2 KORINTOEK 4 - BUKUIT NE TILIL

Keamdoi ng’alek eng’ nyiganatet ak ko kasoksei

¹ Noto anyun, amu kitinye boisioni, ko u ye kigenyoru rirenetab ge, ko mameech mugulel:

² ago kigeesie tuguk che ung’otin che bo kalilanet, ama kibendoti eng’ ng’alset, anan keboisie ng’olyotab Jehovah eng’ kaberberisiet; ago eng’ kabartaetab imanit, kiborjinige kabwatetab chi age tugul eng’ taitab Jehovah.

³ Ago ngo tugotin logoiywekyok che miach, ko tugotin eng’ ichek che lustos:

⁴ eng’ ichek che katuch cheptalelitab ng’onyuni kabwatutikab che maiyani, si mailuuchi ichek lapkeiyetab logoiywek che miach che bo torornatetab Kristo, ne inendet ko itondab Jehovah.

⁵ Amu magiamdoti agobo ge, ago Kristo Jesu ne Kiptaiyat, ak acheget ko ki otwogikwok amu Jesu.

⁶ Amu Jehovah ne kimwa kole, Tun iluu lapkeiyet kobunu mesundeito, inendet ne kiiluuchi mugulelwekyok, si kogon lapkeiyet ne bo naetab torornatetab Jehovah eng’ togetab Jesu Kristo.

Nyalulnatetab ne kiyoktoi, ak kamuktaetab Jehovah

⁷ Ago kitinye konoruani eng’ terenik che bo ng’ung’unyek, si kobiit kobunji Jehovah oindo ne siirtoot mising’ ne bo kamuktaet, ago ma achek;

⁸ kinyalilech eng’ komosta age tugul, ago magigiichech; kitobtobeni, ago mabetwech kamang’unet;

⁹ Kionwech, ago magibagaktaech; kiwirtaech ago magibarech;

¹⁰ kiiboti kotugul eng’ borto meetab Jesu, si kobiit kong’ang’ak agine sobondab Jesu eng’ borwekyok.

¹¹ Amu acheget che kisoptosi kimutyinech meet kotugul amu Jesu, si kobiit kong’ang’ak agine sobondab Jesu eng’ borwekyok che begu.

¹² Noto anyun boisiei meet eng’ achek, ago sobondo eng’ okwek.

¹³ Ago amu kitinye tamirmiriet noto bo kayanet, ko u ye kigisir kele, Kiayan, noto anyun kiang’alali; kiyani agachek, ak keng’alali amu noto;

¹⁴ kingen kele inendet ne kiing’eet Kiptaiyat Jesu ko tun ing’eetech agachek koboto Jesu, ak kobartech kobotok.

¹⁵ Amu tuguk tugul ko agobo okwek, si ye tesak mieindo eng’ che chang’, koyai kagoitoetab kongoi kotesak eng’ katororetab Jehovah.

Bichiindo ne bo betusiek che ng’ering’en, ak torornatet ne bo koigeny

¹⁶ Noto anyun, mameech mugulel; ago agot ngo ng’emak chinnyo ne bo barak, kewalei chinnyo ne bo orit kileeliti betut age tugul.

¹⁷ Amu bichiindanyo ne nyamnyum, ne matebyei, koyaiywech torornatet ne o ne bo koigeny, ne tesoksei mising’ kosiir;

¹⁸ ye magigeere tuguk che toogu, ago tuguk che ma toogu, amu tuguk che toogu kosiirtoi; ago tuguk che ma toogu ko bo koigeny.