2 SAMUEL 13 - BUKUIT NE TILIL

Ammon, Tamar ak Absalom

¹ Kitinyei Absalom weritab Daudi chepkamet ne kararan, ne kainennyi ko ki Tamar; ak kicham Amnon weritab Daudi inendet.

² Ak kiimgei Amnon kot komian amu chepkametinnyi Tamar; amu ki bergeiyat: ak kigeer Amnon kouuit koyachi kiy age tugul inendet.

³ Ago kitinyei Amnon choruet, ne kainennyi ko ki Jonadab, weritab Simea, ng’etab kametab Daudi: ak ki chi ne ng’alin mising’ Jonadab.

⁴ Ak kilenji inendet, Kolya-o, weritab laitoriat, si isagiti betut age tugul? Ak kilenji Amnon inendet, Amache Tamar chepkametab tupchennyu Absalom.

⁵ Ak kilenji Jonadab inendet, Ru eng’ itogung’ung’, ak iige chito ne miani: si ye nyo kwandang’ung’ kogeerin, ilenji, Asomin ale, ingonyo tupchennyu Tamar konyo kogona amitwogik aam, ak koyaiywa amitwogik eng’ tainnyu, si kobiit ageer, ak kogona eng’ eunnyi, aam.

⁶ Kiru anyun Amnon, koigei chito ne miani: ak kingonyo laitoriat kogeer inendet, kolenji Amnon laitoriat, Asomin ale, ingonyo tupchennyu Tamar, ak koyaiywa makatinik aeng’ ageere, si kobiit kogona eng’ eunnyi aam.

⁷ Koyokto anyun Daudi keguur Tamar eng’ ga, kolenji, Ui gotab ng’etab komet Amnon iyachi amitwogik.

⁸ Kwo anyun Tamar gotab ng’etab kamet Amnon; ak kiruei. Ak kinam busiek che kagitesyi beek, ak kokwanykwany, ak koyai makatinik eng’ tainnyi; ak kobeel.

⁹ Ak kinam tabetab karnet ak koluluk eng’ tainnyi; ago kiesio koam. Ak kile Amnon, Ingomanda bik tugul eng’ yu ami. Ak kimanda chi tugul eng’ ye kimi inendet.

¹⁰ Ak kilenji Amnon Tamar, Ibu amitwogik kobwa goi, si kobiit igona eng’ eung’ung’ aam. Ak kiib Tamar makatinik che kagoyai, koib koba goyoto, koipchi ng’etab kamet Amnon.

¹¹ Ak kingo kagoib makatinichoto koba ye negite inendet, si koam, kosuub inendet, ak kolenji, Nyo keruiye tuwai, tupchennyu.

¹² Ak kiwolji kolenji, Achicha, tupchennyu, amesuuba; amu mami kiy ne u no ne nyolu keyai eng’ Israel: ameyai abusnatani.

¹³ Si awa ano anyun, ane, eng’ tewernatennyu? Ak iige inye age eng’ che abusotin eng’ Israel. Ara anyun, asomin ale ng’alalji laitoriat; amu maetenen abunjin.

¹⁴ Ago ma cham kogas ng’alekyik: ago, amu ki kim kosiir cheboto, ko kisuub ak koruiyo ak inendet.

¹⁵ Yeityo kowech Amnon inendet eng’ weget ne o mising’: amu kieet weget ne kiwech inendet kosiir chamnyet ne kiga chame inendet. Ak kilenji Amnon inendet, Ng’eet, ui.

¹⁶ Ak kilenji inendet, Ma u noto, amu ya yaitioni o keonena kosiir kit ne kaiyaiywa. Ago ma cham kogas ng’alekyik.

¹⁷ Yeityo koguur otwogindet ne kiboisiechin konyo ole mi, ak kolenji, Imaande kwonyi kwo eng’ yu ami, ak itemel kurget ko kagomanda.

¹⁸ Ak kiilaachi cheboto ngoriet ne koi: amu kicham kolaachi tibikab laitoriat che bergeinik ngoroik che u choto. Kiimut anyun otwogindennyi inendet konyo sang’, ak kotemel kurget ko kagomong’ konyo sang’.

¹⁹ Ak kiinde Tamar orek metinnyi, ak kogerer ngoriennyi ne koi ne kiilaachi: ak konamatgei met, ak kwo, koriroti eng’ kutit ne o.

²⁰ Ak kilenji Absalom ng’etab kametab Tamar, inendet, Komi tuwai ak Amnon ng’etab komet? Sis nguno anyun, tupchennyu: inendet ko ng’etab komet; amende kiito muguleldang’ung’. Ak kitebi Tamar inegei eng’ gotab ng’etab kamet Absalom.

²¹ Ago kingogas laitoriat Daudi tuguchuto tugul, konerech mising’.

²² Ak ma mwachi Absalom Amnon kiy ne mie anan ko ne ya: amu kiwech Absalom Amnon, amu kiga suub chepkamennyi Tamar.

²³ Ak ye kingosiirto kenyisiek aeng’u, ko kimi Absalom ak bik che kitilei kororikab kechirek eng’ Baal-hasor, ne mi ye negite Epraim: ak kiguur Absalom werik tugul che bo laitoriat.

²⁴ Ak kimi Absalom ole mi laitoriat, ak kolenji, Keero, tinyei otwogindeng’ung’ bik che tilei kororikab kechirek; asomin ale ingoba laitoriat ak otwogikyik koboto otwogindeng’ung’.

²⁵ Ak kilenji laitoriat Absalom, Achicha, werinnyu, ma mie kebe tugul, si ma kigonin nyigisindo. Ak kiigaigai inendet: ago ma cham kwo, kiiberur inendet.

²⁶ Kile anyun Absalom, Ngot ko mewendi, asomin ale kebe koboto Amnon tupchennyu. Ak kilenji laitoriat inendet, Amu nee si imache obe tuwai?

²⁷ Ago kiigaigai Absalom inendet, kochamji Amnon ak werik tugul che bo laitoriat, koba koboto inendet.

²⁸ Ak king’at Absalom otwogik kolenji, Ogeero, ye kagobaibait muguleldab Amnon eng’ maiyek; ko, ye alenjok, Okwer Amnon, obar anyun inendet, mat oiywei. Ma ane ne kang’atak? Ogimegitu ak onyiganitu.

²⁹ Ak kiyachi otwogikab Absalom Amnon ko u ye kiga ng’at Absalom. Kiing’eetyo anyun werik tugul che bo laitoriat, ak kilany chi tugul nyumbunnyi, ak komwei.

³⁰ Ak ye kita kobendi eng’ oret, koit ng’alek ole kimi Daudi kele, kagobar Absalom werik tugul che bo laitoriat, ak ma ng’et agot agenge eng’ ichek.

³¹ King’eet anyun laitoriat, kogerer ngoroikyik, ak koru eng’ ng’ony; ak kitononso otwogikyik tugul eng’ ole mi inendet ko kagogerer ngoroikwak.

³² Ak kiwol Jonadab, weritab Simea, ng’etab kametab Daudi, kole, Mat kobwat kiptaiyandennyu kole kagobar ichek murenik tugul, werikab laitoriat; amu Amnon inegei ne kame: amu kiga ketil nito eng’ ng’atutietab Absalom koboch betut ne kisuubei chepkamennyi Tamar.

³³ Noto anyun, amat konde kiptaiyandennyu laitoriat kii muguleldanyi, kobwat kole kagobek werik tugul che bo laitoriat: amu Amnon inegei ne kame.

³⁴ Ago kimwei Absalom. Ak kitobendo murenet age ne kiripsei, ak kogeer, ak ogeero, kibwanei bik che chang’, kobunu oretab tegeiyat ne kimi let eng’ inendet.

³⁵ Ak kilenji Jonadab laitoriat, Keero, kabobwa werikab laitoriat: ko u ye kamwa otwogindeng’ung’ ko u noto.

³⁶ Ak kingo kagoges ng’alalet, ogeero, koit werikab laitoriat ak kowaach ak koteeiyo: ak kiite laitoriat agine ak otwogikyik tugul, eng’ kateet ne o.

³⁷ Ago kimwei Absalom, kwo ole mi Talmai weritab Amiur, laitoriatab Gesur. Ak kirirji Daudi werinnyi betut age tugul.

³⁸ Kimwei anyun Absalom, kwo Gesur, ak kitebe oloto kenyisiek somok.

³⁹ Ak kimach mising’ laitoriat Daudi kwo ole mi Absalom: amu kiga konyor kagaigaet agobo Amnon, amu kiga kome.