2 SAMUEL 15 - BUKUIT NE TILIL

Komachei Absalom koreb

¹ Ak kingobata ni, kochopchigei Absalom karit koboto mbartanyisiek, ak murenik konom koruai kondoe inendet.

² Ak king’eet Absalom karon inne, ak kotonon eng’ ye negite ormarichet: ak kingotinyei chi age tugul ng’olyo ne ibei kwo gab laitoriat kiruokyinechi, koguurei Absalom konyo ye mi inendet, kolenji, I bo nganaset ano? Ak kole, Bo otwogindeng’ung’ age eng’ bororiosiekab Israel.

³ Kolenji Absalom inendet, Keero, miach ng’aleguk ak ko lititen; ago mami chi ne kiinde laitoriat kogasun.

⁴ Kile kogeny Absalom, Eiye, nda kiga kiyaa aek kiruogindet eng’ emet, ko ngo nyo ole ami chi age tugul ne tinyei ng’olyo anan kiruoget, ayachini imanda!

⁵ Ak kingorikyi chi age tugul kwo kong’uruk eng’ tainnyi, koyogoito eunnyi, konam inendet, ak kong’utut.

⁶ Ak kiyachi Absalom ko u noto Israel tugul che kibendi oldab laitoriat agobo kiruoget: kiichuut ko u noto anyun Absalom mugulelwekab bikab Israel.

⁷ Ak kingogesgei kenyisiek artamu, kolenji Absalom laitoriat, Kaigai ichamwa awa agoito kaarortaennyu, ne kiaarorji Jehovah, eng’ Hebron.

⁸ Amu kiarorte ane otwogindeng’ung’ ye kita ami Gesur eng’ Suria ale, Ngot koweekta Jehovah kogeny iman awa Jerusalem, aboisiechini anyun Jehovah.

⁹ Ak kilenji laitoriat inendet, Ui eng’ kalyet. Kong’eet anyun ak kwo Hebron.

¹⁰ Ago kiiyokto Absalom segeik koba bororiosiek tugul che bo Israel, kolenji, Eng’ sait ne kogas iriaget, omwa ole, Laitorani Absalom eng’ Hebron.

¹¹ Ak kiba bik bogolwogik aeng’u eng’ Jerusalem koboto Absalom, che kiga kiguur, ak kiba eng’ berberindanywa, ak kima kongen kiy.

¹² Ak kiiyokto Absalom keguur Aitopel Gilonindet, toretindetab Daudi, eng’ nganasennyi, Gilo, ye kiigoitoi tiseiywek. Ak kitesak chaamset; amu ki tesoksei bik che namegei ak Absalom.

Komweei Daudi eng’ Jerusalem

¹³ Ak kinyo chito oldab Daudi ne kiibu ng’alek, ak kolenji, Kogosub mugulelwekab bikab Israel Absalom.

¹⁴ Ak kilenji Daudi otwogikyik tugul che kimi ak inendet eng’ Jerusalem, Ong’eetye, ak ongemwei; amu ngo ma u noto, ko mami chi ne chilili eng’ Absalom: ongechakte, si manyoruech ngunoto, ak koibwech yaitiet, ak kobar nganaset eng’ rotwetab chok.

¹⁵ Ak kimwa otwogikab laitoriat kolenji laitoriat, Keero, ki chobotin achek otwogiguk keyai kit age tugul ne kalewen kiptaiyandennyu laitoriat.

¹⁶ Ak kimanda laitoriat, ak kiisub inendet bik tugul che bo gonnyi. Ak kibagakta laitoriat kwonyik taman, che ki chebaigeinik, korib got.

¹⁷ Ak kimanda laitoriat, ak kiisub inendet bik tugul; ak kiba kotebe Bet-merak.

¹⁸ Ak kiba otwogikyik tugul kobun ye negite inendet; ak kiba kondoe laitoriat Keretik tugul, ak Peletik tugul, ak Gitik tugul che ki murenik bogol lo che kiisubu inendet kobunu Gat.

¹⁹ Yeityo kolenji laitoriat Itai Gitindet, Amu nee si inyo kebe tugul aginye? Weeige, ui otebi ak laitoriat: amu i toondet, ne kigionun eng’ oldang’ung’; weeige, ui oldang’ung’.

²⁰ Amu koiitu amut, tos mie amutatin ketogostoi ak kerektoi tugul rani, amu awendi ole kamach? Weeige anyun, ak iweech tupchosieguk; ingoteb koboten rirenet ak imanit.

²¹ Ak kiwolji Itai laitoriat kolenji, Ko u ye sobei Jehovah, ak ko u ye sobei kiptaiyandennyu laitoriat, oldo tugul ole mi kiptaiyandennyu laitoriat, ami oloto agane iman, ane otwogindeng’ung’ ngo eng’ meet anan eng’ sobet.

²² Ak kilenji Daudi Itai, Ui lande. Kilanda anyun Itai Gitindet, ak bikyik tugul, koboto lagok tugul che kimi ak inendet.

²³ Ak kiwaach emet komugul eng’ kutit ne o, ak kilanda bik tugul: ak kilandae laitoriat inendet agine kererutab Kidron, ak kilanda bik tugul, kotokyigei ong’atet.

²⁴ Ak ogeero, kinyo Sadok agine, ak Lawik tugul che kimi koboto inendet, koibei moingetab arorutietab Kamuktaindet; ak kiitu moingetab Kamuktaindet, ak kitogosta Abiatar, agoi komanda bik tugul eng’ nganaset.

²⁵ Ak kilenji laitoriat Sadok, Oib moingetab Kamuktaindet koweek kwo nganaset: ngot anyoru chamet eng’ taitab Jehovah, kotun imutwa kogeny, ak koborua moingonoto ak ole tebe.

²⁶ Ago ngot komwa ko u ni kole, Mabaibai eng’ inye; keero, ami yu, ingoyaiywa ko u ye keerei kole mie.

²⁷ Kimwachi anyun laitoriat kogeny Sadok tisiindet kolenji, Ma i keerindet? Weektege nganaset eng’ kalyet, ak weriguk tuwai, Aimaas wering’ung’, ak Jonatan weritab Abiatar.

²⁸ Keero, atebe ole kilandoe kebendi ong’atet, agoi agas ng’olyo eng’ inye ne imwawa.

²⁹ Kiib anyun Sadok ak Abiatar moingetab Kamuktaindet kogeny kwo Jerusalem: ak kiba kotebe oloto.

³⁰ Ak kitogosta Daudi kobun oret ne kitogoste kebendi tulwetab emitik, ak kiriroti; ak kiga tuigei met, ak kiwendi ko matinyei kweonik: ak kituigei met chi age tugul eng’ bik tugul che kimi koboto inendet, ak kitogosta, koririoti kotogostoi.

³¹ Ak kigimwachi Daudi, kelenji, Mi Aitopel koboto njaamikab Absalom. Ak kile Daudi, Ee Jehovah, asomin ale, wal kiruogetab Aitopel koek berberindo.

³² Ak kingoit Daudi tulwet barak ole kicham kilosune Kamuktaindet, ogeero, kinyo Husai Arkindet kotorok inendet, ko kagogerer ngoriennyi ak komi ng’ung’unyek metinnyi.

³³ Ak kilenji Daudi inendet, Ngot inyone kebe tuwai, iegu milet eng’ ane:

³⁴ ago ngot iweeige nganaset, ak ilenji Absalom, Aegu otwogindeng’ung’, ee laitoriat; ko u ye kia otwogindetab kwandang’ung’ eng’ betusiek che kigosiirto, aegu anyun nguno otwogindeng’ung’: iterterwa anyun kiruogetab Aitopel.

³⁵ Tos mami koboten tisiik, Sadok ak Abiatar? Ko ye igas ng’olyo age tugul ne bunu gotab laitoriat, imwachi Sadok ak Abiatar, tisiik.

³⁶ Keero, tinyei ichek eng’ yoto werikwak aeng’, Aimaas weritab Sadok, ak Jonatan weritab Abiatar; ak oyogune ichek kiy age tugul ne ogase.

³⁷ Kiit anyun nganaset Husai choruetab Daudi; ak kiit Absalom Jerusalem.