2 PETERO 3 - BUKUIT NE TILIL

Betutab nyonunetab Kiptaiyat

¹ Chamanichu, baruani asirwok nguno ko ne bo aeng’, ak eng’ tuwai ang’eeti kabwatutikwok che matinyei kenisiet ye agonok obwat;

² si obwat ng’alek che kimwa maotik che tililen eng’ tai, ak ng’atutietab Kiptaiyat ak ko Yetindet eng’ bikwok che kiyoktoi:

³ korok, ongen ole tun bwanei chombilik ak chombilisiet eng’ betusiek che bo let, che isubi magutikwak,

⁴ ak komwaei kolen, Mi ano arorutietab nyonunennyi? Amu, koboch ye kingoruiyo kwanisiekyok, komi tuguk tugul ko u kit ne ki u koboch taunetab yaetab ng’ony.

⁵ Amu kwetyin ichegei koutie kole kimi kipsengwetisiek koboch keny, ak ng’ony ne kigiyai eng’ beek ak komi kwenutab beek, eng’ ng’olyotab Jehovah;

⁶ kimarane beechoto ng’onyut ne ki bo betusiechoto, ak kilus:

⁷ ago kipsengwetisiek ak ng’onyut che bo nguno, ko kigigonorji mat eng’ ng’olyondonoto, kogonor agoi betutab kiruoget ak ng’emisietab bik che maiywei Jehovah.

⁸ Ago amoutie ng’olyondoni, chamanichu, ole betut agenge eng’ Kiptaiyat ko kergei ak kenyisiek elfut, ak ko kergei kenyisiek elfut ak betut agenge.

⁹ Maigaegei Kiptaiyat eng’ arorutiennyi, ko u ye iiti alak kagaetab ge; ago muitoi agobo okwek, mamachei kolus chi age tugul, ago machei kobwanji tugul sigunet.

¹⁰ Ago tun nyonei betutab Kiptaiyat ko u chorin; ne siirtoe kipsengwetisiek eng’ cheet ne o, ak kochootyo tuguk tugul che kigiyae ng’ony ak barak eng’ mat ne korom, ak kolal ng’onyut ak boisionik che mi.

Nyolu kochopgei bik

¹¹ Amu tun chootos tuguchuto tugul ko u nito, ko nyolu oegu bik che u nee eng’ atebet ne tilil ak kaiyweetab Jehovah,

¹² ogeni nyonunetab betutab Jehovah, ak ogiili, amu noto anyun chootos kipsengwetisiek eng’ mat, ak kochootyo tuguk tugul che kigiyae ng’ony ak barak eng’ mat ne korom?

¹³ Ago, kigeni kipsengwet ne leel ak ng’onyut ne leel ko u arorutiennyi, ole menyei imanda.

¹⁴ Noto anyun, chamanichu, amu ogeni tuguchoto, ogiilge si tun kenyoruok omi eng’ kalyet ko motinye tisia amotinye lelut eng’ tainnyi.

¹⁵ Ak oiit ole muitaetab Kiptaiyandennyo ko yetunet; ko u ye kisirwak agine Paulo, tupchennyo ne kechame, ko u ng’omnatet ne kigigochi;

¹⁶ ko u eng’ baronokyik tugul agichek, kong’alal agobo tuguchuto eng’ baronochoto; ole mi tuguk alak che uuen kiguiyo, che igunuri che maingen kiy, ak che ma tononiotin, ko u ye itoi sirutik chun alak, kot koit ng’emisienywa.

¹⁷ Ko okwek anyun, chamanichu, amu kaosib onai tuguchuto, oripge, si maichuutok kachiliiletab bistoik, ak obutye eng’ tononeng’wong’.

¹⁸ Ago onerie eng’ mieindo ak naet ne bo Kiptaiyandennyo ak ko Yetindennyo Jesu Kristo. Nenyi torornatet nguno agoi koigeny. Amen.