2 KORINTOEK 9 - BUKUIT NE TILIL

¹ Ago eng’ ng’alekab boisiet ne kiboisiechin che tililen ko matilei kiy ko ta asirwak.

² Amu angen chobeng’wong’ bo ge ne alosunege agobo okwek eng’ ichek che bo Makedonia, ale kigochopgei Akaya koboch kenyit agenge ne kogosiirto; ak kigong’eet kagiileng’wong’ bo ge che chang’ mising’ eng’ ichek.

³ Ago koayogu che kitupche, si maek buch kalosunennyo bo ge agobo okwek eng’ ng’olyondonito; si kobiit ochopge, ko u ye kiamwa:

⁴ si ngot kebwa ak age ne bo Makedonia, ak kenyoruok kotom ochoboge, ko magililan eng’ kamang’unoni (si ma kimwa kele okwek).

⁵ Kiabwat anyun ale kanyol agaigai che kitupche, si kobiit kondoi kobwa olo omi, si kosib kochob tuguk che bo aiyebindang’wong’ che kigosib oaror, si kobiit kochobok tukchoto, koek tuguk che bo aiyebindo, ama bo torjinet.

Ole kigoitoitoi kayumanik

⁶ Ago amwae ni anyun ale, Inendet ne kolei che ng’ering’ kogesei agine che ng’ering’; ak inendet ne kolei eng’ aiyebindo kogesei agine che bo aiyebindo.

⁷ Ingogoito chi age tugul ko u ye kigochob eng’ muguleldanyi; ma eng’ ng’oknatet, anan torjinet: amu chamei Jehovah ne igoitoi eng’ boiboiyet.

⁸ Ak komuchi Jehovah kogonok mieindo tugul kotesak mising’; si otinye okwek kotugul tuguk tugul che yamok eng’ kit age tugul, si otunen eng’ boisiet age tugul ne mie:

⁹ ko u ye kigisir kele, Kigoserser, kigogochi kibananok; Tebyei imandanyi koigeny.

¹⁰ Ak inendet ne igochin keswek kolindet ak amitwogik che amei, kogonok ak kotesei keswekwok che ogole, ak kotes logoekab imandang’wong’:

¹¹ kigonok magornatet eng’ kiy age tugul eng’ aiyebindo tugul, ne igochin Jehovah kongoi eng’ achek.

¹² Amu yaetab boisioni ko mainyiityin kityo bik che tililen, tuguk che te che kobononi, ago tesoksei agine eng’ kaweekyinoik che chang’ che bo kongoi che kiweekyin Jehovah;

¹³ amu tiemet ne bo boisioni kotorori ichek Jehovah amu kasetab it ne bo ng’ang’eng’wong’ eng’ logoiywek che miach che bo Kristo, ak aiyebindab kagoitoeng’wong’ eng’ ichek, ak eng’ tugul;

¹⁴ ak eng’ saenywa agobo okwek, koting’enok emosto amu mieindab Jehovah ne tesat mising’ eng’ okwek.

¹⁵ Kongoi eng’ Jehovah amu konunennyi ne ma mwaoksei.