2 SAMUEL 14 - BUKUIT NE TILIL

Koweeksei Absalom

¹ Kinai Joab weritab Seruia kole ibwati muguleldab laitoriat Absalom.

² Ak kiiyokto Joab keguur kwondo ne ng’om eng’ Tekoa, ak kolenji, Asain ale, yaige ogergeitu ak chito ne rirei, ak asain ale ilaach ngoroikab rirek, amat iilege mwaita, ago ogergeitu ak kwondo ne kigorir keny agobo chito ne kime:

³ ak iwe oldab laitoriat, ak ing’alalji ko u ni. Konde anyun Joab ng’alek kutitab kwonyoto.

⁴ Ak kingong’alaljin kwonyoto bo Tekoa laitoriat, kobutyi ng’ony, koting’e togennyi ng’ony, kogutung’ji, ak kole, Toreta, ee laitoriat.

⁵ Ak kilenji laitoriat inendet, Amin nee? Ak kiwolji kolenji, A mosok iman; kigome manong’otiondennyu.

⁶ Ak kitinyei otwogindeng’ung’ werik aeng’, ak kiborio tuwai eng’ timin, ama biit chi ne kiibesio ichek, ak kikwer age age ak kobar.

⁷ Ak keero, king’eetyo got komugul koborie otwogindeng’ung’, ak kile, Konu inendet ne kobar ng’etab kamet, si kobiit kebar inendet, agobo sobondab ng’etab kamennyi noto kobar, ak kebar agine ne kata namei tuguk: ak komis mannyu ne kong’et, ama ituukyi manong’otiondennyu kainet anan ko ne ng’etu eng’ ng’ony.

⁸ Ak kilenji laitoriat kwonyoto, Ui gong’ung’, si ang’at keyaun ng’alechato.

⁹ Ak kilenji kwonyoto bo Tekoa laitoriat, Kiptaiyandennyu, ee laitoriat, ingotebena tengegi, ak kotebe gotab baba: ak ingoek ne matinyei ng’ogisto laitoriat ak ng’echerennyi ne bo laitornatet.

¹⁰ Ak kile laitoriat, Chi age tugul ne mwaun ng’olyo imutwa, si mata kotwain kogeny.

¹¹ Yeityo komwa kwonyoto kole, Asomin ale ingobwat laitoriat Jehovah Kamuktaindeng’ung’, si mata kobaris ne yaaktoi korotik, si mabar werinnyu. Ak kile, Ko u ye sobei Jehovah, ko maibutyin ng’ony agot sumeiywot agenge ne bo wering’ung’.

¹² Kole anyun kwonyoto, Asomin ale chamji cheptang’ung’ ne otwogindet komwachi ng’olyot kiptaiyandennyu laitoriat. Ak kile, Mwa.

¹³ Ak kile kwonyoto, Kilya si ibwat kit ne u no agobo bikab Kamuktaindet? Amu ngo mwa laitoriat ng’olyot ne u ni, ko kaigei chi ne tinyei ng’ogisto, amu maimut laitoriat konyo ga nenyi ne kigion.

¹⁴ Amu nyoljinech kebegu ne matiny, ak ki u beek che kagitumji ng’ony, che magimuchi keram kogeny; ama istoi Kamuktaindet sobondo, ago chobei oret si mata koigei ne kigion ne kiging’eeto.

¹⁵ Noto anyun amu kaanyo amwachi ng’olyondoni kiptaiyandennyu laitoriat, ko amu kiimua bik: ak kiale ane otwogindeng’ung’ ne chepto, Ang’alaljini laitoriat; abere imuchi laitoriat koyachi otwogindennyi somennyi.

¹⁶ Amu kasei laitoriat ak kosorua ane otwogindennyi eng’ eutab chito ne machei kobara ak werinnyu koistoenech borotetab Kamuktaindet.

¹⁷ Amwa anyun ane otwogindeng’ung’ ale, Asomin ale, ingomieit ng’olyotab kiptaiyandennyu laitoriat: iguitos kiptaiyandennyu laitoriat kit ne mie ak ne ya ko u malaikaiyatab Kamuktaindet: ak ingoteb Jehovah Kamuktaindeng’ung’ koboten.

¹⁸ Kiwolji anyun laitoriat kwonyoto kolenji, Asomin ale, ameung’ena kiy age tugul ne ateebenen. Ak kile kwonyoto, Ingong’alal kiptaiyandennyu laitoriat nguno.

¹⁹ Ak kile laitoriat, Tos omi ak Joab eng’ ng’alechu tugul? Ak kiwol kwonyoto kole, Ko u ye sobei sobondang’ung’, kiptaiyandennyu laitoriat, mami chi ne imuchi komasta kwo eutab tai anan kwo eutab katam eng’ kiy age tugul ne kagomwa kiptaiyandennyu laitoriat: amu kong’ata otwogindeng’ung’ Joab, ak komwawa ane otwogindeng’ung’ ng’alechuto tugul;

²⁰ kiyai otwogindeng’ung’ Joab kiito, si kobiit kewal kit ne u ng’olyondonito: ak tinyei kiptaiyandennyu ng’omnatet ne u ng’omnatetab malaikaiyatab Kamuktaindet, konai tugul tugul che mi ng’ony.

²¹ Ak kilenji laitoriat Joab, Keer anyun-o, kaayai kioto: ui anyun, imutu nerananato Absalom.

²² Ak kiibutyi ng’ony Joab, kong’uruk, ak koberur laitoriat: ak kile Joab, Kagonai otwogindeng’ung’ rani kole, kaanyoru mieindo eng’ taing’ung’, kiptaiyandennyu, ee laitoriat, amu kagoyachi laitoriat otwogindennyi somennyi.

²³ King’eet anyun Joab kwo Gesur, kwo komut Absalom konyo Jerusalem.

²⁴ Ak kile laitoriat, Ingowo gonnyi, amat konyo kogeera togoch. Kwo anyun Absalom gonnyi, ama keer laitoriat togoch.

²⁵ Kima komi eng’ Israel tugul chito ne kigilosu eng’ kororonindo ko u Absalom: kima kotinyei berutiet kong’eete keldebesiet agoi metinnyi barak.

²⁶ Ak kingonem metinnyi, (amu kiinemu sumeekyik eng’ kagesunetab kenyit age tugul: amu ki nyigisen eng’ inendet, ko kiinemu anyun amu noto:) kibimani sumeekyik ak kiegu sekelisiek bogol aeng, eng’ ratilitab laitoriat.

²⁷ Ak kigisikyi Absalom werik somok, ak chepto agenge, ne kigiguure kainennyi Tamar: ki chepto ne kararan kot.

²⁸ Ak kitebe Absalom kenyisiek aeng’ Jerusalem; ama keer laitoriat togoch.

²⁹ Kiiyokto anyun Absalom keguur Joab, si kobiit koyokto kwo oldab laitoriat; ago ma cham konyo ole mi inendet: kiiyokto kogeny ne bo aeng’, ago ma cham konyo.

³⁰ Kilenji anyun Absalom otwogikyik, Ogeero, negite mbaretab Joab mbarennyu, ak tinyei sairik eng’ mbaranato; oba obeel. Ak kibeel otwogikab Absalom mbaranato.

³¹ Kong’eet anyun Joab ak konyo ole mi Absalom eng’ gonnyi, ak kolenji inendet, Amu nee si kobeel otwogiguk mbarennyu?

³² Ak kiwolji Absalom Joab kolenji, Keero, koaguurin ale, Nyo yu si kobiit ayokten iwe oldab laitoriat, ilenji, Amu nee si anyo eng’ Gesur? Kita mie atebe oloto agoi: chamwa anyun nguno ageer togetab laitoriat; ak ngot atinye tengekto, kobara.

³³ Kinyo anyun Joab oldab laitoriat, ak komwachi: ak kingo kageguur Absalom, konyo anyun oldab laitoriat, ak kong’uruk kot kotiiny toget ng’ony eng’ taitab laitoriat: ak king’utut laitoriat Absalom.