak bichu ak murenik tugul che bo Israel, kitebye ak inendet.

¹⁹ Ak kogeny, aboisiechini ng’o? Ne ma eng’ taitab werinnyi? Ko u ye kiaboisie eng’ taitab kwandang’ung’, aboisiei ko u noto eng’ taing’ung’.

²⁰ Kilenji anyun Absalom Aitopel, Mwa kit ne kiyae.

²¹ Ak kilenji Aitopel Absalom, Obaige ak chebaigeinikab kwandang’ung’, che kibagakta korib got; ak kogas Israel tugul kole wechin kwandang’ung’: si kogimegitu che omi tugul.

²² Koiitochi anyun ichek Absalom emait eng’ baragutab got; ak kiipgei Absalom ak chebaigeinikab kwandanyi kogeerei Israel tugul.

²³ Ak ki u kiruogetab Aitopel, ne kiiruochi eng’ betusiechoto, ye teebei chi eng’ ng’olyotab Kamuktaindet: ki u noto anyun kiruogutik tugul che bo Aitopel eng’ Daudi ak eng’ Absalom.