2 PETERO 1 - BUKUIT NE TILIL

Kagatet

¹ Simon Petero, otwogindet ak ko ne kiyoktoi ne bo Jesu Kristo, asirjini ichek che kigenyoru tugul kayanet ne kararan mising’ eng’ imandab Jehovah nenyo ak ko Yetindennyo Jesu Kristo:

² Ingotesak mieindo ak kalyet eng’ okwek eng’ naet ne ongen Jehovah ak Jesu Kiptaiyandennyo.

Tuguk che miachen nyoru bikab Kristo, ak atebetab tuguchoto

³ Amu kigonech kamuktaetab Jehovah tuguk tugul che nyoljin sobondo ak kaiyweet ne kiywei Jehovah, eng’ naet ne kinae inendet ne kiguurech eng’ torornatennyi ak mieindanyi;

⁴ kigogonech eng’ choto arorutik che miachen mising’ ak ko eechen inne; si kobiit oegu eng’ chuto yamdoikab atebetab Jehovah, ko kaochililye ng’emisiet ne mi ng’ony amu maget ne ya.

⁵ Ee, amu ng’olyondonito ye kaotes kagiiletab ge tugul eng’ komostang’wong’, otesyi mieindo kayaneng’wong’; ak otesyi naet mieindo;

⁶ ak otesyi ribetab ge naet; ak otesyi muitaet ribetab ge; ak otesyi kaiyweetab Jehovah, muitaet;

⁷ ak otesyi chametab tupchosiek kaiyweetab Jehovah; ak otesyi chamnyet chametab tupchosiek.

⁸ Amu ngot komitei eng’ okwek tuguchuto ak kotesak, koyaok si mochorirense anan ko che maiyiei logoek eng’ naetab Kiptaiyandennyo Jesu Kristo.

⁹ Amu inendet ne matinyei tuguchuto, ko kipkoratiat ak kogeerei kit ne mi ole negit kityo ak koutie katililet eng’ tengekwogikyik che bo keny.

¹⁰ Eng’ noto anyun, che kitupche, ogiilge mising’ inne, oyai kuureng’wong’ ak leweneng’wong’ kogimit: amu ngot oyai tuguchuto ko magoi obutye matiny:

¹¹ amu kigonok ko u noto eng’ chang’indo ochut bounatetab koigeny ne bo Kiptaiyandennyo ak ko Yetindet Jesu Kristo.

K negit kome Petero

¹² Noto anyun achobege kotugul abwatwok tuguchuto, agot ngongen choto, ak o lumdotin eng’ imanit ne otinye.

¹³ Ak abwati ale mie ko ta ami eng’ bori, ang’eetak eng’ kabwatet ne abwatwok;

¹⁴ angen ale nyonei kochogu metoetab bortanyu, ko u ye kiga mwawa Kiptaiyandennyo Jesu Kristo.

¹⁵ Ee, agiilige si ye tun kaame omuch obwat tuguchu tugul eng’ boroindo age tugul.

Baornatetab Petero, ak ne bo maotik

¹⁶ Amu kima kisub atindonik che kigichobei eng’ ng’omnatet, ye kingemwawok kimnatet ak nyonunetab Kiptaiyandennyo Jesu Kristo, kigi baorinik che kigigeer etunatennyi,

¹⁷ amu kitaach teegisto ak torornatet eng’ Jehovah Kwanda, ye kinyonji inendet kutit ne kibunu lilindo ne bo etunatet, kole, Ni ko Werinnyu chamanennyu, ne abaibai mising’ eng’ inendet:

¹⁸ ak kigigas kutinito kobunu kipsengwet, ye kigimi koboto inendet eng’ tulwet ne tilil.

¹⁹ Ak kitinye ng’olyotab maoinatet ne bo iman inne; ne oyae ne mie ye orib, ko u tait ne ikweng’sei eng’ ole imen, kot koeech, ak kochorji mugulelwekwok taboiyatab karon:

²⁰ ye kaonai ni korok, ole mami maoinatetab sirutik ne iboru chito inegei kaguiyennyi.

²¹ Amu mami maoinatet ne kigobiit eng’ magetab chi: ago king’alali bik eng’ Jehovah, kondochin Tamirmiriet ne Tilil.