2 SAMUEL 1 - BUKUIT NE TILIL

Kogasei Daudi agobo meetab Saul

¹ Ak kingobata meetab Saul, ko kagoweek Daudi kobunu baretab Amalegik, ko kagobeni Daudi betusiek aeng’ eng’ Siklag;

² eng’ betutab somok, ogeero, konyo chito eng’ nganaset ne kimi Saul ko kererotin ngoroikyik, ak komi ng’ung’unyek metinnyi: ak kingoit ole mi Daudi, kobutyi ng’ony, kogutung’ji.

³ Ak kilenji Daudi inendet, Ibunu ano? Ak kilenji inendet, Koachilili eng’ nganasetab Israel.

⁴ Ak kiteebe Daudi inendet kolenji, Kitepto ano ng’alek? Asomin ale imwawa. Ak kiwol kole, Kimwei bik eng’ luget, ak kogeny, kiibutyot bik che chang’ ak kobek; ak kigome agine Saul ak Jonatan werinnyi.

⁵ Ak kilenji Daudi murenonoto kimwachin inendet, Inae nee ile kigome Saul ak Jonatan werinnyi?

⁶ Ak kilenji murenenoto kimwachin inendet, Ye kita ami tulwetab Gilboa, keero, kitiiegei Saul ng’otinnyi; ak keero, kion inendet mising’ karisiek ak bik che lanyei mbartanyisiek.

⁷ Ak kingowelelgei, kogeera, ak kotwekwa. Ak kiawolji alenji, Ami yu.

⁸ Ak kilenja, I ng’o? Ak kiawolji alenji, A Amalegindet.

⁹ Ak kilenja, Asomin ale, tonon eng’ yu ami, ak ibara, amu kagonama bichiindo; amu ta asobe.

¹⁰ Atonone anyun yoto kimitei, ak abar, amu kianai eng’ iman ale ma komuchi kosob ko kagobut: ak kianemu kutwetab laitornatet ne kimi metinnyi, ak karnet ne kimi eunnyi, ak kaibu kobwa yu aipchi kiptaiyandennyu.

¹¹ Konam anyun Daudi ngoroikyik kogerer; ak kiyai ko u noto bik tugul che kimi ak inendet:

¹² ak kiiteiyo ak koririo ak korugutgei agoi koskoleny agobo Saul ak Jonatan werinnyi, ak agobo bikab Jehovah, ak gotab Israel; amu kibek eng’ rotokab chok.

¹³ Ak kilenji Daudi murenonoto kimwachin inendet ng’alechato, I bo gab ng’o? Ak kiwol kole, A weritab bunotiot, Amalegindet.

¹⁴ Ak kilenji Daudi inendet, Kolya si meiywei ichuul eung’ung’ ibar ne iilat ne bo Jehovah?

¹⁵ Ak kiguur Daudi age eng’ murenik, ak kilenji, Rikte ak ibar inendet. Ak kieb inendet kome.

¹⁶ Ak kilenji Daudi inendet, Ingotebe korotiguk meting’ung’ amu kagobaorian kuting’ung’ koruogun, kole, Kiabar ne iilat ne bo Jehovah.

Korirjin Daudi Saul ak Jonatan

¹⁷ Ak kirirji Daudi Saul ak Jonatan werinnyi eng’ rirechu:

¹⁸ ak kimwachi ichek konet bikab Juda tiendab kwanget: ogeero, kigisirji bukuitab Jasar.

¹⁹ Ee Israel, kigibar torornateng’ung’ eng’ komosweguk che tororen! Kiibututa ano che kimen!

²⁰ Mat omwaite eng’ Gat, Mat obarte eng’ ortinwekab Askelon; Si maboiboitu tibikab Pilistik, Si mailosgei tibikab che ma kimuratan.

²¹ Okwek tulonokab Gilboa, Mat kobiitunenak rewot anan ropta, anan mbarenik che mbarenikab kagochinoik: Amu kigiwirta eng’ tewernatet long’etab inendet ne kim eng’ oloto, Long’etab Saul, ama kiile mwaita.

²² Eng’ korotikab che kigibar, Eng’ mwanikab che kimen, Ko ma week let kwangetab Jonatan, Ama week buch rotwetab chok ne bo Saul.

²³ Ki kororon Saul ak Jonatan ak ki chamotin eng’ sobonwekwak, Ak ma besio eng’ meenywa; Ki chepcheben kosiir kipsichinik, Ki kimen kosiir ng’etunyik.

²⁴ Okwek tibikab Israel, oririe agobo Saul, Inendet ne kiilaakwok ngoroik che biriren che bo boiboiyet, Ne kiinde lelestab tahabu ngoroikwok.

²⁵ Kiibututa ano che kimen eng’ kwenutab boriet! Kigibar Jonatan eng’ komosweguk che tororen.

²⁶ Aarogeni amu inye, tupchennyu Jonatan: Kiigona abaibait mising’: Ki bo kwong’et chamnyeng’ung’ ne kiichama, Kisiirei chamnyetab kwonyik.

²⁷ Kiibututa ano che kimen, Ak kibetyo karikab luget!