2 KORINTOEK 6 - BUKUIT NE TILIL

¹ Kisome achek che keboisiei ak Jehovah kele amotaach mieindab Jehovah buch

² (amu mwaei kele, Kiagasin eng’ betut ne bo chamjinet, Ak kiatoretin eng’ betut ne bo sorunet: Ogeero, nguno ko betut ne bo chamjinet; ogeero, nguno ko betut ne bo yetunet):

³ ama kiyai kiy age tugul ne bo kanagut, si ma kimwaitae boisiennyo yaitio;

⁴ ago eng’ tuguk tugul kibortoige, ko u kiboitinikab Jehovah, eng’ muitaet ne o, eng’ bichiinwek, eng’ kagiigosiek, eng’ tiritinwek,

⁵ eng’ birutik, eng’ ratisiosiek, eng’ bolatosiek, eng’ boisionik che uuen, eng’ ripsosiek, eng’ rugutosiek;

⁶ eng’ tililindo, eng’ naet, eng’ mutyonet, eng’ talasiet, eng’ Tamirmiriet ne Tilil, eng’ chamnyet ne matinyei kenisiet,

⁷ eng’ ng’olyotab imanit, eng’ kamuktaetab Jehovah; eng’ karikab imanda eng’ eutab tai ak eng’ eutab katam,

⁸ eng’ torornatet ak tewernatet, eng’ ng’alek che yaach che kimwaitaenech, ak eng’ ng’alek che miachen; ko u kaberberik, ago ki bo iman;

⁹ ko u che ma naotin, ago kingenech komie; ko u che machei kobek, ak ogeero, kisoptosi; ko u che kitigoni, ago magibarech;

¹⁰ ko u che arogendos, ago che boiboi kotugul; ko u che bonondos, ago imogornoni che chang’; ko u che matinyei kiy, ago tinyei tuguk tugul.

Kimakyin che kigowalogis chamnyet

¹¹ Kagiyatwok kutuswekyok, ee Korintoechu, kabaraitu mugulelwekyok.

¹² Ma ogiigotin eng’ achek, ago ogiigotin eng’ chamnyeng’wong’.

¹³ Ak eng’ kageeret ne te ne kigigonok (ang’alali ko u ye ang’alaljini lagokyuk), ingobartaitu mugulelwekwok.

Kiteechin che iyanotin si manamgei ak che maiyanotin

¹⁴ Amot oratge ak che ma iyanotin: tinyei imanda yamdao nee ak tengekto? Anan tinyei yamdao nee lapkeiyet ak mesundeito?

¹⁵ Anan kasyindos eng’ nee Kristo ak Belial? Anan ting’egei nee ne iyanat ak ne ma iyanat?

¹⁶ Ak ting’egei nee hekalut ne bo Jehovah ak kanamonik? Amu ki hekalut ne bo Jehovah ne sobei; ago ko u ye kimwa Jehovah kole, Amenye ichek, ak awendote ichek; Ak aegu Jehovah nenywa, Ak koek ichek bikyuk.

¹⁷ Noto anyun omong’u eng’ kwenunywa, Ak otabange, mwaei Kiptaiyat, Amotwa kiy ne bo simdo; Si ataachak,

¹⁸ Ak aegu Kwanda eng’ okwek, Ak oegu werik ak tibik eng’ ane, Mwaei Kiptaiyat ne bo Kamuktaet.