2 KORINTOEK 3 - BUKUIT NE TILIL

Bik che kiwalogis amu amdaetab Paulo

¹ Ara anyun, kagitau kogeny kemwauge acheget? Anan kimache, ko u ye machei bik alak, baronok che bo mwaitaetab ge che bwanjinok ak che bunwok?

² O baruennyo ne sirat eng’ mugulelwekyok, ne naat ak kosomani bik tugul;

³ obortoige ole o baruet ne bo Kristo, ne kigiyai, ne kigisir ama eng’ wino, ago eng’ Tamirmiriet ne bo Jehovah ne sobei; ma eng’ koik che lebelen, ago eng’ koik che lebelen che mugulelwek che bo borwek.

⁴ Ak ketinye kamang’unet ne u noto eng’ Kristo, ne tokyingei Jehovah:

⁵ ma kele kitinye kiy achege ne yamegei ak kiy, kiit kiy age tugul kele bunwech acheget; ago bunu Jehovah che yamech;

⁶ ne kiyaech keegu che yamei, kiboitinik che bo arorutiet ne leel; ma che bo ng’atutiet, ago bo Tamirmiriet; amu barisiei ng’atutiet, ago Tamirmiriet ne igoitoi sobondo.

O torornatetab Logoiywek che Miach kosiir torornatetab Ng’atutik

⁷ Ago ngo kibwa koboto torornatet boisietab meet, ne kigisir, ak kewachi koik barak, kot ko kimata komuch bikab Israel kogeer toget ne bo Musa komie amu lilindab togennyi; lilindo ne kiigesugei:

⁸ tos ma tesat kosiir boisietab tamirmiriet eng’ torornatet?

⁹ Amu ngo boisietab kiruoget ko torornatet, ko siirtoot mising’ boisietab imanda eng’ torornatet.

¹⁰ Amu iman, noto ne kigitoror, ko kima kigochyi torornatet agobo nito, amu torornatet ne siirtoot.

¹¹ Amu ngo kimi noto siirtoi koboto torornatet, komitei anyun eng’ torornatet ne tia, noto ne ng’etunot.

¹² Noto anyun, amu kitinye kamang’unet ne u ni, keboisie anyun nyiganatet ne bo keny eng’ ng’alalet,

¹³ ama ki u Musa, ne kituge togennyi anget, si mageer lagokab Israel komie kagesunet ne bo noto kiigesugei:

¹⁴ ago kiuuegitu kabwatutikwak: amu agoi betuni, eng’ somanetab arorutiet ne bo keny, ko ta komi anganato bo toget, tom keisto; noto ne kigeisto eng’ Kristo.

¹⁵ Ago agoi betuni, ko eng’ betut age tugul ye kisomani Musa, ko ta komitei anganato mugulelwekwak.

¹⁶ Ago ye kaweekyinegei Kiptaiyat, keisto anganato.

¹⁷ Kiptaiyat ko Tamirmiriet anyun: ak ole mi Tamirmirietab Kiptaiyat komi katiaget.

¹⁸ Ago achek tugul kobortoi torornatetab Kiptaiyat ko u kioit eng’ togochikyok che ma tugotin, kewalech eng’ itonoto kobunu torornatet agoi torornatet, ko u ye bunu Kiptaiyat ne Tamirmiriet.