2 SAMUEL 11 - BUKUIT NE TILIL

Daudi, Bat-seba ak Uria

¹ Ak kingogesgei kenyit, eng’ betusiek che kicham kobendi laitorinik luget, koyokto Daudi Joab koboto otwogikyik, ak Israel tugul; ak kobar lagokab Amon, ak kiyiem Raba. Ago kitebi Daudi eng’ Jerusalem.

² Ak kingoit koskoleny, kong’eet Daudi eng’ itogunnyi, ak kowendote gotab laitoriat barak: ak kingomi barak, kogeer kwondo kounegei; ak ki kararan kot kwonyoto.

³ Kiiyokto Daudi bik koteeb agobo kwonyoto. Ak kile age, Ma Bat-seba nito cheptab Eliam, osotiotab Uria Hitindet?

⁴ Ak kiiyokto Daudi bik koba kimut; ak kinyo ole mi inendet, ak kiruiyo ak inendet; (amu kiga koanyinygei eng’ muruonindanyi;) ak kiweektagei kwo gonnyi.

⁵ Ak kimanach kwonyoto; ak kiiyokto kemwachi Daudi, kole, A managat.

⁶ Ak kiiyokto Daudi chi kwo ole mi Joab, kolenji, Iyokwa Uria Hitindet. Ak kiiyokto Joab Uria kwo ole mi Daudi.

⁷ Ak kingoit Uria ole mi inendet, koteebe Daudi inendet agobo Joab, ak ole chamdogei bik ak ole kiborto luget.

⁸ Ak kilenji Daudi Uria, Chortege, ui gong’ung’, ak iun kelyeguk. Ak kiwa Uria eng’ gotab laitoriat, ak kigisube inendet amitwogik che kibunu laitoriat.

⁹ Ago kiru Uria kurgetab gotab laitoriat koboto otwogik tugul che bo kiptaiyandennyi, ma chortagei kwo gonnyi.

¹⁰ Ak kingo kagomwachi ichek Daudi kolenji, Ma chortagei Uria kwo gonnyi, kolenji Daudi Uria, Kama ibunu banda? Amu nee anyun si mechortege iwe gong’ung’?

¹¹ Ak kilenji Uria Daudi, Tebe keriosiek moinget, ak Israel, ak Juda; ak menyei kewet kiptaiyandennyu Joab, ak otwogikab kiptaiyandennyu; awe anyun ane gonnyu, aamisie ak aeeise, ak keruiye ak osotiondennyu? Ko u ye isobe, ak ko u ye sobei sobondang’ung’, mayae kioto.

¹² Ak kilenji Daudi Uria, Beni olito rani, ak mutai achamun iwe. Kibeni anyun Uria Jerusalem betunoto, ak betut ne kiisubi noto.

¹³ Ak kingoguur Daudi inendet, koamis ak koeeiso eng’ tainnyi; ak kiigochi koee kot kobogit: ak kiwa koskoleny komanda kwo koru eng’ itogunnyi koboto otwogikab kiptaiyandennyi, ago ma chortagei kwo gonnyi.

¹⁴ Ak kingo kagoeech, kosirji Daudi baruet Joab, ak koyoktae Uria.

¹⁵ Ak kisir eng’ baruanato kole, Onde Uria tai eng’ luget ne ng’wan mising’, ak ochuchuige obagaket inendet, si kobiit kebar kome.

¹⁶ Ak kingota koribei Joab nganaset, konde Uria komosta ne kimi murenik che nyigonen.

¹⁷ Ak kimanda bikab nganaset koba kobargei ak Joab: ak kibek bik alak eng’ ichek, eng’ otwogikab Daudi; ak kime Uria Hitindet agine.

¹⁸ Kiiyokto anyun Joab kemwachi Daudi tuguk tugul agobo luget;

¹⁹ ak king’at chito ne kiga iyokto kolenji, Ye kaimwachi laitoriat tuguk tugul agobo luget kogesgei,

²⁰ ko, ngot konerech laitoriat, ak kolenjin, Amu nee si orikyi nganaset obarge? Kama ongen ole imuchi komwogok eng’ irimet?

²¹ Ng’o ne kibar Abimelek weritab Jerubeset? Kima wire kwondo age inendet isiet eng’ irimet, ak kimechi Tebes? Amu nee anyun si orikyi irimet? Ile, Kigome otwogindeng’ung’ Uria Hitindet agine.

²² Kiwa anyun ne kigiyokto, ak kiit ak koborji Daudi tuguk tugul che kiga iyoktae Joab inendet.

²³ Ak kilenji chichoto Daudi, Kiiterterech bichoto, kiimong’jech eng’ kewet, ak kigibaratege kot koit ye kibunei eng’ ormarichet.

²⁴ Ak kimwok mwogik otwogiguk eng’ irimet; ak kibek alak eng’ otwogikab laitoriat, ak kime agine otwogindeng’ung’ Uria Hitindet.

²⁵ Kolenji Daudi chichoto kagiyogu, Imwachini Joab ko u ni ilenjini, Ameng’ koiimin ng’olyondoni, amu barei rotwetab chok age ko u ye barei age: igimit lugeng’ung’ kota kogimit, si kobargei ak nganaset, ak oterter: ak icheer inendet.

²⁶ Ak kingogas osotiotab Uria kole kogome manong’otiondennyi, kote agobo manong’otiondennyi.

²⁷ Ak kingobata kateet, koyokto Daudi kimut konyo gonnyi, ak kiek osotiondennyi, ak kisikyi ng’etet. Ago ma cham Jehovah kioto kiyai Daudi.