2 KORINTOEK 8 - BUKUIT NE TILIL

Tuguk che kiyumjin kibananok che mi Jerusalem

¹ Kiboruok anyun, che kitupche, mieindab Jehovah ne kigigochi kanisosiekab Makedonia;

² ale ye kingetiem ichek eng’ nyalilda ne o, ko kitesak boiboindanywa ne siirtoot ak banandanywa ne o kot kotesyi ichek magornatetab aiyebindanywa.

³ Amu abaoriani ale kiigoito eng’ chamnyenywa ko u kamugenywa, ak ne siirei kamugenywa,

⁴ kosomech eng’ kagaigaet ne o agobo mieini ak yamdaet eng’ boisiet ne kiboisiechin che tililen:

⁵ ak ma ko u ye kigimang’u, ago kisib kogochigei icheget Kiptaiyat, ak kigoneigei eng’ magetab Jehovah;

⁶ agoi kigiil Tito, kele ko u ye kisib kotoi, komachei kosulda eng’ okwek mieinito agine.

⁷ Ago ko u ye otinye aiyebindo eng’ kiy age tugul, eng’ kayanet, ak twegunet, ak naet, ak eng’ kagiiletab ge tugul, ak eng’ chamnyeng’wong’ ne oting’enech, ingonyiiak anyun mieinito agine.

⁸ Mang’alali eng’ ng’atutiet, ago atieme eng’ kagiiletab ge ne bo alak, ngo bo iman chamnyeng’wong’.

Kaborunetab Jesu

⁹ Amu ongen mieindab Kiptaiyandennyo Jesu Kristo ole, agot nganda ki magorio, ko kiek kibanania agobo okwek, si kobiit oegu magorek eng’ banandanyi.

¹⁰ Ak eng’ nito aboruok kabwatutikyuk: amu nyolu nito eng’ okwek, che kigosib otau eng’ kenyit agenge ne kogosiirto, ma kityo oyai, ago ochame agine.

¹¹ Ago ogesu anyun nguno boisiet; amu ko u ye kio chobotin ochame oyai ko u noto, komitei ko u noto kasuldaet ne bo kamugeng’wong’.

¹² Amu ngo chobot kabwatetab chi, ko taachaksei ko u ye tinyei chi, ma ko u ye matinyei.

¹³ Amu ma ale si kinyamnyumji alak, kinyalilak okwek;

¹⁴ ago koaechin; toreti nguno anyun chang’indang’wong’ terterindanywa, si kotoret chang’indanywa terterindang’wong’; si kobiit kogergeit:

¹⁵ ko u ye kigisir kele, Inendet ne kiiyum che chang’ ko masiirto kiy; ak inendet ne kiiyum che ng’ering’ ko mararji kiy.

Ng’alek che kigiyoktoe Tito ak bik alak

¹⁶ Ago kongoi eng’ Jehovah, ne indoi muguleldab Tito ko u noto kagiiletab ge agobo okwek.

¹⁷ Amu kitaach iman kagiilennyo, ago amu igiilegei kot, kogonyo anyun ole omi eng’ chamnyennyi.

¹⁸ Ak kogiyokte tupchet age koboto inendet ne toogunot kalosunennyi agobo logoiywek che miach eng’ kanisosiek tugul;

¹⁹ ak ma noto kityo, ago kilewen kanisosiek inendet kebendate tugul agobo mieini, ne kiyae achek keyachini torornatetab Kiptaiyat, ak kiboru chobennyo bo ge ne kitinye:

²⁰ keistoege ng’olyondonito kele, si kobiit mamwaitaenech chi age tugul kiy ne ya agobo aiyebini kiyaati:

²¹ amu kibwati tuguk che bo teegisto, ma eng’ taitab Kiptaiyat kityo, ago eng’ taitab bik agichek.

²² Ak kogiyokte koboto ichek tupchennyo, ne kogegeer konyil che chang’ kele igiilegei eng’ tuguk che chang’, ago nguno kogiilegei mising’ kosiir, amu kamang’unet ne ting’enok mising’.

²³ Ngo teebenak chi agobo Tito, inendet ko kiboitiot ne kimi tuwai, ak kiboisiei tuwai agobo okwek; anan agobo tupchosiekyok, icheget ko che kiyoktoi che bo kanisosiek, choto ko torornatetab Kristo.

²⁴ Noto anyun oborji icheget eng’ taitab kanisosiek kit ne iboru chamnyeng’wong’, ak kalosunennyo bo ge agobo okwek.