2 SAMUEL 12 - BUKUIT NE TILIL

Kalewenekab Natan, ak sigunetab Daudi

¹ Ak kiiyokto Jehovah Natan kwo ole mi Daudi. Ak kinyo ole mi inendet ak kolenji, Kimi bik aeng’u nganaset agenge; ki magoriot age, ko kibananiat age.

² Kitinyei ne ki magoriot akwotisiek che chang’ mising’ che bo kechirek ak tuga.

³ Ago kima kotinyei kiy ne ki kibananiat, kobate subendo agenge ne ming’in ne bo kechir, ne kiga al ak kogu: ak kieegitu tuwai, ak lagokyik; kiamei amitwogikyik, ak kiee kikombennyi, ak kirue tegennyi, ak ki u eng’ inendet cheptanyi.

⁴ Ak kinyo kiprutoiyot oldab magoriondonoto, ak ma cham konam ne bo akwennyi ne bo kechirek ak ne bo akwetab tukyik, koeng’ji chichoto kisiirtoi, ne kiga nyonji inendet, ago kinam aruetab kibananiandanato, ak koeng’ji chichoto kiga nyonji inendet.

⁵ Ak kilalyo mising’ neregekab Daudi agobo chichoto: ak kilenji Natan, Ko u ye sobei Jehovah, konyoljin chichoto kiyai kioto kome:

⁶ ak koyook aruanato konyil ang’wan, amu kiyai kiito, ak amu kima kotinyei rirenet.

⁷ Ak kilenji Natan Daudi, I chichoto. Kamwa Jehovah Kamuktaindetab Israel ko u ni kole, Kiaiilin iegu laitoriat ibou Israel, ak kiasorun eng’ eutab Saul;

⁸ ak kiagonin gotab kiptaiyandeng’ung’, ak kiagonin osotikab kiptaiyandeng’ung’ kobwa tegeng’ung’, ak agonin gotab Israel ak ne bo Juda; ak nda kiga ng’ering’itu choto, ta kiatesun tuguk alak ak alak.

⁹ Amu nee anyun si isas ng’olyotab Jehovah, iyai kit ne ya eng’ tainnyi? Koibar Uria Hitindet eng’ rotwetab chok, ak koimutu osotiondennyi koek osotiondeng’ung’, ak koibare inendet rotwetab chok ne bo lagokab Amon.

¹⁰ Ara anyun, magoi istogei rotwetab chok eng’ gong’ung’: amu koisasa, ak koimutu osotiotab Uria Hitindet koek osotiondeng’ung’.

¹¹ Kamwa Jehovah ko u ni kole, Keero, ang’eetun yaitiet eng’ gong’ung’, ak arebenen osotiguk igeeroti, ak agochi ichek chitab kokweng’ung’, ak koruiyo ak osotiguk koluu asista.

¹² Amu koiyai eng’ ung’ot: ago ayae kiito eng’ taitab Israel tugul, ak kogeerei asis.

¹³ Ak kilenji Daudi Natan, Koyachi Jehovah tengekto. Ak kilenji Natan Daudi, Kagoisto Jehovah agine tengektang’ung’; memee.

¹⁴ Ago amu kaigochi eng’ yaitioni bunikab Jehovah boroindo ne o kochubis, komeei iman agine lakwet ne tun kisigun.

¹⁵ Ak kiwa Natan gonnyi. Ak kibir Jehovah lakwet ne kiga sikyi Daudi osotiot ne ki bo Uria, ak kimian kot.

¹⁶ Ak kisa Daudi Kamuktaindet agobo lakwanato; ak kiirugutgei Daudi, ak kiwa go, kwo koru ng’ony kemout komugul.

¹⁷ Ak king’eetyo boisiekab gonnyi kotononio eng’ ye mi inendet, kole kong’eet inendet: ago ma cham, ak ma cham koamis ak icheget.

¹⁸ Ak kime lakwet eng’ betut ne bo tisab. Ak kiiywei otwogikab Daudi komwachi inendet kolenji kagome lakwet: amu kile, Ogeero, ye kota kosobei lakwet, ko koging’alalji inendet, ama cham kogas ng’alekyok: kobirtogei anyun ne tia ngot kelenji, kagome lakwet?

¹⁹ Ago kingogeer Daudi kochaamjingei otwogikyik, konai Daudi kole kagome; ak kimwachi Daudi otwogikyik, kolenji, Kagome lakwet? Ak kile, Kagome.

²⁰ King’eet anyun Daudi eng’ ng’ony, kwo koungei, ak koiilgei, ak kolaach ngoroik alak; yeityo konyo gotab Jehovah konyo kosa: yeityo kwo gonnyi; ak kingomach amitwogik, kindochi tainnyi, ak kiam.

²¹ Kilenji anyun otwogikyik, Nee kii koiyai? Koirugutige ak irire agobo lakwet yu kota kosobei; ago kongome, ing’eet ak iamisie.

²² Ak kile, Kongota kosobei lakwet, ko koarugutige ak arire: amu koalen, Tamangab korirena Jehovah, si kosob lakwet?

²³ Ago nguno ko kagome, ko ta arugutyige nee? Ta amuchi aweech kosob kogeny? Ta awendi ole mi inendet, ago maweeksei inendet konyonei oli ami.

²⁴ Ak kiigaigai Daudi Bat-seba osotiondennyi, ak kiwa ole mi inendet kotuiyogei: ak kosich werit, ak koguure kainennyi Solomon. Ak kicham Jehovah inendet;

²⁵ ak kiiyoktae ng’alek Natan maotiot, keguure kainennyi Jedidia, agobo Jehovah.

Keluulei Raba

²⁶ Ak kibargei Joab ak Raba ne bo lagokab Amon, ak kiluul nganasetab kaplaitoriat.

²⁷ Ak kiiyokto Joab bik koba ole mi Daudi, ak komwachi kolenji, Kogebarge ak Raba, ee, koaluul nganasetab beek.

²⁸ Noto anyun, iyum bik che ng’etunotin, ak iteech ye tokyingei nganaset, ak inam: si maanam ane nganaset, ak kemwaitae kainennyu.

²⁹ Ak kiiyum Daudi bik tugul, ak koba Raba, ak kobargei ak nganasanato, ak koluul.

³⁰ Kiinemune laitoriandenywa narietab laitornatet; ak nyigisindanyi ko ki talentait agenge ne bo tahabu, ne kiginde koik che bo kamanutiet ne o; ak kigigerjine Daudi metit. Ak kiib barunenik che chang’ mising’ che bo nganaset komong’.

³¹ Ak kiimut bik che kimi orit komong’, ak konde ichek koboisie musumenosiek, ak koboisie karik che kiburburenisie, ak koboisie aonokab karik, ak kobirji kobois eng’ ole kibeele matabaruk, ak kiyachi ko u noto nganasok tugul che bo lagokab Amon. Ak kiweek Daudi ak bik tugul koba Jerusalem.