2 PETERO 2 - BUKUIT NE TILIL

Maotik che bo lembech ak sobet ne ya

¹ Ago kibiit maotik che bo lembech agichek eng’ kwenutab bik, ko u ye ta kobiitu agine eng’ kwenung’wong’ konetikab lembech, che ibu eng’ ung’ot pcheutikab ng’emisiet, koesioi agot Kiptaiyat ne kial ichek, koipchingei ng’emisiet ne chogu.

² Ak isubi bik che chang’ magutikwak che yaachen; kimwaitoe ne ya oretab imanit amu ichek.

³ Ak kocheng’jingei borotet eng’ okwek eng’ ng’alekab ng’alset amu kasenywa ne bo miat: che ma igaegei kiruogenywa koboch keny, ama ruei ng’emisienywa.

⁴ Amu ngot ko kima rire Jehovah malaikaisiek ye kingoyai tengekto, ago kitoorji oldab kiruoget, ak konde keringonik che bo mesundeito, kerib kot koit kiruoget;

⁵ ak kima rire ng’onyut ne bo keny, ago kirib Noa ak bik alak tisab amdoindet ne bo imanda, ye kingoipchi maranet ng’onyutab bik che maiywei Jehovah;

⁶ ak koruokyi nganasokab Sodom ak Gomora, kogabui, kowal koek orek, koyai koek kaborunet eng’ ichek che ta kotebyei ko maiywei Jehovah;

⁷ ak kosor Lot chitab imanda, ne kinyalili mising’ amu atebosiek che yaachen che bo kiptengeginik,

⁸ (amu ye kimenyei chichoto bo imanda kwenunywa, kogeerei ak kogasei, kous muguleldanyi ne bo imanda eng’ betut age tugul eng’ boisiosiekab ngelelnatet:)

⁹ ingen anyun Kiptaiyat kosor eng’ yomset che iywei Jehovah, ak korib che ma bo imanda kot koit betutab kiruoget, si tun kiruokyi;

¹⁰ ago eng’ magetab muruonindo, ak kosasei bounatet. Che koromen, che isubi magutikwak, che mabotandos ye chubei che tororen.

¹¹ Agot nganda siirtoot malaikaisiek, che siirei mising’ eng’ kimnatet ak kamuktaet, ko maipchin ichek kiruogetab chubisiet konyo taitab Kiptaiyat.

¹² Ago bichuto matinyei ng’omnatet, che kigisich kityo ko u tiong’ik si kenamei ak kebarei, che chubisiei eng’ ng’alek che maingen, ko tun king’emei iman eng’ ng’emisienywa,

¹³ che nyoru nyalilda, noto ko melektab yaitiet; che iiti kole boiboiyet ye bogitos bet, berutik ak tisonok, che iboiboigei eng’ igorwekwak che bo chamnyet, ye oamisie tugul;

¹⁴ bik che tinyei konyek che nyiitotin ibetab ge, amaimuchi kometo tengekto; che ichuuti sobonwek che ma tononiotin; che tinyei mugulelwek che kigonetgei kasetab miat; lagokab chubet;

¹⁵ kingobagakta oretab iman, koba komasta, kosub oretab Balaam ne bo gab Beor ne kicham melektab yaitiet;

¹⁶ ago kigiger kong’ amu bistoennyi: king’alal sigiriet ne namat kut eng’ kutitab chi ak korany iywekab maotiondonoto.

¹⁷ Chuto kondametusiek che matinyei beek, ak ko bolik che iboti usonet; che kigigonorji tuuindab mesundeito.

¹⁸ Amu, ye mwaei ng’alek che koromen che bo losetab ge, kochuutu eng’ magutikab borto, ak eng’ maget ne ya, bik che katoi kochililyo eng’ ichek che mi eng’ kenisiet:

¹⁹ koarorjin ichek katiaget, ago icheget ko otwogikab ng’emisiet; amu inendet ne iterteri chito age, koyaei chichoto koek otwogindet.

²⁰ Amu ye kagochililye muruonindab ng’ony eng’ naet ne naei Kiptaiyat ak ko Yetindet Jesu Kristo, ko ngot ko ta koratgei kogeny ak tuguchoto ak kiterter, koyaitu atebenywa ne bo let kosiir ne bo tai.

²¹ Amu kita kaigai eng’ ichek ko ma nai oretab imanda, kosiir, ye kingonai, koweektagei let eng’ ng’atutiet ne tilil ne kiga kigochi.

²² Kigoyaak eng’ icheget ko u ye mwaei kalewenetab iman, kole, Weekyingei seset kang’undaikyik, ak kwo komildaegei ng’atatek kogeny toret ne kaga kiun.