2 LAITORINIK 3 - BUKUIT NE TILIL

Jeoram laitoriatab Israel: kobaregei ak Moab

¹ Kitoi kolaitoran Jeoram weritab Ahab eng’ Israel eng’ Samaria eng’ kenyitab taman ak sisiit ne bo Jeosapat laitortiatab Juda, ak kilaitoran kenyisiek taman ak aeng’.

² Ak kiyai yaitiet eng’ taitab Jehovah; ago ma yai ko u kwandanyi, anan ko u kamet: amu kiisto toloitab Baal ne kiga yai kwandanyi.

³ Ago kinam tengekwogikab Jeroboam weritab Nebat, che kiibeete Israel si koyai tengekto; ma istoegei.

⁴ Kitinyei Mesa laitoriatab Moab kechirek; ak kiigochi laitoriatab Israel kororikab arekab kechir elfusiek bogol, koboto che bo mengichik elfusiek bogol.

⁵ Ago kingome Ahab, kongelelji laitoriatab Moab laitoriatab Israel.

⁶ Ak kimanda laitoriat Jeoram eng’ Samaria eng’ betusiechoto, ak koyum Israel tugul.

⁷ Ak kiwa ak koyokto chito kwo oldab Jeosapat laitoriatab Juda, kolenji, Koingelelja laitoriatab Moab: tos ichame kebe tuwai Moab kebe kebar? Ak kile, Achame ketogoste: a u kit ne i u, ak u bikyuk biguk, ak u mbartanyisiekyuk mbartanyisieguk.

⁸ Ak kile, Kitogostoe oret ne bunei ano? Ak kiwol kole, Kitogoste oretab ong’atetab Edom.

⁹ Koba anyun laitoriatab Israel, ak laitoriatab Juda, ak laitoriatab Edom: ak kiyiem emet eng’ bandab betusiek tisab: ak kima komi beek che eei luget, anan ko tuga che kikweriei icheget.

¹⁰ Ak kile laitoriatab Israel, Bwa! Amu kogoguur Jehovah laitorinichu somok kibagenge konde eunekab Moab.

¹¹ Ago kile Jeosapat, Mami yu maotiotab Jehovah, keteepse eng’ Jehovah inendet? Ak kiwol chito age eng’ otwogikab laitoriatab Israel kole, Mi yu Elisha weritab Sapat, ne kigerjin beek Elija.

¹² Ak kile Jeosapat, Mi ng’olyotab Jehovah koboto inendet. Kochortagei anyun laitoriatab Israel ak Jeosapat koboto laitoriatab Edom koba ole mi inendet.

¹³ Ak kilenji Elisha laitoriatab Israel, Kiting’ege nee ak inye? Ui ole mi maotikab kwandang’ung’, ak maotikab komet. Ak kilenji laitoriatab Israel inendet, Achicha: amu kogoguur Jehovah laitorinichu somok kibagenge, konde eunekab Moab.

¹⁴ Ak kile Elisha, Ko u ye sobei Jehovah ne bo lugosiek, ne atonone tainnyi, ko nda kama agonyiti Jeosapat laitoriatab Juda amu mi yu, ko kama ko ta agusyinin kong’ iman, anan ageerin.

¹⁵ Ago imutwa nguno butindet. Ak kingobut chichoto kibugandet, konyonji inendet eutab Jehovah.

¹⁶ Ak kile, Kamwa Jehovah ko u ni kole, Obal kererjosiek che chang’ eng’ tembwoni.

¹⁷ Amu kamwa Jehovah ko u ni kole, Mogeere usonet, anan ogeer ropta, ago nyiiei beek tembwonin: ak oee okwek, ak tukwok ak tiong’ikwok.

¹⁸ Ago ni ko kit ne ming’in eng’ taitab Jehovah: indoi kogeny Moabik eunekwok.

¹⁹ Ak obare nganaset age tugul ne ng’otat, ak nganaset age tugul ne kararan, ak oluul ketit age tugul ne mie, ak oger kondametusiek tugul che bo beek, ak ong’em eng’ koik koret age tugul ne mie.

²⁰ Ak ki eng’ karon, eng’ olo bo sait ne kigoitoe kagochinet, ogeero, kibwa beek che kibunei oretab Edom, ak kinyi emet beek.

²¹ Kingogas anyun Moabik tugul kole, kotogos laitorinik kobwa kobargei ak ichek, koyumgei tugul che kiimuchi kolaach karik, agoi che eechen, ak koba kotononso eng’ kiwoto.

²² Ak king’eetyo karon inne, ak kiga iluuchi asista beek, ak kigeer Moabik beek, che kiga itorjigei ichek, ko kabiriritu ko u korotik:

²³ ak kile, Korotik chun; kogebar laitorinik iman, ak kogobar chi tugul choruennyi: ara anyun, Moabichu, onam barunenik.

²⁴ Ak kingoit nganasetab Israel, kong’eetyo Israel kobar Moabik, kot komwei eng’ tainywa: ak kiba kochut emet kobarat Moabik.

²⁵ Ak kibut nganasok; ak kiwirji chi age tugul koitanyi koret age tugul ne mie, ak konyiit koik; kiger kondametusiek tugul che bo beek, ak koluul ketik tugul che miachen: kot kotuuch eng’ Kir-hareset inegei koik che bo yoto; nganda kiyiem nganasanato bik che kiwirtoi koik, ak kobar.

²⁶ Ak kingogeer laitoriatab Moab kole kagogoromji boriet inendet, komut murenik bogol tisab che tinyei rotok, kole kourur luget kwo ole mi laitoriatab Edom: ago ma imuch.

²⁷ Ak kinam taitanyi ne kita laitorani kogeeri inendet, ak kogoito inendet koek kagochjinet ne kibeelei eng’ inatut barak. Ak kibiit neregek che eechen agobo Israel: ak kiba eng’ ole mi inendet, koweektagei emenywa.