2 KORINTOEK 2 - BUKUIT NE TILIL

¹ Ago kiatil ni ale ma anyonjinok kogeny eng’ arogenet.

² Amu ngot agonok oarogense, ko ng’o anyun ne iboiboa, kobate inendet ne kaagochi koarogen?

³ Ak kiasirwak ng’olyondonito, si ma ye anyo, ko matinye arogenet eng’ ichek che kanyolja agasege; atinye kamang’unet eng’ okwek tugul, ale boiboiyennyu ko neng’wong’ okwek tugul.

⁴ Amu kiasirwak eng’ bichiindo ne o ak ng’wanindab muguleldo koboto beekab kong’ che chang’; ma si oarogense, ago si kobiit onai chamnyet ne ating’enok mising’ kosiir.

Mie kenyochi kaat ne sigu

⁵ Ago ngot ko koing’eet chi arogenet, ko koing’eet arogenet, ma eng’ ane, ago eng’ kebeber, (si magonok ane nyigisindo ne siirei) eng’ achek tugul.

⁶ Yamei chito ne u nito kagikyinoni kitilji bik che chang’;

⁷ ago kaigai onyochi kaat inendet ak ogaigai, si malugui, eng’ oret age tugul, chito ne u noto arogenennyi ne siirtoot.

⁸ Noto anyun asomok ale ogimit chamnyeng’wong’ eng’ inendet.

⁹ Amu kiasir agobo ng’olyondonito, ale anaak komie ngogase it eng’ tuguk tugul.

¹⁰ Ago inendet ne onyochini kaat kiy age tugul, anyochini kaat agane: amu noto ne kianyochi kaat agane, ngo kianyochi kaat eng’ kiy age tugul, ko kianyochi kaat agobo okwek eng’ taitab Kristo;

¹¹ si manyor Setani kit ne iterterenech: amu ma ki berberen, ago kingen chobutikyik.

Tiemisiosiek ak keterterosiek agobo Logoiywek che Miach

¹² Ak ye kinganyo Troa amu logoiywek che miach che bo Kristo, ak ye kingeyatwa kurget eng’ Kiptaiyat,

¹³ kimanyoru kamuung’et eng’ tamirmiriennyu, amu kima anyoru Tito ne kitupche: ago kiabagakte, ak awe Makedonia.

¹⁴ Ago kongoi eng’ Jehovah, ne imutatech kotugul kibelisie eng’ Kristo, ak kobortoi nyamdutietab naennyi eng’ achek eng’ komosta age tugul.

¹⁵ Amu ki nyamdutiet ne anyiny ne bo Kristo eng’ Jehovah, eng’ ichek che kisoru, ak eng’ ichek che lustos;

¹⁶ eng’ alak ko ki nyamdutiet ne bo meet agoi meet; eng’ alak ko ki nyamdutiet ne bo sobondo agoi sobondo. Ak tos ng’o ne yamegei ak tuguchu?

¹⁷ Amu achek ko ma ki u che chang’, che boisie ng’olyotab Jehovah eng’ ng’alset: ago ki che boisiei eng’ oret ne matinyei ng’alset, ago ki bo Jehovah, ak eng’ taitab Jehovah, keng’alali eng’ Kristo.