2 SAMUEL 10 - BUKUIT NE TILIL

Kobaregei Israelik ak Amonik ak Suriek

¹ Ak kingobata nito, kome laitoriatab lagokab Amon, ak kilaitoran Hanun werinnyi kogeer inendet.

² Ak kile Daudi, Ayachini ne mie Hanun weritab Nahas, ko u ye kiyaiywa ne mie kwandanyi. Kiiyokto anyun Daudi bik koba kogaigai inendet amu kwandanyi. Ak kiit otwogikab Daudi emetab lagokab Amon.

³ Ago kilenji bounikab lagokab Amon Hanun kiptaiyandenywa, Ibwati ile konyiti Daudi kwandang’ung’, kot koyogun kagoigoik? Ma iyok Daudi otwogikyik kobwa oldang’ung’ kosiach nganaset, ak kosegei, ak kobar?

⁴ Kinam anyun Hanun otwogikab Daudi, ak konem kebeber eng’ tamnokwak, ak kotil ngoroikwak komut kwenut, kobochit ngorook, ak kounda koba.

⁵ Kingemwachi Daudi ng’olyondonoto, koyokto bik kotorokta; amu kiililandos bichoto mising’. Ak kile laitoriat, Otebi eng’ Jeriko agoi kobityo tamnokwok, ye ibata, obwa.

⁶ Ak kingogeer lagokab Amon kole kagoyaagitu icheget eng’ Daudi, koyokto lagokab Amon keguur Suriekab Bet-reob ak Suriekab Soba, si konyor melekto, murenik elfusiek tiptemu che bunei kelyek, koboto laitoriat Maaka ak murenik elfut, ak murenik elfusiek taman ak aeng’ che bo Tob.

⁷ Ak kingogas Daudi, koyokto Joab ak luget tugul ne bo murenik che kimen.

⁸ Ak kibwa lagokab Amon, ak kotet luget eng’ ye kibunei eng’ ormarich: ak kimi ichegei Suriekab Soba, ak che bo Rehob, ak murenikab Tob ak che bo Maaka, eng’ warenget.

⁹ Ak kingogeer Joab kole kagetet luget agobo inendet eng’ tai ak let, kokwei murenik che kigilewen che bo Israel, ak kotet kobargei ak Suriek:

¹⁰ ak kiinde bik che kiga ng’et, eutab Abisai, ng’etab kamet, ak kitet ichek si kobargei ak lagokab Amon.

¹¹ Ak kile, Ngot kogimegitu Suriek kotertera, itoreta: ago ngot kogimegitu lagokab Amon koterterin, anyo atoretin.

¹² Nyiganitu, ingeegu murenik agobo bikyok, ak nganasokab Kamuktaindennyo: ak ingoyai Jehovah ko u ye keerei kole mie.

¹³ Kirikta anyun Joab ak murenik che kimi ak inendet, koba luget kobargei ak Suriek: ak kimwee inendet.

¹⁴ Ak kingogeer lagokab Amon kole kagomwei Suriek, komwei agichek eng’ taitab Abisai, ak kiba nganaset. Kiweek Joab anyun eng’ ole kimi lagokab Amon, ak kibwa Jerusalem.

¹⁵ Ak kingogeer Suriek kole kagiterter ichek eng’ taitab Israel, koyumgei.

¹⁶ Ak kiiyokto Hadareser kimut Suriek che kimi Ainet bitonin: ak kibwa Helam, koboto Sobak kiptaiyatab lugetab Hadareser kondoune.

¹⁷ Ak kigimwachi Daudi; ak kiiyum Israel tugul, ak kilandae Jordan, ak koba Helam. Ak kitetgei Suriek kotokyigei Daudi, ak kobargei ak inendet.

¹⁸ Ak kimwee Suriek Israel; ak kibar Daudi Suriek bogol tisab che bo karisiek, ak murenik elfusiek artam che kilanyei mbartanyisiek, ak kibar Sobak kiptaiyatab lugenywa komechi yoto.

¹⁹ Ak kingogeer laitorinik tugul che ki otwogikab Hadareser kole kagiterter ichek eng’ taitab Israel, koyai kalyet ak Israel, ak koot ichek. Koiywei anyun Suriek ko ta kotoret lagokab Amon kogeny.